Wenten cerita sujati saking Cakepan Sucine indik anak istri sane bekung mapesengan Ni Ana.

Ring negeri Israel wenten anak istri sane mapesengan Ni Ana. Ipun marabian sareng I Elkana, sane meneng ring wawidangan Epraim. Lan Ni Ana mamadu sareng Ni Penina. Ni Penina madue alit-alit, nanging Ni Ana bekung.

Kaceritayang, I Elkana sareng kaluargannyane tangkil ring genah suci utama Sang Hyang Tunggal ngaturang aturan marupa beburon sane kaborbor, sebilang tiban apisan. Pamargin ipune ka genah sucine punika adohnyane kirang langkung selae (25) kilometer.

Ritatkala tangkil ka genah sucine punika, Ni Penina sering nyakitin ati Ni Ana krana ragan ipune bekung. Punika mawinan, Ni Ana sering pisan nangis lan nenten kayun ngajeng krana kalintang sebet. Tur I Elkana setata ngutsahayang ngibur Ni Ana mangdane ipun nenten sebet.

Ritatkala warsa anu, Ni Ana sareng kaluargannyane tangkil ka genah suci Sang Hyang Tunggal sekadi biasane. Ritatkala irika, Ni Ana nunas ica kapining Sang Hyang Tunggal antuk manah sane sebet pisan saha nangis sigsigan. Ipun mapinunas sapuniki, “Inggih Sang Hyang Tunggal Ratun titiang sane Mahakuasa, suryanin ja kasengsaran titiange, titiang puniki parekan I Ratu. Yening Ratu ngicenin titiang oka lanang, titiang jagi nyerahang ipun dados druen palungguh I Ratune, selantang tuuh ipune.”

Irika Ni Ana sue pisan nunas ica, tur rsi penglingsir agung nyingakin ipun kemak-kemik kemanten tatkala nunas ica. Irika raris, rsi penglingsir agung mabaos sapuniki, “Eda ja ragane punyah buin.”

Raris Ni Ana matur, “Ratu, rsi penglingsir agung, titiang nenten ja sedek punyah. Nanging titiang iriki nunas ica ring Sang Hyang Tunggal antuk manah sane sebet pisan.”

Irika raris rsi penglingsir agunge mabaos sapuniki, “Yening keto, mulih ja ragane saha slamet. Dumogi ja Sang Hyang Tunggal ngicenin pinunas ragane.”

Irika raris, Ni Ana matur, “Ratu rsi, dumogi ja titiang ngamolihang welas asih saking iratu.” Tur ipun ngajeng raris matilar antuk manah sane liang. Lan benjangane ipun sareng kaluargannyane ngaturang bakti ring Sang Hyang Tunggal raris budal.

Sasampune ipun sami budal, Ni Ana sirep sareng rabinnyane. Risampune sapunika, Ni Ana mobot, krana Sang Hyang Tunggal eling kapining ipun. Risampune atiban raris ipun nglekadang oka lanang. Okane punika kapesengin I Samuel.

Kaceritayang mangkin, I Samuel sampun mayusa kirang langkung petang tiban. Irika raris Ni Ana makta okannyane ka genah suci Sang Hyang Tunggal. Irika, Ni Ana ngaturang aturan marupa beburon sane kaborbor ring Sang Hyang Tunggal. Raris I Samuel kaserahang ring rsi penglingsir agung tur Ni Ana matur ring ida sekadi puniki, “Ratu rsi penglingsir agung, duk idumun wantah titiang anak sane ngadeg iriki nunas ica ring Sang Hyang Tunggal. Titiang nunas ring Sang Hyang Tunggal mangdane ngicenin titiang oka lanang. Tur Sang Hyang Tunggal sampun micayang anake alit puniki kapining titiang. Sane mangkin titiang nyerahang anake alit puniki ring ajeng Sang Hyang Tunggal, dados druen Idane, selantang tuuh ipune.”

Raris ipun sami ngaturang bakti ring Sang Hyang Tunggal.