8 Dane Yusup Nyinahang Ragan Danene Kapining Para Semetonnyane
8
Risampune dane Yusup mirengin baos dane Yehuda,
irika raris dane Yusup nenten sida malih nandang manahnyane ring arepan anake sane wenten irika.
Punika mawinan dane Yusup mrentahang mangdane sekancan parekane medal saking genahe punika.
Sasampune anake sami pada medal,
raris dane nyinahang ragan danene kapining para semetonnyane.
Irika raris dane Yusup nangis keras.
Punika mawinan anak Mesire mirengin tangis danene tur ortine punika neked kantos ring purin raja Mesire.
Dane Yusup mabaos sapuniki,
“Tiang ene Yusup.
Seken ke ibapa enu idup?”
Nanging para semeton danene nenten masaur napi-napi krana jejeh.
Malih dane Yusup mabaos sapuniki,
“Mai ja,
paekin tiang.”
Irika raris para semeton danene nampekin dane lan dane Yusup mabaos sapuniki,
“Tiang ene Yusup,
semeton ragane ane suba adep ragane ka Mesir.
Eda ja jejeh lan eda ja maselselan,
krana ragane suba ngadep tiang mai.
Sujatine Sang Hyang Tunggal ane makta tiang ka Mesir,
ngamalunin ragane,
apanga tiang nylametang idup anake akeh uling bencana ane lantang ene.
Keto masih apanga sida nylametang ragane makejang,
tur pianak-pianak lan cucun-cucun ragane tetep kapiara.
Krana masan sayahe ene lantang sajan.
Ane jani masan sayahe ene mare liwat duang tiban,
tur enu mamargi buin limang tiban.
Sujatine nenten ja ragane nanging Sang Hyang Tunggal sane ngranayang tiang ada dini jani.
Samaliha Ida sampun ngangkat tiang dadi pengede agung ring ajeng raja Mesir,
ane ngadakang tiang dados mekel ring purin sang raja Mesir tur tiang ane nguasain sekancan negara Mesire ene.
“Nah jani,
enggalang ja mulih sid i bapa tur ceritayang ja yening tiang enu idup.
Samaliha Sang Hyang Tunggal sane ngangkat tiang dadi penguasa ring saluirin negara Mesir.
Orahin ja tekening i bapa,
apanga i bapa pramangkin rauh mriki!
I bapa lan makejang pianakne tur cucun-cucune sida meneng nampek ajak tiang,
apanga tiang miara ragane makejang krana masan sayahe kari malih limang tiban.
“Ragane makejang,
keto masih semeton tiange Benyamin suba nyingak wantah tiang ane ngraos.
Ceritayang ja teken i bapa sekancan kaluihan tiange ring negara Mesir puniki,
sekadi ane suba ragane sami cingakin raris ajak ja i bapa mai.”
Irika raris dane Yusup ngelut dane Benyamin tur ipun sareng kalih pada nangis.
Salanturnyane dane Yusup niman para semetonnyane sane lianan tur dane nangis saha ngelut ipun sami.
Risampune sapunika,
raris ipun sami ngarembug sareng dane Yusup.
Raja Mesir lan para pengedene mirengin orti indik rauhnyane para semeton dane Yusup.
Sang raja lan para pengede punika pada seneng.
Raris raja Mesire punika ngandika kapining dane Yusup sapuniki,
“Tunden ja para semeton ragane ngaba gandum,
amongken ja ia makejang nyidayang ngaba ka negara anak Yahudine.
Orahin ja ia makejang mapagin bapa lan kaluargannyane laut mabalik mai buin.
Nira lakar ngemaang tanah ane paling melaha di Mesir.
Tunden ja ia makejang ngaba kreta uling dini anggon mapagin bapa,
somah lan pianak-pianakne.
Ia makejang tusing perlu mineh-minehang tur medalem ngutang arta branane irika,
krana ane paling melaha di tanah Mesir dadi pagelahan iane makejang.”
Irika raris okan-okan dane Israele nglaksanayang sekancan titah raja Mesire punika.
Lan sekadi titah sang raja,
dane Yusup ngicenin kreta-kreta turmaning bekel sane genep sane kaanggen ring pamargin ipune.
Ipun sami taler kicen pengangge anyar paduma asetel.
Nanging ring dane Benyamin kicen telung atus jinah perak lan pengangge anyar limang setel.
Kenten pada dane Yusup ngicen dasa ukud keledai muani sane kaanggen makta adiah sane paling melaha saking Mesir.
Tur dasa ukud keledai lua sane kaanggen makta gandum lan ajengan lianan buat bapan danene rikala jagi mamargi ka Mesir.
Raris dane Yusup nunden para semetonnyane mamargi budal saha mabesen ring para semeton ipune mangdane nenten mauyutan ring pamarginnyane.
Raris ipun sami mamargi budal.
Nah kaceritayang mangkin,
para semeton dane Yusupe sampun rauh ring umahnyane.
Raris ipun sami nyeritayang sekancan paindikane saha mabaos sapuniki,
“Yusup kari idup.
Samaliha ia ane dadi penguasa ring Mesir.”
Mirengin raos sekadi punika dane Israel kelangen tur nenten pracaya kapining raos okan-okannyane.
Nanging risampun sekancan pabesen dane Yusupe katekedang tur kacingak kreta-kreta sane kautus,
irika raris manah dane Israele liang.
Raris dane mabaos sapuniki,
“Pianak tiange I Yusup enu idup.
Tiang dot matemu ajak ia,
satondene tiang mati.”