Sang Prabu Sane Ngrahayuang 17

Hyang Yesus Nyegerin Anak Sane Karangsukin Buta Kala

208 Wenten cerita sujati saking , indik Hyang Yesus nyegerin anake sane karangsukin buta kala.

209 Risampune Hyang Yesus polih namprat angin linus ageng ring tengah danune, Ida sareng sisian Idane rauh ring sisi kangin danune. Genahe punika nenten ja gumin anak Ibranine. Risampune Hyang Yesus lan para sisiane rauh irika, raris Hyang Yesus kacunduk sareng anak sane karangsukin buta kala. Anake punika karangsukin olih buta kala sane akeh pisan. Ipun setata meneng ring setrane, gelar-gelur, nigtig dewek nganggen batu, tur nenten mapengangge.

210 Raris Hyang Yesus ngandika ring buta kala punika sapuniki, 211 “Magedi ja uli awak anake ento!”

212 Raris anake punika matimpuh lan matur sapuniki, 213 “Sang Hyang Yesus, Putran Sang Hyang Tunggal Sane Agung. Sampunang ja nyiksa titiang!”

214 Rika raris Hyang Yesus mataken ring buta kalane punika, 215 “Nyen ke iba?”

216 Lan buta kala punika masaur, 217 “Titiang ‘Apasukan’ sawireh titiang sareng limang talian akehne.” Kenten pasaur buta kala ring Hyang Yesus.

218 Nah, ring genahe punika, akeh pisan wenten bawi kaangonang olih pangangone. Nah irika buta kalane mapinunas ring Hyang Yesus, matur sapuniki, 219 “Icen ja titiang sami ngrangsukin bawi-bawine punika.” Rika raris Hyang Yesus nagingin pinunas buta kalane punika. Raris buta kala sane wenten ring dewek anake punika pesu, ngrangsukin bawi-bawine sane wenten irika. Lan bawi-bawine punika malaib ring sisin abingane, raris macemplung ring danune. Ring danune punika, bawi-bawine pada mati. Kirang-langkung wenten kalih tali bawi sane mati irika.

220 Nah, para pangangon sane wenten irika, raris matilar nuju kota nyeritayang napi sane kasaksiang. Rika raris akeh anake rauh nyaksiang paindikane punika. Raris nyingakin anake sane karangsukin buta kala sampun kenak tur sampun mapengangge. Raris anake akeh punika jejeh ring Hyang Yesus lan mapinunas mangda Hyang Yesus matilar saking desane punika.

221 Risedek Hyang Yesus munggah ring praune, raris anake sane sampun kenak punika mapinunas mangda ipun prasida ngiring Hyang Yesus. Nanging Hyang Yesus ngandika sapuniki, 222 “Kemu ja mulih ka desan ragane. Ceritayang Sang Hyang Tunggal tekening dewek ragane.”

223 Raris anake punika budal luas nuju desane, nyeritayang napi sane Hyang Yesus icen ring dewek ipune. Lan anake akeh punika pada angob mirengin ceritan ipunne.

Penuntun mabligbagan ring pasamuan:

1. Ngaturang penyuksma.

“Ngiring ja iraga ngaturang suksma mangkin. Semeton jagi ngaturang suksma indik napi?”

2. Ceritayang ja pakeweh semetone suang-suang raris iraga saling tunas icayang.

“Napike semeton wenten pakeweh mangkin?”

3. Ngwacen utawi mirengin paplajahane puniki.

4. Saurin ja pitakenne puniki:

“Napi sane plajahin iraga indik Sang Hyang Tunggal ring ceritane puniki?”

“Napi sane plajahin iraga indik manusa saking ceritane puniki?”

“Sekadi napike sapatutne iraga nyalanang idup manut pengajahane puniki?”

“Kapining sirake sapatutne iraga nyeritayang malih ceritane puniki?”