Sampunang ja Nulak Karahayuan sane Agung Punika
2
Punika mawinan sapatutne iraga musti seken-seken ngisiang pengajah-ajahan sane sampun pirengin iraga, mangdane iraga nenten kaanyudang olih sipat jaat gumine. 2 Bandingang ja prentah sane kanikayang kapining dane Musa malantaran para malekate idumun. Prentahe punika yakti-yakti kaanggen. Anake sane nglanggar tur nenten satinut kapining prentahe punika polih ukuman sane pantes. 3 Yening sekadi punika, punapike carane iraga luput saking ukuman yening nenten rungu kapining karahayuan sane ageng puniki? Karahayuane puniki kapertama kaortiang olih Sang Ratu Agung. Salanturnyane anake sane sampun mirengang Orti Rahayune puniki muktiang buat iraga indik ortine puniki yakti patut. 4 Sang Hyang Pengardi pada muktiang Orti Rahayune puniki nganggen tanda-tanda lan paindikan sane ngangobin. Kenten pada, ortine puniki kabuktiang krana Ida ngicen kabisaan rohani saking Roh Sang Hyang Pengardi manut pikayunan Idane.Sang Hyang Yesus Dados Manusa Mangda Manusane Karahayuang
5 Para malekate nenten ja kapilih olih Sang Hyang Pengardi buat nguasain jagat anyar sane jagi rauh, sane baosang iraga mangkin. 6 Nanging wenten anak sane ngicen kasaksian idumun ring Cakepan Sucine sapuniki,
“Duh Sang Hyang Pengardi, napike mawinan Iratu eling kapining manusanea?
Lan napike mawinan Iratu rungu kapining ipun?
7 Nanging ajebos kamanten Iratu nadosang ipun betenan kapining malekate.
Raris, Iratu ngicen linggih sane agung saha ngajiang ipun.
8 Lan ipun kadadosang penguasa ring saluirin sane wenten.” Kidung 8:5-7
Sane mangkin, yening manusane kadadosang “penguasa ring saluirin sane wenten,” artine asiki ja nenten wenten paindikan sane nenten kakuasain olih manusane. Mangkin iraga dereng nyingakin manusane nguasain sekancan paindikan. 9 Baos sane iwawu punika, indik Sang Hyang Yesus sane cingakin iraga: ajebos kamanten Ida kadadosang betenan kapining malekate. Mangkin Ida sampun nerima linggih agung tur kaajiang duaning Ida sampun nandang seda. Tatujone mangdane malantaran wara nugraha Sang Hyang Pengardi, Ida seda buat manusane sami.
10 Sang Hyang Pengardi nyiptayang makasamine manut tatujon Idane praragan. Patut pisan yening Ida ngranayang Sang Hyang Yesus sempurna malantaran Ida nandang sengsara. Sekadi punika Ida makarya margi mangda manusane karahayuang; inggih punika Ida ngajak anake akeh mangda polih kaagungan sareng Ida. 11 Sang Hyang Yesus sampun nyuciang iraga. Ida sareng iraga madue Aji sane asiki. Punika mawinan Sang Hyang Yesus nenten kimud ngakuin iraga dados semeton Idane. 12 Sang Hyang Yesus matur kapining Sang Hyang Pengardi sapuniki,
“Titiang jagi ngortiang kapining para semeton Titiange indik Iratu.
Titiang jagi matembang pamuji buat Iratu ring tengah-tengah pasamuan ipune.” Kidung 22:23
13 Sang Hyang Yesus pada matur sapuniki,
“Titiang jagi setata pracaya kapining Sang Hyang Pengardi.” Yesaya 8:17
Malih Ida matur sapuniki,
“Niki Titiang, kasarengin alit-aliteinggih punika para pengiring sane sampun picayang Iratu kapining Titiang.” Yesaya 8:18
14 Iraga sane kanikayang alit-alit Idane wantah manusa biasa sane madue rah lan daging. Punika mawinan, Sang Hyang Yesus praragan dados manusa sekadi iraga. Tatujone mangda malantaran sedan Idane, Ida prasida ngenyagang kuasan ratun para setane sane nguasain pademe. 15 Sekadi punika Sang Hyang Yesus mebasang iraga. Krana iraga idumun maurip selantang tuuh sekadi kakrangkeng olih rasa jejeh ulian jagi padem. 16 Sane mangkin iraga uning, nenten ja malekate sane katulungin olih Ida, nanging sentanan dane Abrahame. 17 Punika mawinan ring sekancan paindikan, Ida musti kapatehang sareng para semeton Idane. Sekadi punika Ida dados Rsi Penglingsir Agung sane satya lan medalem iraga. Malantaran ayah-ayahan Idane sekadi punika, dosan-dosan manusane prasida kaampurayang. 18 Krana Ida praragan nandang sengsara lan kagoda. Punika mawinan, Ida prasida nulungin iraga tatkala kagoda.