Ngranjing ja Ring Genah Mararian Sang Hyang Pengardi
4
Janjin Sang Hyang Pengardi mangda iraga ngranjing ring genah mararian Idane kari kasadyayang. Punika mawinan, iraga musti waspada mangda asiki ja saking ragane nenten wenten sane pocol. 2 Orti Rahayu indik genah mararian punika sampun kaortiang buat iraga pateh sekadi buat para leluhure idumun. Nanging ortine punika nenten maguna buat ipun sami, krana ritatkala mirengin ipun nenten pracaya. 3 Wantah iraga sane pracaya sida ngranjing ring genah marariane punika. Nanging indik anake sane nenten pracaya punika, Sang Hyang Pengardi ngandika sapuniki,“Nira duka kanti masumpah buka kene,
‘Ia makejang tusing bakal neked sid tongos mareren ane sadyayang Nira.’” Kidung 95:11
Sang Hyang Pengardi ngandika sekadi punika, yadiastun Ida mararian saking pakaryan Idane ritatkala puput ngardi jagate puniki. 4 Krana ring Cakepan Sucine wenten katulis indik Sang Hyang Pengardi sampun nyiptayang makasamine kantos nem rahina sapuniki, “Ring dinane kaping pitu, Sang Hyang Pengardi mararian saking makasami pakaryan Idane.” Purwakaning Dadi 2:2 5 Wenten malih katulis sapuniki, “Ia makejang tusing bakal neked sid tongos mareren ane sadyayang Nira.” Kidung 95:11.
6 Yadiastun ipun mirengin Orti Rahayune punika, leluhur iragane nenten ngranjing ring genah mararian punika krana ipun nenten pracaya. Pamuputne, anak lianan sane prasida ngranjing ring genah marariane punika. 7 Punika mawinan Sang Hyang Pengardi mastiang dina sane lianan mangda ngranjing ring genah marariane punika, inggih punika “dina mangkin”. Dinane punika kapastiang sue pisan sasampun Ida ngandika kapining para leluhure sane dumunan. Ida ngandika malantaran sane katulis olih raja Daud sapuniki,
“Padingehang ja sabdan Nirane dinane jani,
eda ja bengkung.” Kidung 95:7,8.
8 Sasampune dane Musa padem, dane Yosua mimpin para leluhur iragane ngranjing ka negeri sane kajanjiang olih Sang Hyang Pengardi. Nanging negerine punika boya ja genah mararian sane sujati. Iraga uning punika krana Ida masabda indik ‘dina’ mararian sane lianan. 9 Sane mangkin, kari wenten galah buat krama druen Sang Hyang Pengardi mararian sekadi Ida mararian ring dina sane kaping pitu, inggih punika rahina Sabat. 10 Sang Hyang Pengardi mararian saking pakaryan Idane. Sekadi punika taler para kraman Idane mararian saking pakaryan ipune ritatkala ngranjing ring genah mararian sane picayang Ida. 11 Sapatutne iraga pageh mautsaha mangda ngranjing ring genah mararian sane kajanjiang punika, mangdane nenten wenten sane pocol sekadi para leluhur iragane, sane nenten satinut kapining Sang Hyang Pengardi.
12 Sabdan Sang Hyang Pengardi nenten tios, sabda sane urip lan makuasa; mangan sekadi pedang marai kalih. Sabdan Idane punika nusuk kalintang dalem ring atin manusane kantos malasang jiwa saking roh, turmaning malasang tulang miwah sumsum. Sabdane punika taler ngedengang dalemne manah manusane lan tatujon manusane. 13 Sekancan sane kaciptayang olih Sang Hyang Pengardi nenten wenten sane mengkeb tur makasamine ngilis lan mabukak ring ajeng Idane. Iraga musti nanggung jawabang ring ajeng Ida.
Sang Hyang Yesus Agungan kapining Sekancan Rsi Penglingsir Agung sadereng Ida
4:14—8:13
Sang Hyang Yesus Dados Rsi Penglingsir Agung
Mangda aluh ngertiang daging cakepane, penyalin ngimbuhin catetan puniki indik rsi: Duk idumun, Sang Hyang Tunggal milih soroh sentanan dane Lewi dados rsi. Wantah soroh Lewi punika kamanten sane prasida ngayah ring Tenda Suci Mabakti kapining Sang Hyang Tunggal. Para rsine punika sane makta aturan lan morbor menyan ring Tenda Suci Mabaktine. Tur rsine punika kamanten sane dados wakil anak Yahudine ring ajeng Sang Hyang Tunggal. Kenten pada, para rsine punika sane nerima aturan apahdasa saking para krama Yahudine.
14 Sane mangkin iraga madue Rsi Penglingsir Agung sane ageng. Ida sane ngranjing ka swarga nenten tios Sang Hyang Yesus, Putran Sang Hyang Pengardi. Punika mawinan iraga musti kukuh ngisiang kapracayaan iragane kapining Ida. 15 Iraga madue Rsi Penglingsir Agung sane polih ngrasayang sekancan kakirangan iragane. Duk Ida maurip ring jagate puniki, Ida pada sampun kagoda antuk sekancan paindikan pateh sekadi iraga, nanging Ida nenten madosa. 16 Krana ayah-ayahan Rsi Penglingsir Agung iragane sekadi punika, iraga wanen tangkil ring ajeng singasanan Sang Hyang Pengardi sane kaebekin antuk wara nugraha. Tur iraga jagi manggihin welas asih lan wara nugraha ritatkala iraga ngamerluang pitulungan saking Ida.