Aturan sane Sempurna
10
Ukum agama Yahudine boya ja paindikan becik sane jagi rauh, nanging wantah sekadi pelawatan indik paindikan becik punika. Manut ukume punika anake musti ngaturang aturan beburon sane pateh sebilang atiban. Sujatine, anake sane nyembah Sang Hyang Pengardi nenten ja mresidayang dados sempurna nganggen aturan sekadi punika. 2 Yening ipun yakti kasuciang krana mabakti sekadi punika, ipun nenten ja jagi madue rasa madosa, lan aturane punika nenten ja kaperluang malih. 3 Nanging makasami aturan sane kaaturang sebilang atiban punika wantah painget indik dosan-dosannyane kamanten. 4 Krana aturan sane marupa rah lembu muani wiadin rah kambing muani nenten pisan sida ngranayang dosa ical.5 Punika mawinan ritatkala Sang Hyang Kristus rauh ka jagate, Ida ngandika ring Sang Hyang Pengardi sapuniki,
“Iratu nenten kayun kapining aturan marupa beburon lan aturan lianan;
nanging Iratu sampun nyadyayang angga buat Titiang.
6 Iratu nenten seneng kapining aturan marupa beburon maborbor
utawi aturan buat nyuciang anake saking dosannyane.
7 Raris Titiang matur, ‘Niki Titiang duh Sang Hyang Pengardi!
Titiang rauh buat nglaksanayang pikayunan Iratune,
sekadi sane katulis indik Titiang ring Cakepan Sucine.’” Kidung 40:7-9
8 Ring paindikane sane iwawu Sang Hyang Kristus ngandika, “Iratu nenten kayun kapining aturan marupa beburon lan aturan lianan; Iratu nenten seneng kapining aturan marupa beburon maborbor utawi aturan buat nyuciang anake saking dosa.” Sang Hyang Kristus ngandika sekadi punika yadiastun makasami aturan sane kaaturang punika manut ukum agama Yahudine. 9 Sasampune kenten Sang Hyang Kristus ngandika sapuniki, “Niki Titiang duh Sang Hyang Pengardi! Titiang rauh buat nglaksanayang pikayunan Iratune.” Sane mangkin Sang Hyang Kristus muputang aturan sane kapertama punika; Ida sampun ngantinin antuk ngaturang anggan Idane praragan. 10 Sang Hyang Yesus Kristus sampun ngaturang anggan Idane manut pikayunan Sang Hyang Pengardi. Krana anggan Idane kaaturang sekadi punika apisan kamanten buat salamin-laminne, punika mawinan iraga kasuciang saking dosan-dosan iragane.
11 Para rsi agama Yahudine sadina-dina nyalanang tugas rsi, lan setata nyumunin makarya aturan sane pateh, inggih punika aturan beburon sane maborbor. Nanging aturane punika nenten pisan mresidayang ngranayang dosa ical. 12 Nanging Sang Hyang Kristus ngaturang aturan wantah asiki mangda ngampurayang dosa, tur aturane punika kangge buat salamin-laminne. Sasampune kenten, Ida malinggih ring kenawan Sang Hyang Pengardi. 13 Sane mangkin Sang Hyang Kristus nyantosang kantos para musuh Idane kagenahang ring cokor Idane. 14 Krana malantaran aturan asiki sekadi punika, Ida sampun nadosang anake sempurna salamin-laminne, inggih punika anake sane kasuciang saking dosan-dosannyane.
15 Roh Sang Hyang Pengardi pada ngicen kasaksian kapining iraga indik paindikane punika. Rohe punika masabda sapuniki,
16 “Prajanjiane ane bakal karyanin Nira teken bangsa Yahudine
di dinane ane bakal teka buka kene,
Nira bakal ngejang ukum Nirane di kenehne,
tur nulis ukum Nirane di papinehne.” Yeremia 31:33
17 Roh Sang Hyang Pengardi pada ngandika sapuniki,
“Dosan-dosannyane lan kapelihannyane
tusing bakal buin ingetin Nira.” Yeremia 31:34
18 Nah sane mangkin yening dosan-dosanne punika sampun kaampurayang, nenten perlu malih aturan marupa beburon maborbor buat pengampuran dosa.
Nampekin Raga ring Sang Hyang Pengardi
19 Duh para semeton sami, malantaran rah Sang Hyang Yesuse punika, iraga wanen ngranjing ring Rong Maha Sucine. 20 Iraga mresidayang ngranjing irika krana Sang Hyang Yesus sampun makarya margi sane anyar. Margine punika ngicen urip salamin-laminne krana sampun ngliwatin langse wates Rong Maha Sucine. Anggan Sang Hyang Yesuse sane kaumpamiang langsene punika. 21 Kenten pada iraga madue Rsi Penglingsir Agung sane dados pemimpin ring genah suci sane sujati. 22 Punika mawinan, ngiring ja iraga mangkin nampekin Sang Hyang Pengardi antuk manah sane tulus lan kapracayaan sane kukuh. Krana unteng manah iragane sampun kasuciang saking rasa madosa, turmaning ragan iragane sampun kasuciang nganggen toya sane murni. 23 Ngiring ja iraga kukuh ngisiang napi sane akuin iraga, inggih punika napi sane antosang iraga, krana Sang Hyang Pengardi sane majanji punika satya kapining janjin Idane. 24 Turmaning, ngiring ja iraga saling ingetin mangda iraga saling tresnain tur nglaksanayang pakaryan sane becik. 25 Sampunang ja iraga ngadohang raga saking pasamuan para kramane, sekadi sane kalaksanayang olih makudang anak. Nanging ngiring ja iraga saling tuturin, mangdane setata seleg mapunduh turmaning ngancan saat mapunduh krana dina sapengrauh Sang Ratu Agung sampun nampek.
26 Umpamane iraga nyelapang madosa sasampune uning napi sane patut saking Sang Hyang Pengardi, nenten ja wenten malih aturan lianan buat pengampuran dosane punika. 27 Nanging anake sane maurip sekadi punika marasa jejeh nyantosang pengadilan saking Sang Hyang Pengardi lan geni sane morbor tur ngranayang puun anake sane nungkasin Ida. 28 Ingetang ja, anake sane nenten satinut kapining ukum sane kicen olih dane Musa idumun, nenten polih pengampuran. Nanging ipun kaukum padem kadasarin antuk kalih utawi tigang diri saksi. 29 Napi malih anake sane nyekjek Putran Sang Hyang Pengardine! Pastika anake punika nerima ukuman sane abotan! Ipun nenten ngajiang rah sane ngesahang Prajanjian Anyar saking Sang Hyang Pengardi, inggih punika rah sane prasida nyuciang ipun saking dosan-dosannyane. Lan ipun nganistayang Roh Idane sane ngicen wara nugraha kapining iraga. 30 Iraga uning Sang Hyang Pengardi ngandika sapuniki, “Nira bakal ngwales! Nira bakal ngukum!” Pengeling-eling 32:35\rq* Malih Ida ngandika sapuniki, “Sang Hyang Pengardi jagi ngakimin panjak Idane.” \rq Pengeling-eling 32:36 31 Amatke jejehne yening iraga nyekjek Putran Sang Hyang Pengardine krana iraga wenten ring kuasan Sang Hyang Pengardi sane urip.
32 Nanging ingetang ja indik idumun, ritatkala Sang Hyang Pengardi wawu ngedengang galang Idane kapining ragane. Irika ragane setata pageh, yadiastun ragane nanggung pakeweh sane abot krana nandang sengsara. 33 Wenten saking ragane sane kanistayang tur kasiksa ring arepan anake akeh. Wenten pada sane kanistayang krana nyarengin anake sane kasiksa. 34 Ragane pada sareng ngrasayang sengsara krana wenten semeton ragane sane kakrangkeng ring buine. Kenten pada ritatkala arta brana ragane kaambil, ragane tetep masukarena. Ragane masukarena krana ragane uning indik ragane madue arta sane lebih becik tur langgeng.
35 Punika mawinan selegang ja ngisiang kapracayaan ragane, krana ageng pisan pikolihne. 36 Ragane perlu sabar mangdane sida nglaksanayang prentah Sang Hyang Pengardi. Yening kenten, ragane jagi nerima pikolih sane kajanjiang punika. 37 Krana ring Cakepan Sucine katulis sapuniki,
“Wantah malih ajebos pisan,
Ida sane jagi rauh punika jagi gelis rauh;
Sapengrauh Idane nenten jagi kasep.
38 Panjak Nirane sane patut jagi maurip
krana pracaya kapining Nira.
Nanging Nira nenten ja seneng yening ipun makirig.” Habakuk 2:3-4
39 Nanging iraga boya ja krama sane makirig saking Sang Hyang Yesus raris kaenyagang. Iraga puniki nenten tios krama sane pracaya tur kaslametang.