6 Dane Yusup Matemu Malih Sareng Para Semetonnyane
6
Risampune okan-okan dane Israel rauh ring umahnyane makta gandum,
raris ipun sami nyeritayang sekancan paindikan sane sampun mamargi kapining ipun ring Mesir.
Nah,
kaceritayang mangkin ring negeri anak Yahudi,
masan sayahe ngangsan ageng.
Turmaning gandum sane kabakta saking Mesir sampun telas.
Irika raris dane Israel ngraos kapining okan-okannyane sapuniki,
“Luas ja ka Mesir meli gandum!”
Nanging okan danene sane mapesengan dane Yehuda matur sapuniki,
“Pengede agung ring negara Mesir punika seken-seken ngraos kapining tiang sami sekadi puniki,
‘Ragane sami nenten dados mawali ka Mesir yening adin ragane sane paling alit nenten sareng mriki.’”
Raris dane Israel ngraos sapuniki,
“Nguda cening makejang ngorahang ring sang pengede agung punika indik adin ragane ane paling cerike ento?”
Raris ipun sami matur ring bapannyane sapuniki,
“Pengede agung punika sedsed mataken kapining tiang sami indik kaluargan iragane.
Tiang nenten ja ngaden ipun jagi mrentahang kapining tiang sami mangda ngajak i adi sane paling alit sareng mrika,
tatkala tiang sami mawali malih ka Mesir.”
Raris dane Yehuda matur ring bapannyane sapuniki,
“Sane mangkin,
banggiang ja I Benyamin nyarengin tiang ka Mesir,
mangdane tiang sami mataki-taki tur mamargi ka Mesir jagi numbas gandum mangda iraga sami mresidayang ngajeng.
Tiang sane nanggung adin tiange puniki.
Tiang jagi ngawaliang ipun ring bapa malih.
Yening umpamiang bapa ngicen tiang sami luas sareng i adi dugase nika,
minab tiang sampun ping kalih ulah-ulih ka Mesir.”
Risampune kenten dane Israel ngraos sapuniki,
“Nah,
jani aba ja ka Mesir,
madu,
kacang-kacangan lan wawangian uling getah ane miyik anggon aturan kapining pengede agung Mesire ento.
Turmaning aba ja pipis ping kalih lipet,
uliang ja pipis ane bakatang cening di karunge ento,
minab ento tuah ada ane pelih.
Ajak ja bareng i adi ane paling cerik ento,
mataki-taki ja laut majalan ja ka Mesir.
Dumogi Sang Hyang Tunggal ngadakang pengede agunge ento madue welas asih tur ngicen nyaman ceninge,
I Simeon lan I Benyamin mulih.
Yening bapa musti kelangan pianak-pianak bapane,
bapa suba las manah.”
Irika raris okan-okan dane Israele ngambil sekancan sane jagi kaaturang ring pengede agung Mesire punika.
Tur ipun taler ngambil jinah ping kalih lipet.
Samaliha arin ipune sane paling alit nyarengin ipun sami mamargi ka Mesir.
Nah kaceritayang mangkin,
okan-okan dane Israele sampun rauh ring negara Mesir.
Raris ipun sami tangkil ring pengede agung Mesire punika.
Ritatkala dane Yusup nyingak okan-okan dane Israel sareng dane Benyamin,
raris dane Yusup mrentahang pemimpin pengayah ring jeron danene sekadi puniki,
“Ajak ja anake makasami ene ka umah tiange.
Lan tampahang ja sampi aukud tur sadyayang ja ento makejang,
krana tiang lakar ngajeng ajak makasami anake ento ring tengaine ene.”
Irika raris sekancan prentah dane Yusup kalaksanayang olih pemimpin pengayahe punika.
Nanging paindikane punika ngawinang okan-okan dane Israel jejeh pisan,
krana ipun sami kabakta ka jeron dane Yusupe.
Raris ipun pada ngraos sapuniki,
“Ane mawinan iraga kaaba mai tusing ada len krana pipis ane ada di karung-karung iragane ento.
Ane jani,
iraga jagi kaajak ka jeron danene mangdane ipun ngejuk iraga makejang.”
Punika mawinan ritatkala ipun sami sampun ring korin jeron dane Yusupe,
ipun nampekin tur matur ring pemimpin pengayah jeron dane Yusupe,
sapuniki,
“Titiang sami napetang jinah-jinah titiange ring karung-karung titiange tatkala titiang numbas gandum idumun.
Sane mangkin jinahe punika sampun bakta titiang malih mriki.
Turmaning titiang makta jinah lianan sane kaanggen numbas gandum malih.”
Irika raris pemimpin pengayah jeron dane Yusupe nglimurang manah okan-okan dane Israele saha ngraos,
“Eda ja jejeh.
Sang Hyang Tunggal sasembahan ragane tur sasembahan bapan ragane sane ngicenin jinah ring karung-karung ragane sami.
Tiang sampun nerima jinah ragane idumun.”
Irika pemimpin pengayah dane Yusupe punika ngatehin dane Simeon ring okan-okan dane Israele raris ngayahin ipun sami.
Ritatkala sampun tengai,
dane Yusup budal ring jeron danene.
Irika raris okan-okan dane Israele ngaturang aturan sane sampun kabakta saking negeri anak Yahudi.
Ipun sami ngaturang aturane punika saha matimpuh ring arepan dane Yusupe kantos muannyane nganteg ka tanahe.
Raris dane Yusup mataken,
“Napike gatran bapan ragane becik?
Napike ipun slamet lan kari idup?”
Raris ipun sami matur,
“Inggih ratu,
bapan titiange kari idup.”
Dane Yusup nlektekin ipun sami.
Raris ipun nyingak dane Benyamin,
semeton danene saking ibu asiki,
dane ngraos sapuniki,
“Ene ke adin ragane ane paling cerik ento?”
Lan dane Yusup ngraos kapining dane Benyamin,
“Dumogi Sang Hyang Tunggal ngicen wara nugraha kapining ragane.”
Nanging dane Yusup nenten prasida naenang manah danene krana kangen kapining arin danene punika.
Irika raris gelis-gelis dane Yusup medal saking genahe punika tur ngranjing ka bale meten danene.
Irika dane nangis.
Risampune dane sida negtegin manah danene,
raris dane masugi tur medal nuju genah semeton danene punika.
Raris dane Yusup mrentahang para pengayah danene sapuniki,
“Sadyayang ja ajengane!”
Irika raris para pengayah danene nyadyayang ajengan ring mejan danene,
ring mejan okan-okan dane Israele,
tur ring mejan anak Mesire sane wenten pada irika.
Mejan ipune sami nenten ja dados siki,
krana anak Mesir ngrasa nista yening ngajeng sareng-sareng anak Yahudi.
Mejan okan-okan dane Israele wenten ring arep dane Yusupe.
Irika okan-okan dane Israele malinggih ring arep dane Yusupe.
Dane Yusup ngririgang genah malinggih okan-okan dane Israele nenten tios para semetonnyane,
meririg ngawit saking sane paling kelih ngantos sane paling alite.
Punika mawinan para semetonnyane pada ngon krana paindikane punika.
Ajengan para semeton danene kasadyayang saking mejan dane Yusupe.
Dane Benyamin kaaturang ajengan ping lima akehan bandingang teken para semeton ipune sane lianan.
Dane Yusup lan para semetonnyane ngajeng lan nginum kantos wadih.