2 Dane Yusup Ring Mesir
2
Risampune dane Yusup kabakta ka Mesir,
ipun kaadol ring pengede karajaan Mesir inggih punika pemimpin pengawal raja Mesire.
Pengedene punika mapesengan dane Potipar.
Irika dane Yusup kadadosang panjak.
Nanging Sang Hyang Tunggal nyarengin dane Yusup.
Punika mawinan ipun setata muponin asil sane becik ring sekancan pakaryan ipune.
Lan mangkin dane Yusup polih meneng ring jeron pamekelnyane inggih punika ring jeron dane Potipare.
Pamekelnyane sampun nyingakin indik Sang Hyang Tunggal nyarengin dane Yusup,
sane ngawinang ipun setata muponin asil sane becik ring sekancan pakaryan ipune.
Krana paindikane punika dane Yusup katresnain olih pamekelnyane.
Tur ipun kaangkat dados parekan utama sane dados ngayahin dane Potipar,
pamekelnyane.
Dane Yusup taler kicen kuasa ring sekancan umah lan arta branan pamekelnyane.
Sekat dane Potipar ngicen kuasa ring umah lan sekancan arta branan ipune kapining dane Yusup,
Sang Hyang Tunggal ngamertanin sekancan arta branan dane Potipare,
ngawit saking umahnyane kantos ring pategalannyane.
Lan dane Potipar nenten malih ngurusin paindikane punika sajabaning ajengan danene praragan.
Kaceritayang mangkin,
rabin dane Potipar seneng kapining dane Yusup.
Raris ipun ngraos kapining dane Yusup sapuniki,
“Mai ja sirep ajak tiang.”
Nanging dane Yusup nulak pikayunan rabin dane Potipare punika tur matur sapuniki,
“Pamekel titiange sampun ngicen kuasa kapining titiang.
Sekancan druennyane sampun kaserahang kapining titiang sajabaning jero,
sane dados rabin pamekel titiange.
Turmaning titiang nenten kayun malaksana jaat tur madosa kapining Sang Hyang Tunggal.”
Yadiastun sebilang rahina ipun ngoda dane Yusup mangda sirep sareng ipun,
nanging dane Yusup setata nulak ipun.
Kaceritayang mangkin,
dane Yusup nglaksanayang pakaryan ipune ring jeron pamekelnyane.
Risedek punika nenten wenten anak lianan ring jerone punika.
Raris rabin dane Potipare punika ngisiang bajun dane Yusupe tur ngraos,
“Mai ja sirep ajak tiang.”
Nanging dane Yusup nulak tur malaib medal lan ngutang bajun ipune sane kagisiang oleh rabin dane Potipare punika.
Ritatkala rabin dane Potipare punika nyingak dane Yusup malaib medal tur ngutang bajunnyane,
raris ipun gelar-gelur nyeritin para pengayah ipune tur ngraos,
“Tingalin ja,
rabin tiange makta anak saking bangsa lianan mangda sida nganistayang iraga.
Ia dot mrekosa tiang,
nanging tiang gelar-gelur.
Duk tiang gelar-gelur,
ia malaib ngutang bajune iriki.”
Samaliha,
rabin dane Potipare punika nyimpen bajun dane Yusupe lan nyantosang rabinnyane budal.
Risampune dane Potipar budal,
rabin danene ngraos sapuniki,
“Anak saking bangsa lianan sane dados panjak sane bakta ragane mriki,
ia sampun nganistayang tiang lan makeneh jagi mrekosa tiang.
Nanging tiang gelar-gelur,
raris ia malaib ngutang bajune iriki.”
Risampune dane Potipar mirengang sekancan paindikane punika,
dane duka pisan.
Raris dane nitahin mangda dane Yusup kaejuk tur kakrangkeng ring buine.
Buine punika genah buat ngrangkeng anak sane malaksana jaat kapining raja Mesire.
Nanging Sang Hyang Tunggal satya nresnain dane Yusup lan setata satya nyarengin dane.
Punika mawinan pemimpin buine punika seneng kapining dane Yusup.
Pemimpine punika ngicen kuasa ring dane Yusup lan ipun nyerahang sekancan anake sane kakrangkeng irika.
Tur sekancan pakaryane irika sekadi ngicen ajengan lan inuman kapining para anake sane kakrangkeng,
kaserahang kapining dane Yusup.
Pemimpine punika nenten malih ngurusin sekancan sane sampun kaserahang ring dane Yusup.
Dane Yusup setata muponin asil ring sekancan paindikane krana Sang Hyang Tunggal nyarengin dane.