<<    <     Sang Prabu Sane Ngrahayuang     10     >    >> 
Trawangan Indik Sang Prabu Sane Kapilih
133 Wenten cerita sujati saking Cakepan Sucine,
indik trawangan Sang Prabu sane jagi rauh ring jagate.
134 Ring negara anak Ibrani wenten adiri anak lanang,
mapesengan Yesaya.
Dane Yesaya puniki kapilih olih Sang Hyang Tunggal dados sinoman Idane.
Dane Yesaya madue tugas makta pesen saking Sang Hyang Tunggal,
mangda anake akeh masalin saking dosan-dosannyane.
135 Ring dina anu dane Yesaya nerima pesen saking Sang Hyang Tunggal lan nulis sekadi puniki,
136 “Anake akeh sane maurip ring kapetengan jagi masukarena krana galang saking Sang Hyang Tunggal.
Galange punika nenten tios Putra lanang sane jagi dados Sang Prabu.
Pemrentahan Idane patut lan adil,
sane ngicen dame salamin-laminne.
Sang Hyang Tunggal jagi nglaksanayang saluirin paindikane punika krana Ida nyantep.”
137 Kacerita mangkin,
dane Yesaya malih nerima pesen saking Sang Hyang Tunggal lan nulis sekadi puniki,
138 “Putra lanange punika dados parekan Sang Hyang Tunggal sane setata subakti ring Ida.
Yadiastun subakti,
parekane punika akeh nandang sengsara ritatkala nyalanang uripnyane.
Anake akeh nyepekin parekane punika sekadi anak sane tanpa guna.
139 “Yadiastun ipun nenten madue iwang,
ipun kaadilin;
nanging pengadilane punika nenten ja adil.
Yadiastun sekadi punika,
parekane punika mendep sekadi biri-biri sane jagi katampah.
Parekane punika kapademang sinarengan anake sane madosa nanging layon ipune kagenahang ring kuburan anake sane sugih.
140 “Nah,
ukuman sane niben parekane punika mawit saking pikayunan Sang Hyang Tunggal.
Ipun negen ukuman sane sapatutne niben imanusa.
Malantaran parekane punika,
akeh anake kabebasang saking dosan-dosannyane.
Parekane punika kaagungang tur kaagungannyane kaedengang.
Sang Hyang Tunggal jagi ngicen anake akeh dados druen parekane punika.”
141 Kenten trawangan dane Yesayane indik Sang Prabu sane jagi rauh ring jagate.
Penuntun mabligbagan ring pasamuan:
1. Ngaturang penyuksma.
“Ngiring ja iraga ngaturang suksma mangkin. Semeton jagi ngaturang suksma indik napi?”
2. Ceritayang ja pakeweh semetone suang-suang raris iraga saling tunas icayang.
“Napike semeton wenten pakeweh mangkin?”
3. Ngwacen utawi mirengin paplajahane puniki.
4. Saurin ja pitakenne puniki:
“Napi sane plajahin iraga indik Sang Hyang Tunggal ring ceritane puniki?”
“Napi sane plajahin iraga indik manusa saking ceritane puniki?”
“Sekadi napike sapatutne iraga nyalanang idup manut pengajahane puniki?”
“Kapining sirake sapatutne iraga nyeritayang malih ceritane puniki?”