Surat buat Anak Ibrani
Pengawit: Sang Hyang Pengardi sampun Masabda malantaran Putran Idane
1:1—1:4
Sang Hyang Pengardi Masabda malantaran Putran Idane
1
Duk jaman idumun, Sang Hyang Pengardi sering pisan masabda indik anggan Idane kapining para leluhur iragane nganggen cara sane malian-lianan malantaran para sinoman Idane. 2 Nanging ring jaman pamuput puniki, Ida masabda kapining iraga malantaran Putran Idane. Putran Idane punika sampun kicen hak olih Sang Hyang Pengardi jagi nerima sekancan sane wenten. Lan malantaran Sang Putra, Sang Hyang Pengardi sampun nyiptayang sekancan jagate miwah saluirin sane wenten. 3 Sang Putra punika sinar kaagungan Sang Hyang Pengardine. Sang Putra punika pada dados gambaran anggan Sang Hyang Pengardi sane sempurna. Sang Putra punika sane miara saluirin sane kaciptayang malantaran sabdan Idane sane makuasa pisan. Ida punika sane nyadyayang margi mangda manusane prasida kasuciang saking dosan-dosannyane. Raris Ida malinggih ring singasanane ring kenawan Sang Hyang Pengardi sane Maha Luhur. 4 Punika mawinan linggih Sang Putra agungan kapining saluirin malekate, krana parab sane kapicayang buat Ida agungan kapining pesengan saluirin malekate.Sang Hyang Yesus Agungan kapining Malekat
1:5—2:18
Kaagungan Sang Putra
Mangda aluh ngertiang daging cakepane, penyalin ngimbuhin catetan puniki: Malekat inggih punika roh-roh sane kakardi olih Sang Hyang Pengardi. Geginan para malekate nglaksanayang sekancan prentah lan pikayunan Idane. Para malekate pada kicen tugas nekedang prentah-prentah Sang Hyang Pengardi kapining dane Musa.
5 Sang Hyang Pengardi nenten taen ngandika kapining para malekate sapuniki,
“Cening mula Putran Nirane;
Dinane mangkin Nira sampun dados Ajin Ceninge.” Kidung 2:7.
Kenten pada, Sang Hyang Pengardi nenten taen ngandika indik para malekate sapuniki,
“Nira jagi dados Ajin Idane,
Ida jagi dados Putran Nirane.” 2 Samuel 7:14.
Ida ngandika sekadi punika wantah indik Sang Putra kamanten.
6 Nanging ritatkala Sang Hyang Pengardi ngutus Putran Idane sane utama ring jagate puniki, Ida ngandika sapuniki,
“Makasami malekat Nirane musti nyembah Sang Putra punika.” Pengeling-eling 32:43.
7 Indik para malekate, Sang Hyang Pengardi ngandika sapuniki,
“Nira ngranayang para malekate ngayahin Nira sekadi angin,
tur ngayahin Nira sekadi endihan api.” Kidung 104:4.
8 Nanging kapining Sang Putra Ida ngandika sapuniki,
“Duh Sasembahan Tunggal, Iratu jagi mamrentah ring karajaan Iratune kantos salamin-laminne.
Iratu jagi adil mamrentah ring karajaan Iratune.
9 Iratu tresna kapining paindikan sane adil lan gedeg kapining sane corah.
Punika mawinan Nira, Sasembahan Iratune, sampun nglantik Iratu,
Kantos Iratu kaajiang tur kicen sukarena sane agengan kapining sawitran Iratune.” Kidung 45:7-8.
10 Sang Hyang Pengardi pada ngandika kapining Sang Putra sapuniki,
“Duh Sang Ratu Agung, duk pengawitne Iratu sane nyiptayang dasar jagate,
Lan tangan Iratune praragan sane nyiptayang langite.
11 Makasami punika jagi ical,
Nanging Iratu setata langgeng.
Makasami punika jagi usak sekadi pengangge.
12 Iratu jagi ngulung jagate puniki sekadi ngulung pengangge sane buuk,
Tur nyalinang nganggen sane anyar.
Nanging Iratu tetep langgeng.
Lan urip Iratune salamin-laminne.” Kidung 102:26-28.
13 Nenten ja taen Sang Hyang Pengardi ngandika kapining para malekate sekadi puniki,
“Malinggih ja ring kenawan Nirane, kantos musuh-musuh Ceninge genahang Nira ring beten cokor Ceninge.” Kidung 110:1.
14 Boyake saluirin malekate punika pengayah Sang Hyang Pengardi? Para malekate punika kautus olih Ida mangda ngayahin anake sane jagi ngamolihang karahayuan.