Rsi Penglingsir Agung sane Anyar
8
Mangda aluh ngertiang daging cakepane, penyalin ngimbuhin catetan puniki: Prajanjian Lawas inggih punika prajanjian sane kicen olih Sang Hyang Tunggal kapining Bangsa Yahudine idumun. Dane Abraham sane kapertama nerima prajanjiane punika. Salanturnyane, prajanjiane punika dados ngilis ritatkala dane Musa nerima ukum agama saking Sang Hyang Tunggal. Duk punika, para kraman Sang Hyang Pengardine, inggih punika anak Yahudi, masemaya jagi ninutin prentah-prentah Idane.1 Sane mautama ring babaosan tiange sami inggih punika, iraga madue Rsi Penglingsir Agung sane sempurna sekadi punika. Ida malinggih mamrentah sareng Sang Hyang Pengardi sane Maha Luhur ring swarga. 2 Rsi Penglingsir Agung punika ngayah ring genah sane suci, inggih punika ring Tenda Suci Mabakti sane sujati. Sang Hyang Pengardi praragan sane ngaryanin genahe punika tur nenten ja manusa.
3 Krana sebilang Rsi Penglingsir Agunge saking soroh Lewi kaangkat mangda ngaturang aturan marupa beburon miwah aturan lianan kapining Sang Hyang Pengardi. Kenten pada Rsi Penglingsir Agung iragane musti madue aturan buat kaaturang kapining Sang Hyang Pengardi. 4 Umpamane Sang Hyang Yesus kari ring jagate puniki, Ida nenten ja kaangkat dados rsi. Krana sampun wenten garis sentanan rsi saking soroh Lewi sane ngaturang aturan manut ukum agama Yahudine. 5 Rsine punika wantah ngayah ring genah sucine sane ring jagate puniki. Puniki wantah gambaran miwah pelawatan indik ngayah ring genah suci sane wenten ring swarga.a Punika mawinan dane Musa idumun kanikain olih Sang Hyang Pengardi ritatkala makarya Tenda Sucine sapuniki, “Ingetang ja, apanga makejang kagae buka conto ane suba edengang Nira tatkala di bukite.” Pararudan 25:40 6 Nanging mangkin Sang Hyang Yesus nglaksanayang ayah-ayahan sane lebih agung bandingang kapining rsi ring jagate puniki. Ayah-ayahane punika lebih agung krana Ida praragan dados titi prajanjian sane luihan bandingang prajanjian sane lawas, krana madasar antuk janji sane luihan.
7 Umpamane prajanjian sane lawas nenten wenten kirang, pastika nenten perlu malih ngrereh prajanjian sane lianan. 8 Nanging Sang Hyang Pengardi manggihin kaiwangan ring panjak Idane. Punika mawinan Ida ngandika sapuniki,
“Sujatine bakal teka galahe,
Nira bakal ngae prajanjian ane anyar teken saluirin sentanan dane Israele, tusing ada len soroh Israel ajak soroh Yehuda.
9 Tusing buka prajanjian ane karyanin Nira buat leluhur iane makejang di Gunung Sinai
tatkala Nira ngisiang liman iane tur nuntun ia pesu uli Negeri Mesir.
Ia tusing satya tekening prajanjian ane picayang Nira.
Ento mawinan Nira tusing ngrunguang ia makejang.
10 Prajanjian ane bakal karyanin Nira teken Bangsa Israele
di dinane ane bakal teka buka kene,
Nira bakal ngejang ukum Nirane di papinehne,
tur nulis ukum Nirane di kenehne.
Nira bakal dadi Sasembahan iane,
lan ia bakal dadi krama druen Nirane.
11 Ia tusing bakal perlu ngajahin nyamane miwah warga ane lenan apanga nawang Sang Hyang Tunggal.
Krana ia ajak makejang, jaba miwah menak, bakal nawang Nira.
12 Nira bakal ngampurayang kapelihan iane antuk welas asih Nirane sane ageng
lan tusing buin bakal ngingetang dosan-dosan iane.” Yeremia 31:31-34
13 Krana Sang Hyang Pengardi masabda indik prajanjian sane anyar, pastika prajanjian sane kapertama dados lawas. Lan napi sane sampun lawas tur tua jagi gelis ical.