<<    <     Sang Prabu Sane Ngrahayuang     7     >    >> 
Dane Abraham Kauji Olih Sang Hyang Tunggal
88 Wenten cerita sujati saking Cakepan Sucine,
indik Sang Hyang Tunggal nguji dane Abraham.
89 Risampune okan dane Abrahame duur,
irika raris Sang Hyang Tunggal masabda ring dane Abraham sapuniki,
90 “Eh Abraham.”
91 Raris dane Abraham matur “Inggih,
Ratun titiang.”
92 Raris Sang Hyang Tunggal masabda,
93 “Kemu ja cening,
ka gununge ane lakar Nira pitujuhin.
Ajak ja pianak ceninge ane tunggal,
ane cening sayangin.
Aturang ja ia dadi aturan maborbor di gununge ento.”
94 Raris benjang semengane,
dane Abraham nyiapin saluirin kaperluan danene tur mituduhin akalih parekan danene mangda nyarengin dane.
95 Kacerita mangkin,
risampune dane nyingakin gununge punika,
raris dane mabaos ring parekan danene sapuniki,
96 “Ngoyong ja ragane dini.
Tiang ngajak pianak tiange bakal kemu ka gununge ento,
ngaturang bakti ring Sang Hyang Tunggal.
Disubane keto tiang bakal mabalik buin mai ajak pianak tiange.”
97 Nah raris dane Abraham lan okan danene mamargi nuju gununge punika.
Ring tengahin margi,
okan danene matur sapuniki,
98 “Api lan saang sampun wenten.
Ring dijake panak biri-birine?”
99 Raris dane Abraham nyaurin,
100 “Sang Hyang Tunggal jagi nyadyayang.”
101 Nah kacerita mangkin,
dane Abraham sampun wenten ring gununge punika.
Irika dane nyujukang tugu nganggen batu,
kadagingin saang ring duur tugune punika.
Raris dane negul okan danene ring duur saange punika saha ngambil tiuk jagi ngorok okan danene.
Jeg saget malekat Sang Hyang Tunggal masabda sapuniki,
102 “Wih Abraham,
eda ja kudiang-kudianga pianak ceninge ento.”
103 Irika dane Abraham nyingak wenten biri-biri nyangket ring bet-bete.
Raris dane ngejuk biri-birine punika tur ngaturang ring tugune,
dados pasilur okan danene.
Raris dane ngadanin genahe punika “Sang Hyang Tunggal nyadyayang.”
104 Nah irika raris malekate punika malih masabda sapuniki,
105 “Sawireh cening satya kapining Nira,
jani Nira bakal nglaksanayang sekancan semayan Nirane.
Nira bakal nadiang cening bangsa ane gede.
Turmaning uling cening,
Nira bakal ngamaang wara nugraha sid saluirin bangsa di jagate.”
Penuntun mabligbagan ring pasamuan:
1. Ngaturang penyuksma.
“Ngiring ja iraga ngaturang suksma mangkin. Semeton jagi ngaturang suksma indik napi?”
2. Ceritayang ja pakeweh semetone suang-suang raris iraga saling tunas icayang.
“Napike semeton wenten pakeweh mangkin?”
3. Ngwacen utawi mirengin paplajahane puniki.
4. Saurin ja pitakenne puniki:
“Napi sane plajahin iraga indik Sang Hyang Tunggal ring ceritane puniki?”
“Napi sane plajahin iraga indik manusa saking ceritane puniki?”
“Sekadi napike sapatutne iraga nyalanang idup manut pengajahane puniki?”
“Kapining sirake sapatutne iraga nyeritayang malih ceritane puniki?”