23
Duk punika dane Paulus nlektekin soroh pengadilan agamane raris mabaos sapuniki,
“Duh para semeton titiang!
Kantos kayang mangkin,
titiang setata maurip antuk manah sane suci nirmala ring arepan Sang Hyang Pengardine.”
2 Mirengin baos dane Pauluse sekadi punika,
raris rsi penglingsir agung Ananias nikain para anake sane ngadeg ring samping dane Pauluse mangda namplak cangkem danene.
3 Raris dane Paulus mabaos kapining rsi penglingsir agunge punika sapuniki,
“Duh jero sane mapi-mapi patut!
Sang Hyang Pengardi pastika jagi namplak jerone.
Jerone malinggih irika mangda ngadilin titiang manut ukum agama Yahudi,
nanging jerone nungkasin ukume punika tatkala jero nunden anak mangda namplak titiang!”
4 Para anake sane ngadeg ring samping dane Pauluse mabaos sapuniki,
“Ragane nenten dados nganistayang rsi penglingsir agung,
pengayah Sang Hyang Pengardine.”
5 Dane Paulus nyaurin ipun sapuniki,
“Duh para semeton,
sujatine titiang nenten uning ida puniki rsi penglingsir agung.
Titiang nunas ampura,
krana wenten katulis ring Cakepan Sucine sapuniki,
‘Eda ja cening nganistayang pemimpin bangsan ceninge.’”
Pararudan 22:28.
6-8 Ring pengadilan agamane punika,
wenten aparo anak Saduki lan aparo anak Parisi.
Manut para anak Sadukine,
anake padem nenten kauripang malih,
lan ipun nenten pracaya indik wenten malekat lan roh-roh sane lianan.
Nanging anak Parisine pracaya makasami paindikane puniki.
Krana Paulus uning wenten kalih seka sane pengajahane matungkasan,
irika dane mabaos antuk suara keras sapuniki,
“Duh para semeton!
Titiang anak Parisi,
tur leluhur titiange pada anak Parisi.
Titiang kaadilin iriki krana titiang pracaya indik anake sane sampun padem jagi kauripang malih.”
Sasampune dane Paulus mabaos sekadi punika,
para anak Parisi lan para anak Sadukine matungkasan lan pengadilane punika mapiakan dados kalih.
9 Punika mawinan pengadilane punika dados biyut pisan.
Makudang anak Parisi sane dados guru agama Yahudi ngadeg saha kalintang nungkasin para anak Sadukine tur mabaos sapuniki,
“Manut titiang sami,
anake puniki nenten pisan wenten kaiwangane!
Minab wenten roh utawi malekat sane mabaos kapining ipun.”
10 Soroh Parisi lan soroh Sadukine punika ngancan keras matungkasan kantos pemimpin pasukane jejeh yening dane Paulus rebuta olih ipun sami.
Punika mawinan pemimpin pasukane nunden para tentarane tedun ngambil dane Paulus saking tengah-tengah anake akeh punika raris kabakta ka markase.
11 Ring dina wengi,
Sang Ratu Agung ngadeg ring sisin dane Pauluse saha masabda sapuniki,
“Kukuhang ja manah ceninge!
Cening suba dadi saksin Nirane di Yerusalem.
Keto masih cening musti dadi saksin Nirane di Kota Roma.”
Para Anak Yahudine Meled Ngamademang Dane Paulus
12 Benjang semengane,
makudang anak Yahudine pada adung ngrencanayang jagi ngamademang dane Paulus.
Ipun sami masumpah nenten ngajeng lan nginum sadereng dane Paulus kapademang.
13 Anake sane pada adung punika lebih kapining petang dasa (40) diri akehne.
14 Ipun sami luas ring para pemimpin rsine lan para penglingsir Yahudine saha matur sapuniki,
“Tiang sami sampun masumpah nenten jagi ngajeng lan nginum sadereng ngamademang I Paulus.
15 Nah sane mangkin,
rarisang ja pengadilan agamane nunas kapining pemimpin pasukan Romane punika mangda I Paulus malih kabakta mriki.
Mapi-mapi ja jerone mangda alon-alon jagi mreksa prakarannyane malih.
Tiang sami siaga ngamademang ia sadereng rauh mriki.”
16 Nanging keponakan lanang dane Pauluse mirengin rencanan anake sami punika.
Raris keponakan danene punika luas ka markas tentarane tur nyeritayang rencana jaate punika kapining dane Paulus.
17 Dane Paulus raris ngamanggil adiri prawira tur mabaos sapuniki,
“Bakta ja anak truna puniki ring pemimpin pasukane,
krana ia madue orti sane musti kaaturang kapining pemimpine punika.”
18 Raris prawirane makta anak trunane punika ring pemimpinnyane tur matur sapuniki,
“Bogolane sane mapesengan Paulus ngamanggil tiang tur nunas mangda tiang makta anak truna puniki ring jerone krana ipun meled matur kapining jerone.”
19 Pemimpin pasukane ngisiang tangan anak trunane punika saha ngajak ipun ka samping tur mataken sapuniki,
“Unduk apake ane bakal orahang cening?”
20 Irika raris anak trunane punika matur sapuniki,
“Makudang anak Yahudine sampun pada adung jagi nunas kapining jero mangda dane Paulus kabakta benjang ring arepan pengadilan agamane.
Ipun mapi-mapi jagi alon-alon mreksa malih prakaran dane Pauluse.
21 Nanging sampunang ja jerone nagingin pinunas ipune.
Krana ipun sami lebih teken petang dasa (40) diri sane sampun siaga nyantosang ring tengahin margine jagi ngamademang dane Paulus.
Ipun sami sampun masumpah nenten ngajeng lan nginum sadereng ngamademang dane Paulus.
Sane mangkin ipun sami sampun siaga tur nyantosang putusan jerone kamanten.”
22 Raris pemimpin pasukane punika mabaos sapuniki,
“Eda ja masadu tekening nyen-nyen unduk cening matur tekening tiang.”
Irika raris pemimpin pasukane nikain anak trunane punika budal.
Dane Paulus Kabakta ring Gubernur Peliks
23 Kaceritayang pemimpin pasukane punika ngamanggil kalih prawirannyane tur mabaos sapuniki,
“Sadyayang ja pitung dasa (70) tentara ane negakin jaran,
satak (200) tentara ane ngaba tumbak,
lan satak (200) tentara ane lenan.
Tur luas ja ka Kota Kaisarea jam sia petenge jani.
24 Sadyayang pada jaran-jarane buat Paulus tur ajak ja ia apanga slamet neked sid gubernur Peliks.”
25 Raris pemimpin pasukane punika nulis surat sane mesib sekadi puniki,
26 “Majeng ring gubernur Peliks sane wangiang titiang.
Salam saking titiang,
Klaudius Lisias!
27 “Anake puniki sampun kaejuk olih anak Yahudi tur ipun sami jagi ngamademang ipun.
Nanging titiang mirengin anake puniki warga karajaan Roma.
Punika mawinan titiang sareng pasukan titiange rauh mangda nylametang ipun.
28 Titiang meled uning napike kaiwangan sane tuduhanga olih anak Yahudine kapining ipun.
Punika mawinan ipun kabakta ring Pengadilan Agama Yahudine.
29 Irika titiang napetang ipun katuduh indik prakara ukum agama Yahudine punika.
Nanging nenten wenten tuduhan sane pantes kantos ipun keni ukuman padem utawi kakrangkeng ring buine.
30 Kenten pada,
titiang polih orti yening wenten makudang anak Yahudi madue rencana jagi ngamademang ipun.
Punika mawinan titiang nunden mangda ipun gelis-gelis kabakta kapining iratu.
Titiang pada sampun nikain anak Yahudine mangda matur kapining iratu indik napi sane tuduhanga kapining anake puniki.
Sekadi punika atur titiange.
Puput.”
31 Irika raris para tentarane nglaksanayang prentah pemimpin pasukane punika.
Ipun sami ngambil dane Paulus tur baktana kantos ring Kota Antipatris wengine punika.
32 Benjangne para tentara sane negakin jaran nglanturang luas sareng dane Paulus.
Tentarane sane lianan mawali ka markase punika.
33 Ritatkala rauh ring Kota Kaisarea,
para tentara sane negakin jaran ngaturang surate punika ring gubernur Peliks tur nyerahang dane Paulus ring ida.
34 Sasampune gubernure ngwacen surate punika,
ida mataken kapining dane Paulus saking propinsi napi asal danene.
Duk gubernure uning dane maasal saking Kilikia,
35 ida mabaos sapuniki,
“Tiang lakar mreksa paundukan ragane ritatkala anake ane nuduh ragane neked dini.”
Irika raris gubernure mrentahang mangda dane Paulus kajaga ring bui sane wenten ring puri raja Herodes idumun.