Sang Prabu Sane Ngrahayuang 5

I Kain lan I Abel

55 Wenten cerita sujati saking indik I Kain lan I Abel.

56 Risampune Adam sareng rabine puniki katundung saking taman Eden, ipun madue oka kalih, sane mapesengan I Kain lan I Abel. Geginan ipune makakalih inggih punika: I Kain puniki dados petani lan I Abel puniki dados pengangon.

57 Kacerita mangkin, I Kain ngaturang aturan ipune aparo marupa palewija ring ajeng . Kenten pada I Abel puniki ngaturang inggih punika makudang panak biri-biri sane lekad simalu. Ipun ngaturang aparo sane paling luih ring ajeng Sang Hyang Tunggal. Ring aturan I Abele, Sang Hyang Tunggal seneng. Nanging ring aturan I Kaine, Sang Hyang Tunggal nenten seneng. Punika mawinan I Kain puniki mamedih.

58 Raris Sang Hyang Tunggal masabda ring I Kain sekadi puniki, 59 “Wih Kain, nguda semun ceninge ucem? Yening cening malaksana ane patut, pastika cening katerima. Nanging yening cening tetep malaksana ane jaat, bakal nguasin cening. Lawan ja dosane ento!”

60 Nah kacerita mangkin, raris I Kain puniki ngajak I Abel adin ipune luas ka tegale. Risampune rauh ring tegale punika, jeg saget I Kain puniki nyagurin adin ipune, kantos padem.

61 Risampune I Abel puniki padem, raris masabda Sang Hyang Tunggal sekadi puniki, 62 “Wih Kain, dijake adin ceninge?”

63 Raris I Kain matur sekadi puniki, 64 “Titiang nenten uning. Titiang boya ja pengempon adin titiange.”

65 Raris Sang Hyang Tunggal masabda sekadi puniki, 66 “Nguda cening malaksana ane jaat? Getih adin ceninge maura di tanahe. To pinaka bukti cening malaksana ane jaat.” Irika raris Sang Hyang Tunggal mastu I Kain sekadi puniki, 67 “Sujatine tanahe ene tusing ja bakal ngamaang cening asil ane sapatutne. Cening bakal ngumbang kemu mai.”

68 Irika raris Kain puniki matur ring Sang Hyang Tunggal, 69 “Duh Ratu! Ukuman titiange punika kalintang baat. Samaliha yening wenten anak sane kacunduk sareng titiang, pastika titiang jagi kapademang.”

70 Raris Sang Hyang Tunggal masabda, 71 “Tusing ja ada anak ane bakal ngamatiang cening. Yen ada anak ane bakal ngamatiang cening, Nira bakal ngwales kanti ping pitu lipet.”

72 Raris Sang Hyang Tunggal ngicen tanda ring I Kain mangda anake sane kacunduk sareng I Kain, nenten wenten sane bani ngamademang. Raris, I Kain matilar saking genahe punika luas nganginang, ngadohang raga saking ajeng Sang Hyang Tunggal.

Penuntun mabligbagan ring pasamuan:

1. Ngaturang penyuksma.

“Ngiring ja iraga ngaturang suksma mangkin. Semeton jagi ngaturang suksma indik napi?”

2. Ceritayang ja pakeweh semetone suang-suang raris iraga saling tunas icayang.

“Napike semeton wenten pakeweh mangkin?”

3. Ngwacen utawi mirengin paplajahane puniki.

4. Saurin ja pitakenne puniki:

“Napi sane plajahin iraga indik Sang Hyang Tunggal ring ceritane puniki?”

“Napi sane plajahin iraga indik manusa saking ceritane puniki?”

“Sekadi napike sapatutne iraga nyalanang idup manut pengajahane puniki?”

“Kapining sirake sapatutne iraga nyeritayang malih ceritane puniki?”