Dane Paulus ring Kota Epesus
19
Ritatkala dane Apolos wenten ring Kota Korintus,
dane Paulus luas ngliwatin pegunungan kantos rauh ring Kota Epesus.
Irika dane kacunduk sareng makudang pengiring Sang Hyang Yesuse.
2 Dane Paulus raris mataken kapining ipun sami sapuniki,
“Napike ragane sami sampun nerima Roh Sang Hyang Pengardi tatkala ragane pracaya?”
Ipun sami masaur sapuniki,
“Dereng!
Samaliha tiang sami nenten taen mirengin indik wenten Roh Sang Hyang Pengardi.”
3 Irika dane Paulus mataken malih sapuniki,
“Yening kenten,
penglukatan sane cenke sampun terima ragane?”
Anake sami masaur sapuniki,
“Penglukatan saking dane Yohanes.”
4 Raris dane Paulus mabaos sapuniki,
“Dane Yohanes nglukat anake akeh dados tanda ipun sampun masalin saking urip sane madosa.
Nanging dane pada nuturin anak Yahudine mangda ipun sami pracaya kapining Anake sane jagi rauh ungkuran,
inggih punika Sang Hyang Yesus.”
5 Ritatkala mirengin baos dane Pauluse,
ipun sami nunas mangda kalukat dados tanda ngiring Sang Hyang Yesus.
6 Tur tatkala dane Paulus nunas ica saha ngenahang tangan danene ring duur sirah ipune sami,
Roh Sang Hyang Pengardi ngebekin ipun.
Irika raris ipun ngawitin mawicara nganggen basa manut wara nugraha sane kicen olih Rohe punika.
Tur ipun pada ngortiang pabesen Sang Hyang Pengardi.
7 Akeh anake sane wenten irika kirang langkung roras diri.
8 Telung bulan suene dane Paulus sesai rauh ka bale wantilan agama Yahudine.
Ritatkala punika dane wanen pisan ngajahin mangda anake irika pracaya indik Sang Hyang Pengardi mamrentah dados Raja.
9 Nanging wenten makudang anake irika bengkung tur nulak pracaya kapining Sang Hyang Yesus.
Ring arepan anake akeh,
ipun sami nganistayang Margi sane katujuin olih Sang Hyang Yesus.
Punika mawinan dane Paulus ngalain anake punika tur dane ngajakin para pengiringe nyarengin dane ka Bale Wantilan Tiranus.
Sasampune punika,
sebilang dina ipun sami mabligbagan indik Orti Rahayune irika.
10 Duang tiban suene dane Paulus ngajahin irika kantos saluirin anak ring Propinsi Asia Alit,
inggih punika anak Yahudi wiadin nenten Yahudi,
makasami mirengin pengajahan Sang Ratu Agung.
Papitu Okan Rsi Skewa
11 Duk punika,
Sang Hyang Pengardi akeh makarya paindikan sane kalintang ngangobin malantaran dane Paulus.
12 Wenten anak sane makta saputangan utawi slempot sane taen kaanggen olih dane Paulus.
Saputangan utawi slempote punika raris kagenahang ring ragan anake sungkan,
tur anake punika prasida seger.
Samaliha,
roh-roh kalane prasida kausir nganggen saputangan utawi slempot danene.
13 Duk punika,
taler wenten makudang anak Yahudi dados balian sane maideh-idehan ngusir roh-roh kalane.
Para baliane puniki pada negarang ngusir roh-roh kala nganggen parab Sang Hyang Yesus.
Ipun sami mabaos kapining buta kalane sapuniki,
“Malantaran parab Sang Hyang Yesus sane kaortiang olih dane Paulus,
wake ngusir iba!”
14 Anake sane malaksana sekadi punika nenten tios papitu anak lanang,
para okan pemimpin rsi agama Yahudi sane mapesengan Skewa.
15 Nanging buta kalane ngraos sapuniki,
“Sang Hyang Yesus tawang wake.
Paulus masih tawang wake.
Sakewala nyenke iba?”
16 Jeg saget anake sane kakuasain buta kala punika makecog tur nyergep para baliane punika,
saha nyetset penganggen baliane sami kantos malalung tur awaknyane pada matatu.
Raris ipun sami malaib saking umahe punika.
17 Makasami anak Yahudi wiadin anak nenten Yahudi sane meneng ring Kota Epesus pada jejeh krana mirengin ortine punika.
Irika raris akeh anake ngagungang parab Sang Hyang Yesus.
18 Akeh wargane sane sampun pracaya irika rauh ring arepan anake akeh ngakuin yening ipun taen nyalanang kuasa ugig.
19 Lan anake irika sane biasane nyalanang kuasa ugig,
munduhang tur nunjel bukun-bukunnyane ring arepan anake akeh.
Risedek kapetek,
ajin buku-bukune punika sawetara seket tali (50.000) jinah peraka.
20 Sekadi punika,
pengajahan Sang Ratu Agung ngancan kasub tur akeh anake ngrasayang kuasan Idane.
Biyut ring Kota Epesus
21 Sasampun sekancan paindikane punika,
dane Paulus madue rencana luas ka Propinsi Makedonia lan Propinsi Akaya raris nuju ka Kota Yerusalem.
Dane mabaos sapuniki,
“Sasampune tiang luas ka Yerusalem,
tiang pada musti luas ka Kota Roma.”
22 Raris dane Paulus ngutus kalih anak sane nulungin dane,
inggih punika dane Timotius lan dane Erastus,
mangda ngamalunin dane ka Makedonia.
Nanging dane tetep meneng sada sue ring Propinsi Asia Alit ring Kota Epesus.
23 Duk punika,
wenten biyut ageng pisan irika krana Margi sane katujuin olih Sang Hyang Yesus.
24 Ring kotane punika,
wenten tukang perak sane mapesengan Demetrius.
Tukange punika sane makarya pelinggih-pelinggihan alit dewi Artemis.
Saking geginane punika para tukange polih asil sane ageng.
25 Dane Demetrius raris munduhang para tukangnyane turmaning pengayah-pengayah tukang sane lianan.
Irika raris dane Demetrius mabaos sapuniki,
“Duh para semeton sareng sami!
Semeton sampun uning iraga polih jinah sane akeh malantaran pakaryan iragane puniki.
26 Nanging semeton sami sampun nyingak tur mirengin napi sane kalaksanayang olih I Paulus.
Ipun ngamaosang yening para dewa sane kakaryanin olih tangan manusa nenten ja dewa.
Tur ipun sampun ngranayang akeh anake pracaya kapining pengajahannyane,
nenten ja ring Kota Epesus kamanten nanging das kantos saluirin Asia Alit.
27 Malantaran paindikane punika,
nenten ja pakaryan iragane kamanten sane keni baya krana kanistayang.
Taler pelinggih Artemis,
dewi sane agung punika,
pada jagi nenten maguna.
Tur kaagungan Artemis,
inggih punika dewi sane kasungsung olih anake ring Asia Alit miwah saluirin jagat,
jagi sirna.”
28 Sasampune anake sami mirengin paindikane punika,
ipun sami dados kalintang mamedih saha gelur-gelur sapuniki,
“Idup Artemis,
dewi anak Epesus!”
29 Punika mawinan saluirin kotane punika dados biyut.
Anake akeh raris gelis-gelis ka bale budayane saha maid dane Gayus lan dane Aristarkus,
anak saking Makedonia sane nyarengin dane Paulus ring pamargin danene.
30 Dane Paulus meled ngranjing nututin ipun sareng kalih,
nanging para pengiring Sang Hyang Yesuse sane lianan nenten ngicen dane ngranjing mrika.
31 Wenten makudang pengede ring Propinsi Asia Alit sane sampun masawitra sareng dane Paulus.
Ipun sami ngutus pabesen nunas mangdane dane nenten ngedengang raga ring bale budayane punika.
32 Duk punika anake akeh sane mapunduh ring bale budayane dados biyut.
Wenten sane ngraos keras sapuniki,
tur wenten sane ngraos keras sapunika,
krana sujatine anake akeh sane wenten irika nenten uning napi mawinan ipun sami mapunduh.
33 Irika raris wenten makudang anak Yahudi nuludin anak sane mapesengan Aleksander,
krana anak Yahudine meled mangdane I Aleksander nyeritayang indik biyute punika nenten kakaryanin olih anak Yahudine.
Krana I Aleksander kayun mabaos,
ipun ngicen tanda nganggen tangan mangda anake sami meneng.
34 Nanging tatkala anake akeh eling I Aleksander punika anak Yahudi,
ipun sami pedih tur ngraos keras-keras kantos duang jam suene sekadi puniki,
“Idup Artemis,
dewi anak Epesus!”
35 Pamuputne sekretaris kotane nikain anake akeh irika meneng.
Raris dane mabaos sapuniki,
“Duh warga Epesus!
Sami anake uning Kota Epesus puniki sane miara pelinggih dewi Artemis sane agung lan batu suci sane ulung saking langite.
36 Nenten ja wenten anake sane sida nglawan indike puniki.
Sane mangkin meneng ja lan sampunang ja ngawag-ngawag malaksana.
37 Anake sane bakta ragane mriki,
ipun nenten ja ngamaling napi-napi ring pelinggih dewi Artemis utawi nganistayang dewin iragane.
38 Yening dane Demetrius sareng para tukangnyane wenten prakara sane jagi kaaduang,
banggiang ja ipun makta prakarane punika ring pengadilan.
Pengadilane punika setata siaga mangdane prasida ngadilin prakara.
Sekadi punika para pengedene siaga ring pengadilane.
39 Nanging yening kari wenten paindikan lianan sane pikayunin ragane,
ragane musti muputang prakarane punika ring paum wargane sane sah.
40 Krana napi sane mamargi dinane mangkin prasida ngranayang iraga keni baya.
Iraga prasida katuduh makarya paindikan sane biyut,
krana iraga nenten madue bukti buat matutang raga saking paindikane puniki.”
41 Sasampune mabaos sekadi punika,
raris sekretaris kotane mrentahang anake akeh punika budal.