Sang Prabu Sane Ngrahayuang 25

Dane Paulus ring Kota Epesus

310 Wenten cerita sujati saking indik dane Paulus ring kota Epesus.

311 Risampune ngancan akeh anake pracaya ring Sang Hyang Yesus, kacerita mangkin wenten adiri Sang Hyang Yesus sane mapesengan Paulus. Dane Paulus jagi ngortiang maideh-idehan, Sang Hyang Yesus imanusa saking .

312 Nah kacerita mangkin, dane Paulus rauh ring kota Epesus jagi ngortiang Orti Rahayu indik Sang Hyang Yesus. Ring kotane punika, dane Paulus ngajahin Orti Rahayune kalih tiban suennyane, kantos makasami anake ring kotane punika mirengin indik Sang Hyang Yesus prasida ngrahayuang imanusa.

313 Nah ring kotane punika, Sang Hyang Tunggal akeh makarya paindikan sane ngangobin malantaran dane Paulus. Irika akeh anak sungkan kasegerin. Tur dane Paulus ngulah roh-roh kala saking anake sane kakuasain.

314 Kenten pada, irika wenten papitu balian. Ipun sami okan balian adiri saking anak Ibrani. Kacerita mangkin, para baliane punika ngulah buta kalane saha ngraos sapuniki, 315 “Wake ngulah iba nganggon parab Sang Hyang Yesus, ane kaceritayang olih Paulus.”

316 Nanging buta kalane punika masaur sapuniki, 317 “Sang Hyang Yesus wake nawang. Paulus pada wake nawang. Sakewala nyenke iba?” Irika raris anake sane kakuasain buta kala punika ngalahang makapitu baliane punika. Tur makapitu baliane punika pada matatu tur malaib tanpa mapengangge saking genah anake sane kakuasain buta kala punika.

318 Nah mirengin paindikane punika, anake sane wenten ring kota Epesus pada jejeh. Lan parab Sang Hyang Yesus dados kasub. Anake akeh ngaku lan saking parilaksanannyane sane ugig. Anake sane taen malajahin paindikan sane ugig, ipun munduhang bukun-bukunnyane saha nunjel ring arepan anake akeh. Buku-buku pengajahan ugig sane katunjel punika maaji sawetara samas seket yuta rupiah.

319 Nah krana paindikane punika, sabdan Sang Hyang Yesus ngancan kasub. Lan ngancan ngakehang anake sane pracaya ring Sang Hyang Yesus tur ngrasayang kuasan Idane.

Penuntun mabligbagan ring pasamuan:

1. Ngaturang penyuksma.

“Ngiring ja iraga ngaturang suksma mangkin. Semeton jagi ngaturang suksma indik napi?”

2. Ceritayang ja pakeweh semetone suang-suang raris iraga saling tunas icayang.

“Napike semeton wenten pakeweh mangkin?”

3. Ngwacen utawi mirengin paplajahane puniki.

4. Saurin ja pitakenne puniki:

“Napi sane plajahin iraga indik Sang Hyang Tunggal ring ceritane puniki?”

“Napi sane plajahin iraga indik manusa saking ceritane puniki?”

“Sekadi napike sapatutne iraga nyalanang idup manut pengajahane puniki?”

“Kapining sirake sapatutne iraga nyeritayang malih ceritane puniki?”