Kaagungan Sang Hyang Kristus
9:1—10:39
Tata Cara Mabakti ring Tenda Suci
9
Mangda aluh ngertiang daging cakepane, penyalin ngimbuhin catetan puniki: Tenda Suci Mabaktine inggih punika genah mabakti anak Yahudi sasampune ipun sami medal saking Negeri Mesir. Tenda Suci punika kakaryanin manut sekadi prentah Sang Hyang Tunggal kapining dane Musa. Tenda Suci punika ageng pisan, malakar aji kulit beburon lan kain, tur madaging sekancan prabot suci irika. Tenda Suci punika dados genah mabakti krana anak Yahudi sesai makisid-kisid meneng. Sasampune anak Yahudi meneng ring negeri sane kajanjiang, ipun sami ngwangun Genah Agung Mabakti sane tetep ring Kota Yerusalem.1 Prajanjian sane kapertama punika madaging awig-awig indik mabakti kapining Sang Hyang Pengardi tur indik Tenda Suci Mabakti ring jagate puniki sane kakaryanin olih tangan manusa. 2 Ring Tenda Sucine punika kajujukang kalih rong. Rong sane ring arep kawastanin Rong Suci: irika wenten tegakan lampu lan meja sane madaging roti sane kasajiang buat Sang Hyang Pengardi. 3 Salanturnyane, ring ungkur langse sane kakalih, wenten rong sane kawastanin Rong Maha Suci. 4 Irika wenten meja tugu genah ngenyitin menyan. Lan wenten pada peti prajanjian sane kasepuh aji emas. Ring tengah petine punika wenten prabot minakadi: mangkok emas madaging roti sane madan “roti mana”, tungked dane Harun sane taen mentik pucuka, miwah kalih batu lempeh sane madaging tulisan dasa prentah sane dados bukti prajanjian sane lawas saking Sang Hyang Pengardi. 5 Ring duur petine punika wenten kalih arca malekat makampid sane ngambarang kaagungan Sang Hyang Pengardine. Kampid arcane punika kebah ring duur panekep petine, inggih punika genah pengampuran dosa. Nanging makasamine punika dereng ngilis kaortiang mangkin.
6 Sekadi punika Tenda Suci Mabaktine kadabdabang. Tur sebilang dina para rsine ngranjing ring Rong Sucine buat ngaturang bakti. 7 Nanging ring Rong Maha Sucine, wantah Rsi Penglingsir Agung kamanten sane dados ngranjing. Tur dane wantah ngranjing sebilang tiban apisan kamanten. Ritatkala dane ngranjing, dane musti makta rah beburon, mangda dados aturan buat dosa-dosa sane nenten jelapang dane lan para kramane. 8 Malantaran awig-awig ngranjing punika, Roh Sang Hyang Pengardi ngilis pisan ngedengang yening margi buat ngranjing ring Rong Maha Sucine sane ring swarga dereng kabukak. Margine punika dereng kabukak saenune Tenda Suci punika kari wenten. 9 Paindikane punika satmaka gambaran jamane mangkin. Para rsine mabakti kapining Sang Hyang Pengardi manut awig-awig prajanjian sane lawas. Aturan beburon miwah sane lianan nenten ja mresidayang nyuciang unteng manah anake sane mabakti. 10 Krana makasami upacarane punika wantah indik ajeng-ajengan, inuman lan sekancan upacara pabersihan. Makasamine punika wantah maguna buat paindikan sekala kamanten kantos galahe Sang Hyang Pengardi micayang margi sane anyar.
Pakaryan Sang Hyang Kristus ring Swarga
Mangda aluh ngertiang daging cakepane, penyalin ngimbuhin catetan puniki indik aturan: Manut cakepan Prajanjian Lawas, Sang Hyang Tunggal mrentahang makudang aturan. Wenten tiga sane utama mangda iraga prasida ngresepang cakepane puniki. Sane kapertama, aturan kapining Sang Hyang Tunggal kaanggen mangda ngesahang Prajanjian Lawas. Sane kaping kalih, aturan buat nyuciang prabotan ring Tenda Sucine nganggen rah beburon. Kenten pada wenten aturan beburon buat pengampuran dosa sane kaaturang sebilang tiban apisan.
11 Nanging Sang Hyang Kristus punika sampun rauh dados Rsi Penglingsir Agung mangda ngurus paindikan-paindikan becik sane sampun wenten. Ida sampun ngranjing ring Tenda Suci Mabaktine sane agengan lan lebih sempurna punika. Tenda Sucine punika nenten ja kawangun olih tangan manusa, turmaning nenten ja mawit saking jagate puniki. 12 Sang Hyang Kristus ngranjing ring Rong Maha Sucine wantah apisan buat salamin-laminne. Ida ngranjing nenten ja nganggen rah panak lembu wiadin panak kambing, nanging nganggen rah Idane praragan. Sekadi punika Ida mebasang iraga buat salamin-laminne. 13 Rah kambing wiadin lembu muani lan aon saking aturan panak lembu sane maborbor punika, kaanggen ngetisin anake sane cemer. Anake sane sareng-sareng irika wantah kabersihin ring sekala kamanten. 14 Amatke ageng gunane rah Sang Hyang Kristus! Malantaran Roh Sang Hyang Pengardi sane langgeng, Sang Hyang Kristus sane kajanjiang punika nyerahang anggan Idane dados aturan sane sempurna ring ajeng Sang Hyang Pengardine. Rah Idane nyuciang unteng manah iraga saking upacara sane nenten maguna, mangdane iraga prasida ngayah ring Sang Hyang Pengardi sane urip.
15 Punika mawinan Sang Hyang Kristus dados titi buat ngesahang prajanjian sane anyar. Mangkin anake sane kapanggil olih Sang Hyang Pengardi prasida nerima pica sane langgeng sane kajanjiang idumun. Makasamine punika prasida mamargi krana Sang Hyang Kristus seda. Tatujone mangda mebasang manusane saking dosa sane kalaksanayang ritatkala prajanjian sane lawas kari kaanggen.
16 Prajanjiane punika kaumpamiang sekadi surat wasiatb. Musti wenten bukti indik anake sane makarya surate punika sampun padem. 17 Krana surate nenten ja sah yening anake sane makarya surate punika kari maurip. Surate wantah sah yening anake sane makarya surate punika sampun padem. 18 Punika mawinan prajanjian sane lawas dados sah nganggen rah. 19 Krana sasampun dane Musa nikayang sekancan prentah saking ukum agama Yahudine ring saluirin Bangsa Yahudine, dane raris ngambil rah panak lembu miwah rah kambing tur toya. Raris dane makarya pengetisan nganggen benang wol barak sane mategul nganggen entikan hisop. Raris dane ngetisin cakepan prajanjian lawase miwah saluirin kramane. 20 Tur dane Musa mabaos sapuniki, “Rah puniki dados tanda indik prajanjian Sang Hyang Pengardi sampun sah; iraga musti ninutin.” 21 Nganggen cara sane pateh sekadi iwawu, dane Musa pada ngetisin rah punika ring Tenda Sucine lan ring saluirin prabotane. 22 Yakti manut ukum agama Yahudine akehan paindikane kasuciang nganggen rah. Tur dosa prasida kaampurayang wantah nganggen rah sane kabriokangc.
23 Sekadi punika makasami prabot sekala sane ngambarang prabot swarga musti kasuciang. Nanging prabotan sane sujati ring swarga ngamerluang aturan sane agengan. 24 Sang Hyang Kristus nenten ja ngranjing ring Rong Suci pakaryan manusa, sane wantah ngambarang Rong Suci sane sujati. Nanging Ida ngranjing ka swarga ka Rong Suci sane sujati; mangkin Ida tangkil ring ajeng Sang Hyang Pengardine mangda nulungin iraga. 25 Rsi Penglingsir Agung sebilang tiban ngranjing ring Tenda Sucine, nenten makta rah danene praragan. Nanging Sang Hyang Kristus nenten sering ngranjing buat ngaturang rah Idane. 26 Yening Ida sering ngaturang rah Idane praragan, artine saking pengawit jagate kaciptayang Ida musti sering nanggung sengsara. Nanging sane mangkin duk pamuput jamane, Ida rauh ka jagate puniki apisan kamanten mangda nanggung dosa malantaran ngaturang anggan Idane praragan. 27 Sang Hyang Pengardi sampun mastiang manusane jagi padem wantah apisan kamanten tur sasampune kenten ipun jagi kaadilin. 28 Sekadi punika Sang Hyang Kristus punika wantah apisan kamanten dados aturan mangda nebus dosan anake akeh. Tur Ida jagi rauh malih sane kaping kalihne, nenten ja mangda nebus dosa, nanging mangda ngrahayuang anake sane nyantosang Ida.