<<    <     Sang Prabu Sane Ngrahayuang     26     >    >> 
Sang Hyang Yesus Sang Pemenang
320 Wenten cerita sujati saking Cakepan Sucine indik Sang Hyang Yesus punika Sang Pemenang.
321 Risampune Orti Rahayu indik Sang Hyang Yesus kasub maideh-idehan,
kacerita mangkin wenten adiri utusan Sang Hyang Yesus sane mapesengan Yohanes.
Dane Yohanes sedek nyalanang ukuman ring pulo Patmos.
Irika dane nerima sabda saking Sang Hyang Yesus.
Paindikane sekadi puniki:
dane nyingak Sang Hyang Yesus,
nenten tios Sang Prabu sane kapilih ngraja ring imanusa,
antuk kaagungan Idane sane tan kadi-kadi.
Ida nganggen pengangge agung mabedbed antuk emas.
Rambut Idane putih pisan.
Suaran Idane sekadi ombak sane ageng makuug ring segarane.
Saking cangkem Idane mawetu pedang mangan sane marai kakalih.
Samaliha prarain Idane masinar kadi matan ai ring tengai tepete.
Nah nyingakin paindikane punika,
dane Yohanes jejeh pisan kantos ebah makakeb ring arepan cokor Idane sekadi anake padem.
322 Nanging Sang Hyang Yesus ngusud dane Yohanes,
saha ngandika sapuniki,
323 “Eda ja jejeh!
Nira ane kapertama lan ane pamuput lan ane idup.
Nira taen padem.
Nanging tolih ja,
Nira idup salamin-laminne.
Nira ane kuasa ring nerakane lan makuasa ngidupang anake ane suba mati.
Nira suba satya kantos mati.
Nira ajak anake ane satya,
lakar bareng-bareng mamrentah,
sekadi Nira mamrentah sareng Sang Hyang Aji.”
324 Irika pada dane Yohanes mirengin baos saking swarga sapuniki,
325 “Pemrentahan ring gumine,
kakuasain olih Sang Hyang Tunggal lan Sang Prabu sane kapilih olih Ida.
Sang Prabu punika jagi mamrentah salamin-laminne.”
326 Raris Sang Hyang Yesus malih masabda kapining dane Yohanes sapuniki,
327 “Nira bakal enggal teka buin ka jagate.”
328 Raris dane Yohanes matur sapuniki,
329 “Inggih patut.
Rauh ja Sang Hyang Yesus.
Welas asih Sang Hyang Yesus nyarengin anake sami sane satya ring Ida.
Inggih patut.”
Penuntun mabligbagan ring pasamuan:
1. Ngaturang penyuksma.
“Ngiring ja iraga ngaturang suksma mangkin. Semeton jagi ngaturang suksma indik napi?”
2. Ceritayang ja pakeweh semetone suang-suang raris iraga saling tunas icayang.
“Napike semeton wenten pakeweh mangkin?”
3. Ngwacen utawi mirengin paplajahane puniki.
4. Saurin ja pitakenne puniki:
“Napi sane plajahin iraga indik Sang Hyang Tunggal ring ceritane puniki?”
“Napi sane plajahin iraga indik manusa saking ceritane puniki?”
“Sekadi napike sapatutne iraga nyalanang idup manut pengajahane puniki?”
“Kapining sirake sapatutne iraga nyeritayang malih ceritane puniki?”