Dane Paulus Kaadilin ring Arepan Gubernur Pestus
25
Tigang dina sasampun Pestus dados gubernur ring Propinsi Yudea,
raris ida luas saking Kota Kaisarea ka Kota Yerusalem.
2 Irika para pemimpin rsi lan para pemimpin Yahudine nikayang akeh tuduhan kapining dane Paulus majeng ring gubernur Pestus.
Ipun sami nglemesin gubernur Pestus,
3 mangda nyenengin manah ipune antuk nikain dane Paulus kabakta ka Yerusalem.
Ipun sami nunas sekadi punika krana ipun sampun pada adung jagi ngamademang dane Paulus ring tengahin margine.
4 Nanging gubernur Pestus nyaurin ipun sapuniki,
“Paulus sedek kajaga ring Kota Kaisarea.
Turmaning tiang pramangkin jagi mawali mrika.
5 Sane mangkin durusang para pemimpin ragane luas sareng-sareng tiang ka Kota Kaisarea,
mangda nikayang tuduhan ring I Paulus irika,
yening yakti ipun malaksana iwang.”
6 Sasampune gubernur Pestus meneng ring Yerusalem kirang langkung kutus kantos dasa dina suene,
ida mawali ka Kaisarea.
Tur benjangane ida makarya paum pengadilan lan mrentahang tentarane mangda dane Paulus kabakta tangkil mrika.
7 Ritatkala dane Paulus rauh irika,
para pemimpin Yahudi sane rauh saking Yerusalem ngadeg ngiterin dane.
Lan ipun sami nuduh dane Paulus antuk akeh tuduhan sane baat.
Nanging ipun nenten mresidayang muktiang tuduhan ipune.
8 Raris dane Paulus mabela raga sapuniki,
“Titiang nenten malaksana iwang kapining ukum agama Yahudine,
kapining Genah Agung Mabaktine,
miwah kapining kaisar Roma.”
9 Nanging gubernur Pestus meled nyenengin manah anak Yahudine.
Irika raris ida nakenang dane Paulus sapuniki,
“Kayunke ragane luas ka Yerusalem mangda ragane kaadilin irika ring arepan tiange indik prakarane punika?”
10 Nanging dane Paulus masaur sapuniki,
“Sane mangkin titiang ngadeg ring arepan pengadilan kaisar Roma;
iriki sapatutne titiang musti kaadilin.
Titiang nenten ja malaksana iwang kapining anak Yahudine sekadi sane yakti-yakti uningin iratu.
11 Yening titiang iwang tur sampun malaksana paindikan sane pantes nerima ukuman padem,
titiang misadya padem.
Nanging yening tuduhan ipune nenten patut,
nenten wenten anak sane madue hak nyerahang titiang kapining ipun.
Titiang nunas mangda titiang kaadilin olih kaisar Roma!”
12 Sasampune gubernur Pestus mabligbagan sareng para pengede ring pengadilane punika,
raris ida mabaos sapuniki,
“Manut sekadi pinunas ragane mangda kaadilin olih Kaisar,
ragane musti luas ka Roma tangkil ring Kaisar.”
Gubernur Pestus sareng Raja Agripa Mabligbagan indik Dane Paulus
13 Sasampune makudang dina,
raja Agripa lan arin idane sane mapesengan Bernike rauh ka Kota Kaisarea jagi ngaturang pengayu bagia ring gubernur Pestus.
14 Sasampune makudang dina raja Agripa lan arin idane meneng ring Kota Kaisarea,
gubernur Pestus meberang prakaran dane Paulus ring raja Agripa sapuniki,
“Duh raja Agripa!
Iriki wenten bogolan sane pengadilane dereng kapuputang olih gubernur Peliks.
15 Duk titiang wenten ring Kota Yerusalem,
para pemimpin rsi lan para penglingsir Yahudine nikayang akeh tuduhan kapining anake punika.
Ipun sami nunas mangda titiang ngukum anake punika.
16 Nanging titiang nyaurin ipun sami yening manut awig-awig Romane,
anake sane katuduh nenten dados kaserahang dumunan kapining anake sane nuduh ipun.
Anake sane katuduh punika musti kicen galah mangda mapadu arep buat mabela raga ring anake sane nuduh ipun.
17 “Punika mawinan,
ritatkala para pemimpin Yahudine rauh mriki sareng titiang,
benjangane titiang pramangkin makarya paum ring pengadilane lan mrentahang mangda I Paulus punika kabakta tangkil ring arepan pengadilane.
18 Nanging ritatkala para anake sane nuduh I Paulus punika ngadeg,
ipun sami nenten ja nikayang tuduhan sane jaat sekadi sane kaden titiang.
19 Sujatine ipun sami matungkasan indik agaman ipune praragan lan indik anak sane mapesengan Yesus sane sampun padem.
Nanging I Paulus ngamaosang Yesus punika sampun maurip malih.
20 Titiang paling punapike carane mreksa paindikane puniki.
Punika mawinan titiang mataken kapining I Paulus napike ipun kayun luas ka Yerusalem mangda prakarannyane kaadilin irika.
21 Nanging I Paulus nunas mangda tetep kajaga kantos prakaran ipune kaadilin olih kaisar Romane.
Punika mawinan titiang mrentahang mangda I Paulus kajaga kantos titiang polih galah jagi ngutus ipun ring kaisar Romane.”
22 Raris raja Agripa mabaos kapining gubernur Pestus sapuniki,
“Tiang praragan meled mirengin anake punika.”
Irika raris gubernur Pestus nyaurin sapuniki,
“Benjang iratu prasida mirengin ipun.”
Dane Paulus Kabakta ka Arepan Raja Agripa
23 Benjangane raja Agripa lan dane Bernike rauh kasambut nganggen upacara ageng.
Raja Agripa sareng arin idane ngranjing ring genah pengadilane kasarengin para pemimpin pasukan lan para pengede ring kotane punika.
Irika raris gubernur Pestus mrentahang mangda dane Paulus kabakta ngranjing.
24 Raris gubernur Pestus mabaos sapuniki,
“Duh raja Agripa miwah semeton sami sane wenten iriki!
Semeton sami nyingakin anake puniki!
Ipun sampun katuduh olih saluirin anak Yahudine tatkala ring Yerusalem miwah iriki.
Anake sami punika nunas sambilanga masuryak-suryak indik nenten patut ipun kari maurip.
25 Nanging titiang nenten manggihin neng akidik ja kaiwangan sane sampun laksanayang ipun sane pantes keni ukuman padem.
Tur anake puniki sampun nunas mangda prakaran ipune kaadilin olih kaisar Roma.
Punika mawinan titiang sampun mutusang mangda anake puniki kautus ring kaisar Roma.
26 Nanging titiang dereng uning napi sapatutne sane tulisang titiang majeng ring Kaisar indik anake puniki.
Sane mangkin titiang nikayang anake puniki tangkil mriki ring ajeng jerone sami tur sane mautama majeng ring iratu,
duh raja Agripa!
Tatujone mangda sasampune kapreksa iriki,
wenten babaosan patut sane prasida tulisang titiang majeng ring Kaisar.
27 Krana manut titiang,
nenten patut ngutus bogolan yening nenten nerangang kaiwangan sane tuduhanga ring ipun.”