Kautamaan Kapracayaan
11:1—12:29
Kasaksian Indik Para Leluhur sane Pracaya
11
Pracaya kapining Sang Hyang Pengardi, artine yakti-yakti pracaya ring napi sane antosang iraga, turmaning pageh pracaya ring napi sane dereng cingakin iraga. 2 Krana pracaya, para leluhur iragane kasenengin olih Sang Hyang Pengardi.3 Krana pracaya, iraga uning yening jagate miwah saluirin sane wenten kakaryanin olih Sang Hyang Pengardi nganggen sabdan Idane kamanten. Punika mawinan iraga uning napi sane cingakin iraga mangkin kaciptayang saking sane nenten kacingak.
4 Krana pracaya, dane Habel ngaturang aturan sane luihan bandingang aturane dane Kain. Kenten pada krana pracaya, dane Habel kaucap anak sane dharma ring ajeng Sang Hyang Pengardine, tur Ida nerima aturan danene. Tur ulian kapracayaan danene punika, dane kari dados conto, yadiastun dane sampun padem.
5 Krana pracaya, dane Henok kaangkat ka swarga olih Sang Hyang Pengardi mangda dane nenten nandang padem. Punika mawinan dane nenten kapanggihin malih.a Sadereng Sang Hyang Pengardi ngangkat dane, Ida ngandika indik dane Henok punika anak sane nyenengin Ida. 6 Nanging anake sane nenten pracaya kapining Sang Hyang Pengardi, pastika nenten prasida nyenengin manah Idane. Krana sapa sira ja sane nampekin Ida, ipun musti pracaya yening Ida yakti wenten. Turmaning ipun musti pracaya yening Ida jagi ngwales anake sane yakti-yakti ngrereh Ida.
7 Krana pracaya, ritatkala dane Nuh kanikain paindikan sane jagi mamargi, dane ninutin prentah Sang Hyang Pengardi. Ida nikain dane makarya kapal sane ageng krana jagi wenten blabar ageng. Malantaran dane makarya kapal punika, dane nylametang kaluargannyane. Krana pracaya, dane muktiang indik manusane ring gumine puniki kalintang jaat tur pantes kaukum. Kenten pada dane Nuh punika kaucap anak patut ring ajeng Sang Hyang Pengardine.
8 Krana pracaya, risedek dane kapanggil mangda matilar, dane Abraham satinut kapining Sang Hyang Pengardi. Ida nikain dane luas ka genah sane jagi dados druen sentanan danene. Raris dane luas manut prentah Sang Hyang Pengardine, yadiastun dane dereng uning kijake dane jagi luas. 9 Krana pracaya, dane meneng dados tamiu ring negeri sane kajanjiang punika. Dane sareng Isak, okan danene, lan Yakub, cucun danene, dados pawaris janjin Sang Hyang Pengardine punika. Duk punika, dane sami meneng ring tenda-tendane. 10 Duaning dane nyantosang kota ring swarga sane karencanayang lan kawangun olih Sang Hyang Pengardi nganggen dasar sane kukuh.
11 Krana pracaya, dane Abraham sane sampun lingsir pisan punika polih oka sareng dane Sara, inggih punika rabin danene sane bekung. Krana dane pracaya indik Sang Hyang Pengardi jagi satya kapining janjin Idane. 12 Dane Abraham sampun kalintang lingsir kantos nenten mresidayang ngamolihang sentana, nanging pamuputne dane sida polih sentana sane akehne sekadi bintang ring langite lan bias ring sisin pasihe.
13 Makasami anake sane kanikayang punika tetep pracaya kantos padem. Ipun sami nenten nerima paindikan sane kajanjiang olih Sang Hyang Pengardi punika, nanging ipun tetep nyantosang antuk manah sane seneng. Ipun ngaku dewek ipune wantah krama tamiu ring jagate puniki. 14 Risedek ipun ngamaosang sekadi punika, ipun sami muktiang yening ipun sedek ngrereh negeri sane jagi dados druen ipune praragan. 15 Sane pinehang ipun nenten ja negeri sane kalaina. Yening sekadi punika, pastika ipun akeh madue galah buat mawali mrika. 16 Nanging ipun meled kapining negeri sane luihan, sane ring swarga. Punika mawinan Sang Hyang Pengardi nenten ja kimud kaakuin dados Sasembahan krama druen Idane. Paindikane punika kabuktiang ritatkala Ida nyadyayang kota buat ipun sami.
17-19 Krana pracaya, dane Abraham setata kukuh ngisiang janjin Sang Hyang Pengardi sapuniki, “Uling Isak, cening bakal maan sentana buka ane janjiang Nira.” Purwakaning Dadi 12:12. Krana pracaya, dane Abraham satinut ritatkala kauji olih Sang Hyang Pengardi. Saking paindikane punika, iraga uning dane Abraham pracaya yening Sang Hyang Pengardi mresidayang nguripin malih dane Isak saking padem. Dane Abraham kaprentahang ngaturang okan danene sane tunggal punika ring Sang Hyang Pengardi. Dane misadya satinut ring Sang Hyang Pengardi yadiastun pamuputne Ida nyadyayang biri-biri sane ngantinin Isak. Sekadi punika, dane Abraham prasida kasambat nerima Isak mawali saking padem.
20 Krana pracaya, dane Isak nyanjiang pica sane jagi katerima olih makakalih okan danene, inggih punika dane Yakub lan dane Esau.
21 Krana pracaya, sadereng dane Yakub padem, dane nunas icayang makakalih okan dane Yusup. Tur dane nyembah Sang Hyang Pengardi sambilanga nyleleg ring muncuk tungked danene.
22 Krana pracaya, sadereng dane Yusup padem, dane nyeritayang indik Bangsa Yahudine jagi matilar saking Negeri Mesir. Tur dane mabesen mangda tulang-tulang danene taler kabakta ka negeri sane kajanjiang punika.
23 Krana pracaya, sasampune dane Musa lekad, reraman danene ngengkebang dane kantos tigang bulan. Ipun malaksana sekadi punika krana nyingakin anake alit punika bagus pisan, tur ipun nenten jejeh nglawan prentah raja Mesire mangda alit-alit lanang Bangsa Yahudine kapademang.
24 Krana pracaya, sasampune dane Musa kelih, dane nulak kanikayang dados okan putri raja Mesireb. 25 Dane lebih milih kanistayang sareng krama druen Sang Hyang Pengardi, bandingang kapining kaliangan ajebos ulian urip sane madosa. 26 Dane mapineh luihan kanistayang krana satya kapining Sang Prabu Sane Jagi Rauh, bandingang kicen kasugihan ring Mesir. Sekadi punika dane Musa nyantosang upah saking Sang Hyang Pengardi.
27 Krana pracaya, dane Musa matilar saking Mesir, tanpa rasa jejeh yening raja Mesire duka kapining dane. Dane tetep sabar sekadi dane sampun nyingakin Sang Hyang Pengardi sane nenten prasida kacingak punika.
28 Krana pracaya, dane Musa nglaksanayang upacara Paskah sane kapertama. Duk punika dane nikain anak Yahudine mangda ngetisin rah biri-biri ring korin umah ipune suang-suang. Tatujone mangda para pianak kapertama Bangsa Yahudine nenten kapademang olih malekat sane kautus olih Sang Hyang Pengardi. Malekate punika jagi ngamademang sebilang pianak kapertama sane ring Mesir.
29 Krana pracaya, bangsa Yahudine sampun ngliwatin Segara Barak sekadi mamargi ring tanah tuh krana Sang Hyang Pengardi nyibak segarane irika. Nanging para tentara Mesire kelem ritatkala ipun sami nguber anak Yahudine ngliwatin segarane punika.
30 Krana pracaya, tembok-tembok Kota Yerikone runtuh sasampune Bangsa Yahudine ngiterin kotane punika kantos pitung dina suene.
31 Krana pracaya, Rahab, anak istri sane asusila, nerima makakalih mata-mata anak Yahudine ring umahnyane antuk dame. Punika mawinan ipun nenten kapademang sareng anak Yeriko lianan sane nungkasin Sang Hyang Pengardi.
32 Sujatine akeh malih paindikan sane prasida ceritayang tiang! Nanging nenten ja genep galahe buat nyeritayang indik dane Gideon, dane Barak, dane Simson, dane Yepta, Raja Daud, dane Samuel, lan para sinoman Sang Hyang Pengardi. 33 Krana pracaya, ipun sami sampun ngalahang karajaan-karajaan, malaksana sane patut, tur nerima sane kajanjiang olih Sang Hyang Pengardi. Wenten pada sane madue kapracayaan kantos bungut singa-singane ngepc, 34 lan sida ngamademang geni sane ageng, tur slamet saking kapademang nganggen pedang. Ritatkala ipun lemet, ipun nerima kakuatan; ipun kukuh maperang sane mawinan ipun sida ngalahang tentara bangsa lianan. 35 Para istri ngamolihang malih para anake sane sampun padem, krana kauripang malih. Nanging wenten sane lianan sane siaga kasiksa tur nenten kayun kabebasang. Tatujone mangdane, sasampune padem, ipun kauripang malih tur polih urip sane luihan. 36 Wenten pada sane kanistayang, kapecutin tur kategul nganggen rante saha kakrangkeng. 37 Wenten sane katimpugin nganggen batu kantos padem, kagergaji, lan kapademang nganggen pedang. Ipun sami luntang-lantung saha mapengangge kulit biri-biri wiadin kulit kambing; ipun tiwas, kasiksa, lan keras kasengsarain. 38 Gumine sane jaat puniki nenten pantes buat ipun sami. Ipun luntang-lantung ring genah sane bengang linggah lan ring pegunungan, ring gua-guane miwah ring tanahe sane wenten bangbang. 39 Krana pracaya, ipun sami kasenengin olih Sang Hyang Pengardi. Nanging ipun dereng nerima janjin Sang Hyang Pengardine ring jagate puniki 40 krana Ida madue rencana sane lebih becik buat iraga. Sekadi puniki rencanan Idane: ipun sami jagi kasempurnayang sareng-sareng iraga sane dados kraman Sang Hyang Pengardine.