7 Dane Yusup Nguji Para Semetonnyane
7
Risampune dane Yusup lan para semeton danene ngajeng sareng-sareng,
raris para semeton danene mataki-taki jagi mawali budal ka negara anak Yahudine.
Dane Yusup mrentahang pemimpin pengayah ring jeron danene sekadi puniki,
“Dagingin ja gandum ring karung-karung anake sami ento,
amongken ja akehne ipun sami mresidayang makta gandume ento.
Tur celepin ja jinah sane kaanggen naur gandume punika ring karung-karung ipune suang-suang.
Samaliha celepin ja cangkir perak druen tiange ring karung anake ane paling alit ento.”
Pengayahe punika nglaksanayang sekancan prentah dane Yusupe.
Benjangane,
ritatkala semeng ngremeng,
semeton danene punika kicen nglanturang mamargi budal antuk keledai ipune suang-suang.
Nanging wawu pisan ipun sami medal saking kota,
turmaning kari nampek ring kotane punika,
raris dane Yusup mrentahang pemimpin pengayah danene mangda ngepung para semeton danene punika.
Risampune pemimpin pengayahe punika manggihin para semeton dane Yusupe ring sisin kotane,
ipun nekedang pabesen dane Yusupe sekadi puniki,
“Ngudake ragane makejang ngwales parilaksana sane becik antuk parilaksana sane jaat ring pamekel tiange?
Ngudake ragane makejang ngamaling cangkir perak druen pamekel tiange?
Cangkire punika kaanggen nginum lan dados srana nrawang paindikan sane jagi rauh.
Jele sajan parilaksanan ragane ento.”
Nah irika raris para semeton danene matur sekadi puniki,
“Napike mawinan jerone ngamaosang sekadi punika?
Nenten ja patut panjak sekadi titiang malaksana jaat sekadi punika!
Jero sampun uning yening titiang makasami ngawaliang jinah sane panggihin titiang idumun ring karung titiange suang-suang.
Tur mangkin,
ngudake titiang sami ngamaling cangkir perak pengede agunge punika?
Sane mangkin,
yening jero manggihin druene punika ring karung sapa sira ja iriki,
mangdane anake punika kaukum padem tur titiang sami jagi memanjak kapining jerone.”
Rika raris pemimpin pengayahe punika nyaurin sekadi puniki,
“Raos ragane ento patut!
Sakewala kene;
nyen ja ane ngamaling cangkir perake ento,
tuah anake ento ane dadi panjak tiange.
Anak ane lenan dadi mulih.”
Raris ipun sami nedunang karung-karung ipune saking keledaine suang-suang lan mukak karungnyane.
Raris pemimpin pengayahe punika mreksa karung-karunge,
ngawit saking karung anake sane paling kelih kantos anake sane paling alit.
Lan cangkir dane Yusupe kapanggihin ring karung dane Benyamine.
Irika raris para semeton dane Yusupe punika pada nguek bajun ipune dados tanda ipun sami sebet pisan.
Raris ipun sami ngangkut malih karung-karung ipune mewali ka jeron dane Yusupe.
Risampun para semeton dane Yusup rauh ring jeron danene,
raris para semetonnyane nyembah dane Yusup kantos muannyane nganteg ka tanahe.
Raris dane Yusup ngraos sapuniki,
“Ngudake ragane makejang malaksana jaat buka keto?
Tusingke ragane nawang,
sujatine tiang ene nyidang nawang paundukan silib ane tonden mamargi?”
Irika raris dane Yehuda matur sekadi puniki,
“Inggih ratu agung.
Titiang sami nenten sida matur napi-napi malih,
mangdane muktiang yening titiang puniki nenten iwang.
Sang Hyang Tunggal sampun nunjukin kaiwangan titiange sami.
Nenten ja anake sane karungnyane madaging cangkir kamanten sane jagi dados panjak iratune,
nanging titiang sami jagi memanjak ring iratu.”
Raris dane Yusup nyaurin sekadi puniki,
“Tusing ja buka keto!
Tiang tusing ja bakal malaksana buka keto.
Tuah anake ane karungnyane madaging cangkir perak tiange kamanten sane dados panjak tiange.
Lenan teken anake ento,
dadi mulih.”
Raris dane Yehuda nampekin dane Yusup tur matur,
“Inggih ratu agung.
Titiang nunas galah matur akidik.
Sampunang ja iratu agung murka kapining titiang.
Nah,
indik adin titiange sane paling alit punika,
ipun pianak sane paling kasayangin olih bapan titiange.
Yening titiang mawali ka umah titiange nenten sareng adin titiange punika,
sinah bapan titiange jagi padem krana manahnyane sebet pisan.
Titiang nenten sida nyingak sebet manah bapan titiange yening okannyane punika nenten budal.
Sane mangkin titiang nunas ring iratu:
Banggiang ja titiang sane dados pasilur meneng iriki,
mangdane titiang dados panjak iratune.
Asapunika pinunas titiange kapining iratu.”
Sekadi punika dane Yehuda matur ring dane Yusup.