Dane Paulus Katuduh olih Anak Yahudi
24
Sasampune limang dina,
rsi penglingsir agung Ananias rauh ring Kaisarea.
Dane kasarengin olih makudang penglingsir Yahudine lan adiri pengacara sane mapesengan Tertulus.
Ipun sami sareng-sareng tangkil ring gubernur Peliks mangda nuduh dane Paulus.
2 Raris dane Paulus kabakta ka arepan gubernure punika tur irika Tertulus ngawitin nuduh dane Paulus sapuniki,
“Duh Ratu gubernur Peliks sane wangiang titiang!
Duaning iratu mimpin Bangsa Yahudine,
titiang sami sue ngamolihang dame.
Samaliha malantaran kawicaksanaan iratune,
akeh malih paindikan becik sane sampun kalaksanayang duk pemrentahan iratune.
3 Saking makasami paindikane punika,
ring dija ja titiang sami setata ngaturang suksma pisan kapining iratu.
4 Nanging,
mangdane titiang nenten akeh ngutang galah iratune,
titiang nunas mangdane iratu ledang mirengin akidik atur titiange sami.
5 “Titiang sami manggihin anake puniki sekadi penyakit nglahlah sane ngranayang baya.
Ipun pada ngranayang biyut maideh-idehan ring sekancan anak Yahudine tur dados pemimpin soroh anak Nasareta.
6 Samaliha anake puniki ngutsahayang mangda Genah Agung Mabakti kapining Sang Hyang Pengardi dados cemer,
sane mawinan titiang sami ngejuk ipun.
[Titiang sami jagi ngadilin ipun manut ukum agama Yahudine.
7 Nanging pemimpin pasukan Lisias maksa ngambil ipun saking titiang sami,
8 tur nunden titiang tangkil ring arepan iratu mangda meberang tuduhan-tuduhane indik anake puniki.]b
Samaliha yening iratu mreksa ipun,
iratu praragan jagi mirengin indik napi sane tuduhang titiang puniki yakti patut.”
9 Makasami anak Yahudine sane wenten irika pada nuduh dane Paulus.
Lan ipun sami pada adung nikayang yening baos Tertuluse yakti patut.
Dane Paulus Mabela Raga ring Arepan Gubernur Peliks
10 Raris gubernur Peliks ngicen tanda ring dane Paulus mangda dane mabaos.
Irika raris dane Paulus matur sapuniki,
“Titiang uning ratu sampun tiban-tibanan suene dados akim negerine puniki.
Punika mawinan titiang marasa lega mabela raga ring arepan iratune.
11 Iratu prasida mastiang,
yening nenten lebih teken roras dina sane sampun liwat,
titiang rauh ka Yerusalem jagi ngaturang bakti ring Sang Hyang Pengardi.
12 Anak Yahudine nenten taen manggihin titiang maiegan sareng sapa sira ja utawi ngranayang wargane biyut ring Genah Agung Mabakti,
ring bale wantilan agama Yahudine miwah ring genah sane lianan ring kota.
13 Ipun sareng sami nenten mresidayang muktiang ring iratu indik tuduhan ipun kapining titiang.
14 Nanging titiang ngaku yening titiang yakti mabakti ring Sang Hyang Pengardi,
sasembahan para leluhur titiange sami,
manut Margi sane katujuin olih Sang Ratu Agung sane kasambat iwang olih ipun.
Titiang pada pracaya indik makasami sane katulis ring ukum agama Yahudi lan cakepan para sinomane.
15 Pateh sekadi pemimpin-pemimpin Yahudine puniki,
titiang pada madue kapracayaan indik Sang Hyang Pengardi jagi nguripang malih anake sane sampun padem,
inggih punika anake patut wiadin jaat.
16 Punika mawinan titiang setata ngutsahayang malaksana patut mangda manah titiange suci nirmala ring ajeng Sang Hyang Pengardi lan ring arepan manusane.
17 “Sasampune makudang tiban titiang matilar saking Yerusalem,
raris titiang mawali malih mrika jagi makta jinah sumbangan buat bangsan titiange.
Tur titiang jagi ngaturang aturan ring Sang Hyang Pengardi.
18 Sasampune titiang wusan nyuciang raga lan sedek ngaturang aturan,
irika wenten makudang anak Yahudi saking Propinsi Asia Alit manggihin titiang ring Genah Agung Mabaktine.
Tatkala punika nenten wenten anak akeh sareng titiang tur titiang nenten ja makarya paindikan biyut.
19 Sapatutne anak Yahudine saking Propinsi Asia Alit punika sane tangkil ring iratu.
Yening ipun wenten tuduhan kapining titiang,
ipun musti nikayang tuduhane punika ring iratu.
20 Utawi,
banggiang ja anake iriki nuturang kaiwangan titiange sane kapanggihin olih ipun sami tatkala titiang ring arepan Pengadilan Agama Yahudine.
21 Duk punika,
ipun sami nenten manggihin kaiwangan napi-napi ring dewek titiange.
Minab ipun nenten seneng krana titiang mabaos antuk suara keras ring arepan ipune sami sapuniki,
‘Titiang kaadilin dinane mangkin krana titiang pracaya indik anake sane sampun padem jagi kauripang malih.’”
22 Irika raris gubernur Peliks sane sampun akeh uning indik Margi sane katujuin olih Sang Hyang Yesus,
muputang sidang pengadilane punika saha mabaos sapuniki,
“Tiang jagi mutusang prakaran ragane ritatkala Lisias,
pemimpin pasukane,
rauh mriki.”
23 Raris gubernur Peliks mrentahang adiri prawira mangda tetep nyaga dane Paulus.
Nanging dane nenten kategul nganggen rante,
tur para sawitran danene nenten katambakin buat ngrunguang dane.
Dane Paulus Ngortiang Orti Rahayu kapining Gubernur Peliks sareng Rabin Idane
24 Sasampune makudang dina,
gubernur Peliks rauh sareng rabin idane sane mapesengan Drusila,
inggih punika anak Yahudi.
Raris gubernur Peliks nunden anake mangda ngamanggil dane Paulus.
Salanturnyane ida sareng kalih mirengin dane Paulus nyeritayang indik punapike carane anake pracaya kapining Sang Hyang Yesus Kristus.
25 Nanging gubernur Peliks dados jejeh ritatkala dane Paulus nuturang pengajahan indik urip sane patut lan nenten ngulurin indria tur indik anake jagi keni ukuman saking Sang Hyang Pengardi.
Irika raris gubernur Peliks mabaos sapuniki,
“Puputang ja dumun baos ragane,
tur mangkin ragane dados matilar.
Yening wenten galah,
tiang jagi ngamanggil ragane malih.”
26 Gubernur Peliks sering nunden anak mangda ngamanggil dane Paulus buat mabligbagan sareng ida.
Sujatine ida meled mangda dane Paulus nombok ida.
27 Sasampune duang tiban,
gubernur Peliks kagantinin olih Perkius Pestus.
Nanging krana Peliks meled nyenengin manah anak Yahudine,
ida nepin dane Paulus ring buine.