Dane Paulus Luas ka Propinsi Makedonia lan Yunani
20
Sasampune liwat paindikan biyute ring Kota Epesus,
raris dane Paulus munduhang para pengiringe irika,
tur dane ngibur manah ipune sami.
Raris dane Paulus mapamit tur luas ka Propinsi Makedonia.
2 Irika dane ngliwatin propinsine punika tur akeh nuturin para kramane mangda ngibur manah ipune sami.
Salanturnyane dane rauh ring Propinsi Akaya,
sane pada kasambat Wawidangan Yunani,
3 tur dane meneng irika telung bulan suene.
Raris,
tatkala dane mataki-taki malayar nuju Propinsi Siria,
wenten orti indik anak Yahudine pada adung jagi ngamademang dane Paulus.
Punika mawinan dane mutusang jagi mawali ngliwatin Makedonia.
4 Duk punika,
wenten makudang anak sane nyarengin dane Paulus,
inggih punika dane Sopater okan dane Pirus saking Berea,
dane Aristarkus lan dane Sekundus saking Tesalonika,
dane Gayus saking Derbe,
tur dane Timotius,
dane Tikikus lan dane Tropimus saking Propinsi Asia Alit.
5 Raris ipun sami luas dumunan mangda nyantosang dane Paulus sareng tiang ring Kota Troas.
6 Wusan rarainan Roti Tanpa Ragi,
tiang sareng kalih malayar saking Kota Pilipi.
Sasampune limang dina malayar,
tiang sareng kalih rauh ring Kota Troas tur matemu sareng semetone sane mamargi dumunan punika.
Irika tiang sami meneng aminggu.
I Eutikus Kauripang Malih ring Kota Troas
7 Ring dina Saniscara wengi,
tiang sami mapunduh jagi ngompes-ngompes roti tur ngajeng sareng-sareng.
Duk punika dane Paulus akeh mabaos kapining para krama druen Sang Hyang Yesuse irika kantos tengah lemenge,
krana benjangne dane jagi luas saking Troas.
8 Tiang sami mapunduh ring kamare sane baduur ring umahe sane matingkat telu.
Kamare punika akeh wenten damar sane ngendih.
9 Irika wenten anak truna sane mapesengan Eutikus malinggih ring jendelane.
Ritatkala dane Paulus sue pisan mabaos,
I Eutikus ngancan kiap.
Raris ipun sirep tur ulung saking jendela kamare baduur punika.
Ritatkala anake irika ngangkat I Eutikus,
dapetanga ipun sampun padem.
10 Nanging dane Paulus tedun tur ngebahang ragan danene saha ngelut I Eutikus.
Irika dane Paulus mabaos sapuniki,
“Sampunang ja sengsaya!
Ipun sampun maurip malih!”
11 Raris dane mawali munggah ka kamare baduur.
Irika dane ngompes-ngompes roti tur ngajeng sareng-sareng.
Sasampune dane sue mabaos sareng ipun sami kantos semeng ngremeng,
raris dane luas.
12 Anake akeh irika ngatehang I Eutikus budal ka umahnyane,
tur ipun sami kaibur manahnyane krana I Eutikus kari maurip.
Pamargin Dane Paulus Saking Kota Troas ka Kota Miletus
13 Tiang makasami dumunan luas malayar nuju Kota Asos jagi mapagin dane Paulus irika sekadi pabesen danene,
krana dane mamargi mrika ngliwat marga darat.
14 Sasampune tiang sami matemu ring Kota Asos,
dane Paulus raris munggah ka kapale tur tiang sami malayar nuju Kota Metilene.
15 Saking Kota Metilene punika,
tiang sami luas malayar kantos benjangne rauh nampek ring Pulo Kios.
Tur benjangane tiang sami nglanturang malayar kantos ring Pulo Samos.
Sasampune benjangne malih,
tiang sami raris rauh ring Kota Miletus.
16 Dane Paulus sampun mutusang indik dane nenten jagi simpang ring Kota Epesus mangda dane nenten sue ring Propinsi Asia Alit.
Yening mresidayang dane meled mangda gelis rauh ring Kota Yerusalem tatkala rarainan Pentakosta.
Dane Paulus Mapamit Luas ka Yerusalem
17 Ritatkala dane Paulus ring Kota Miletus,
dane ngutus anak ka Kota Epesus makta pabesen mangda para penglingsir krama druen Sang Hyang Yesuse ngrauhin dane ring Kota Miletus.
18 Sasampune para penglingsir kramane punika rauh irika,
raris dane mabaos ring ipun sapuniki,
“Duh para semeton sami,
ragane sampun uning punapike carane tiang urip sareng ragane sami,
ngawit saking tiang rauh ring Propinsi Asia Alit puniki.
19 Tiang matilesang raga lan sering nangis ritatkala tiang ngayahin Sang Hyang Yesus.
Tiang akeh nerima sengsara,
krana wenten anak Yahudi sane jagi ngamademang tiang.
20 Ragane pada sampun uning tiang nenten ja kimud ngajahin pengajahan saluirin sane maguna buat ragane.
Tiang setata ngajahin ragane ring arepan anake akeh,
kenten pada ring sebilang umah ragane suang-suang.
21 Tiang pada setata nuturin anak Yahudi tur anak sane nenten Yahudi mangda ipun masalin saking urip sane madosa tur tangkil ring Sang Hyang Pengardi.
Samaliha mangdane ipun pracaya ring Sang Hyang Yesus Kristus Sang Ratu Agung iragane.”
22 Raris dane Paulus nglanturang mabaos sekadi puniki,
“Nanging,
mangdane tiang satinut kapining Roh Sang Hyang Pengardi,
mangkin tiang musti luas ka Yerusalem.
Yadiastun sapunika tiang nenten uning paindikan napi sane jagi mamargi ring dewek tiange.
23 Nanging ring sebilang kota Roh Sang Hyang Pengardi sampun negesin tiang indik tiang jagi kakrangkeng ring buine tur nerima sengsara.
24 Yadiastun sekadi punika,
tiang nenten ja ngrambang idup tiange padidi.
Sane perlu manut tiang mangda tiang prasida mragatang tugas lan pakaryan sane terima tiang saking Sang Hyang Yesus.
Pakaryane punika nenten tios midartayang Orti Rahayu indik Sang Hyang Yesus sane ngrahayuang manusane krana wara nugraha Sang Hyang Pengardine.”
25 “Ragane sami sampun mirengin saking tiang pengajahan indik Sang Hyang Pengardi jagi mamrentah dados Raja ring jagate.
Nanging tiang uning sasampune dinane puniki ragane nenten pacang nyingak tiang malih.
26 Nah,
sane mangkin tiang nguningayang kapining ragane:
sujatine tiang nenten tanggung jawab,
lan nenten madue iwang kapining sapa sira ja sane jagi kaentungang ka kawah apine.
27 Krana tiang nenten ja kimud ngajahin saluirin pikayunan Sang Hyang Pengardine kapining ragane.
28 “Jaga ja dewek ragane praragan,
tur jaga ja pada kramane sami.
Santukan Roh Sang Hyang Pengardi sampun milih ragane sami mangda dados penglingsir sane nuntun para krama druen Sang Hyang Yesuse sekadi pengangon sane nyaga biri-birinnyanea.
Krana kramane punika sampun kadadosang druen Sang Hyang Pengardi malantaran rah Putran Idane sane kabriokang ring kayu salibe.
29 Tur sasampune tiang luas,
tiang uning jagi wenten guru-guru palsu ring ragane sami.
Gurune punika sekadi asu alas sane galak jagi nyagrep para krama druen Sang Hyang Yesuse.
30 Samaliha jagi wenten saking ragane sami sane ngajahin pengajahan nenten patut.
Anake punika malaksana sekadi punika mangda para pengiring Sang Hyang Yesuse dados paling tur ninutin ipun.
31 Punika mawinan ragane musti waspada!
Tur elingin ja!
Sampun tigang tiban suene,
lemah peteng tiang setata nuturin ragane kantos tiang nangis ulian ragane.
32 “Sane mangkin tiang nyerahang ragane ring Sang Hyang Pengardi mangda Ida miara ragane.
Turmaning tiang nunas mangda Ida ngedengang welas asih Idane malantaran Sabdan Idane.
Krana Sang Hyang Pengardi madue kuasa sane ngicen ragane kakuatan tur ngicen ragane pica sane sampun kasadyayang riwekasan buat anake sami sane dados druen Sang Hyang Pengardi.
33 Nenten taen tiang ngedotang arta branan anak lianan sekadi emas,
perak wiadin pengangge.
34 Ragane sami uning indik tiang nakinang lima padidi mangdane sida nagingin kaperluan tiange lan para sawitra sane sareng tiang.
35 Ring sekancan paindikan,
tiang sampun ngicen tatuladan kapining ragane antuk matuyuhin raga.
Sekadi punika iraga musti mapitulung kapining anake sane tuara.
Krana iraga musti eling ring sabdan Sang Hyang Yesus sekadi puniki,
‘Lebih bagia anake ane makidihang bandingang teken ane nerima.’”
36 Sasampune dane Paulus wusan mabaos sekadi punika,
dane raris matimpuh tur mabakti sareng para penglingsir kramane sane saking Epesus.
37 Raris ipun pada nangis saha ngelut dane Paulus.
38 Ipun sami kalintang sungsut,
duaning dane Paulus ngamaosang indik ragan danene nenten jagi matemu malih.
Raris para penglingsir kramane ngiring dane Paulus kantos ka kapale.