<<    <     Sang Prabu Sane Ngrahayuang     12     >    >> 
Hyang Yesus Kalukat
149 Wenten cerita sujati saking Cakepan Sucine,
indik Hyang Yesus kalukat.
150 Ritatkala Hyang Yesus mayusa tigang dasa tiban,
irika wenten anak lanang sane mapesengan Yohanes.
Dane Yohanes meneng ring karang embang sane tuh gersang tur adoh saking desa.
151 Nah,
kacerita mangkin,
ring Tukad Yordane,
irika wenten akeh anak Ibrani.
Duk punika dane Yohanes ngajahin anake akeh sekadi puniki,
152 “Wih jero makejang,
masalin ja uli idup ane madosa,
krana Sang Prabu sane kapilih olih Sang Hyang Tunggal jagi gelis rauh mamrentah.”
153 Irika raris anake akeh punika masalin saking urip sane madosa tur nyerahang raga kalukat olih dane Yohanes.
Tur anake akeh punika pada mataken sekadi puniki,
154 “Napike ragane puniki Sang Prabu sane kapilih olih Sang Hyang Tunggal?”
Kenten pitaken anake akeh punika.
155 Raris dane Yohanes masaur sapuniki,
156 “Tiang nglukat ragane nganggen toya.
Nanging Sang Prabu sane jagi rauh punika,
madue kuasa luihan kapining tiang.
Ida jagi nglukat ragane nganggen Roh Sang Hyang Tunggal lan api.”
157 Ritatkala punika,
rauh raris Hyang Yesus mangda kalukat olih dane Yohanes.
Nanging dane Yohanes nenten sadya nglukat Hyang Yesus tur matur sekadi puniki,
158 “Sujatine titiang sane patut kalukat olih Iratu.”
Kenten atur dane Yohanes.
159 Raris Hyang Yesus masaur,
160 “Depang ja majalan buka kene,
mangda pikayunan Sang Hyang Tunggal sane mamargi.”
Raris dane Yohanes nglukat Hyang Yesus.
Ritatkala Hyang Yesus mawetu saking toyane,
langite mabukak.
Roh Sang Hyang Tunggal tedun saking langite punika sekadi paksi dara menceg ring Hyang Yesus.
161 Raris Sang Hyang Tunggal masabda sekadi puniki,
162 “Ene Putran Nirane ane tunggal,
ane Nira sayangin.
Ring Anake ene Nira seneng.”
Penuntun mabligbagan ring pasamuan:
1. Ngaturang penyuksma.
“Ngiring ja iraga ngaturang suksma mangkin. Semeton jagi ngaturang suksma indik napi?”
2. Ceritayang ja pakeweh semetone suang-suang raris iraga saling tunas icayang.
“Napike semeton wenten pakeweh mangkin?”
3. Ngwacen utawi mirengin paplajahane puniki.
4. Saurin ja pitakenne puniki:
“Napi sane plajahin iraga indik Sang Hyang Tunggal ring ceritane puniki?”
“Napi sane plajahin iraga indik manusa saking ceritane puniki?”
“Sekadi napike sapatutne iraga nyalanang idup manut pengajahane puniki?”
“Kapining sirake sapatutne iraga nyeritayang malih ceritane puniki?”