Dane Timotius Nyarengin dane Paulus lan dane Silas
16
Raris dane Paulus nglanturang pamargin danene ka Kota Derbe lan Kota Listra.
Irika wenten adiri anak sane mapesengan Timotius sane dados pengiring Sang Hyang Yesuse.
Ibun danene anak Yahudi sane sampun pracaya ring Sang Hyang Yesus,
nanging ajin danene anak Yunani.
2 Samian semetone ring Kota Listra lan Kota Ikonium pada uning dane Timotius puniki anak dharma.
3 Dane Paulus meled ngajak dane Timotius mangda nyarengin dane.
Nanging sadereng mamargi,
dane Paulus mrentahang anak mangda nyunat dane Timotius.
Dane Paulus malaksana sekadi punika krana anak Yahudi ring wawidangane irika uning ajin dane Timotiuse anak Yunani.
4 Kaceritayang,
ritatkala dane Paulus lan dane Silas ngiterin kota-kotane irika,
dane meberang awig-awig sane sampun katetepang olih para utusane lan para penglingsire ring Yerusalem.
Dane pada nuturin krama druen Sang Hyang Yesuse irika mangda ninutin sekancan awig-awig manut sekadi surat putusane punika.
5 Punika mawinan kapracayaan kramane irika ngancan kukuh.
Turmaning sebilang dina kramane irika ngancan ngakehang.
Dane Paulus Nyingak Pelawatan Indik Anak saking Propinsi Makedonia
6 Kaceritayang mangkin,
Roh Sang Hyang Pengardi nenten ngicen dane Paulus miwah semeton sane lianan midartayang Orti Rahayu ring Propinsi Asia Alit krana dereng wenten galah sane becik.
Punika mawinan ipun sami mamargi ngiterin Wawidangan Prigia miwah Galatia.
7 Ritatkala ipun sami rauh ring wates Propinsi Misia,
ipun sami ngutsahayang ngranjing ka Propinsi Bitinia,
nanging malih apisan Roh Sang Hyang Yesuse nenten ja ngicen ipun mrika.
8 Punika mawinan,
ipun sami ngliwatin Wawidangan Misia lan nglanturang mamargi ka Kota Troas.
9 Ritatkala wengi,
dane Paulus nyingak pelawatan saking Sang Hyang Pengardi.
Ring pelawatane punika,
dane nyingakin wenten adiri anak saking Makedonia ngadeg saha mapinunas sapuniki,
“Rauh ja ka Makedonia,
tur tulungin ja tiang sami!”
10 Sasampune nyingak pelawatan sekadi punika,
dane lan semeton lianan mataki-taki mangda gelis luas ka Makedonia.
Krana saking pelawatane punika tiang sami mutusang yening Sang Hyang Pengardi sampun ngamanggil titiang sami mangda ngortiang Orti Rahayu ring warga Makedonia.
Ni Lidia Dados Pengiring Sang Hyang Yesus
11 Irika raris tiang sami luas saking Kota Troas tur malayar langsung nuju Pulo Samotrake.
Tur benjangne tiang sami rauh ring Kota Neapolis.
12 Saking irika tiang sami luas ka Kota Pilipi,
inggih punika salah tunggal kota sane penting ring Makedonia.
Akeh anake ring kotane punika warga karajaan Roma.
Irika tiang sami meneng makudang dina.
13 Ring rahina Sabat,
tiang makasami luas ka sisin tukad sane wenten ring jaba pamedal kotane.
Duaning tiang sami mapineh irika wenten genah anak Yahudi mabakti.
Raris tiang sami malinggih tur mawicara sareng para anak istri sane mapunduh ring genahe punika.
14 Adiri saking anake istri punika mapesengan Lidia sane maasal saking Kota Tiatira.
Ni Lidia puniki dagang kain ungu.
Tur ipun anak bakti kapining Sang Hyang Pengardi.
Ritatkala ipun mirengin dane Paulus mabaos,
Sang Ratu Agung ngawinang ipun nerima lan pracaya kapining baos dane Pauluse.
15 Ni Lidia lan saluirin anake sane meneng ring umahnyane kalukat dados tanda ipun ngiring Sang Hyang Yesus.
Sasampune kenten,
ipun ngundang tiang makasami nginep ring umah ipune saha mabaos sapuniki,
“Yening manut ragane sami tiang niki seken-seken pracaya kapining Sang Ratu Agung,
ngiring ja nginep iriki sid umah tiange.”
Raris Ni Lidia nesek tiang makasami kantos misadya nginep irika.
Dane Paulus lan Dane Silas Kakrangkeng ring Bui
16 Ring dina anu,
ritatkala tiang sami sedek luas ka genah mabaktine punika,
irika tiang sami kacunduk sareng anak istri sane dados pengayah ring makudang pamekel.
Anake istri punika kakuasain olih roh buta kala sane sida nrawang paindikan riwekasan.
Saking trawangannyane,
para pamekel ipune polih asil akeh.
17 Anake istri punika nututin dane Paulus sareng tiang sami sambilanga majeritan sapuniki,
“Anake puniki pengayah Sang Hyang Pengardi sane Maha Luhur!
Ipun sami ngortiang ring jerone makasami punapi carane polih kaslametan saking ukuman ulian dosan-dosan jerone!”
18 Kantos makudang dina,
sering pisan anake istri punika majeritan sekadi punika.
Irika dane Paulus nenten sabar malih kantos dane mabalik kuri saha mabaos kapining buta kalane sapuniki,
“Nganggen parab Sang Hyang Yesus Kristus,
wake mrentahang iba pesu uli ragan anake luh ene!”
Jeg pramangkin buta kalane punika magedi saking anake istri punika.
19 Ritatkala para pamekel anake istri punika uning yening ipun nenten malih polih asil saking trawangane,
irika ipun sami ngejuk dane Paulus lan dane Silas.
Raris ipun sami maid dane sareng kalih ka pasar ring arepan para pengede Kota Pilipi.
20 Sasampune rauh ring arepan para pengedene,
irika ipun sami mabaos sapuniki,
“Makakalih anake puniki nenten tios anak Yahudi.
Ipun sane ngranayang kotan iragane biyut.
21 Samaliha ipun ngajahin awig-awig sane nglanggar ukum bangsa Romane.
Iraga nenten patut nerima wiadin ninutin awig-awige punika!”
22 Anake akeh sane wenten irika taler nglawan dane Paulus lan dane Silas.
Raris para pengedene nyetset penganggen danene makakalih saking ragan danene.
Tur ipun mrentahang anak mangda dane makakalih kapecutin.
23 Sasampune dane sareng kalih keras pisan kapecutin,
raris dane kakrangkeng ring buine.
Para pengedene mrentahang pemimpin buine nyaga dane sareng kalih mangda nenten mresidayang malaibang raga.
24 Krana prentahe punika,
pemimpin buine ngenahang dane ring kamar bui sane paling tengah.
Turmaning batis dane sareng kalih kapasung.
25 Nanging,
kirang langkung ring tengah lemenge,
dane Paulus lan dane Silas mabakti tur ngendingang kidung pamuji ngagungang Sang Hyang Pengardi.
Lan para bogolane sane lianan mirengin kakidungan danene sareng kalih.
26 Jeg saget wenten linuh sane ageng pisan,
kanti dasar wangunan buine punika magejeran.
Kenten pada makasami korin buine maampakan tur rante penegul para bogolane keles.
27 Pemimpin buine matangi tur nyingakin korin-korin buine maampakan.
Punika mawinan ipun ngaud pedang jagi nebek raga krana ipun ngaden para bogolane makasami sampun malaibang raga.
28 Nanging dane Paulus majeritan keras pisan sapuniki,
“Jero!
Jero!
Sampunang ja jero nebek raga!
Tiang makasami kari driki!”
29 Raris pemimpin buine nunas obor kapining pengayahnyane tur malaib ka jeroan.
Ipun matimpuh ring arepan dane Paulus lan dane Silas sambilanga ngejer.
30 Irika raris ipun makta dane Paulus lan dane Silas ka jaba saha mabaos sapuniki,
“Duh jero,
napike sapatutne laksanayang tiang mangdane tiang kaslametang saking dosan-dosan tiange?”
31 Raris dane Paulus lan dane Silas nyaurin ipun sapuniki,
“Pracaya ja kapining Sang Hyang Yesus mangda jerone lan saluirin anake sane meneng ring umah jerone jagi kaslametang!”
32 Irika raris dane Paulus lan dane Silas nerangang pengajahan Sang Ratu Agung kapining pemimpin buine sareng makasami anake sane meneng ring umahe punika.
33 Duk tengah lemenge punika,
pemimpin buine makta dane Paulus lan dane Silas mangda mersihin tatun danene sareng kalih.
Tur pramangkin pemimpin buine lan makasami anake sane meneng ring umahe punika kalukat dados tanda ipun ngiring Sang Hyang Yesus.
34 Sasampune kalukat,
pemimpin buine punika makta dane Paulus lan dane Silas ka umah ipune tur kasajiang ajengan.
Irika raris pemimpin buine sareng makasami anake ring umahe punika pada masukarena krana sampun pracaya kapining Sang Hyang Pengardi.
35 Benjang semengane,
para pengede Kota Pilipine ngutus polisi kotane ka buine.
Polisine punika makta pabesen mangda dane Paulus sareng dane Silas kabebasang.
36 Pemimpin buine raris nikayang pabesen saking pengede kotane ring dane Paulus sapuniki,
“Duh jero sareng kalih,
para pengedene sampun ngicen prentah mangda jerone sareng kalih kabebasang.
Durusang jero medal.
Rahayu ja mamargi!”
37 Nanging dane Paulus mabaos kapining polisi kotane punika sapuniki,
“Tiang sareng kalih madue hak krana tiang warga karajaan Roma.
Nanging tiang sareng kalih kapecutin ring arepan anake akeh yadiastun dereng kaadilin.
Turmaning tiang kacelepin ka buine!
Sane mangkin,
para pengedene nunden tiang sami medal mengkeb-mengkeb?
Nenten patut sekadi punika!
Nikain ja para pengedene praragan rauh mriki mangda mebasang tiang sareng kalih!”
38 Polisine raris nglapurang baos dane Paulus ring para pengede kotane.
Ritatkala para pengedene punika mirengin indik dane Paulus lan dane Silas punika warga karajaan Roma,
ipun dados jejeh.
39 Irika raris ipun ngrauhin dane Paulus lan dane Silas saha nunas sinampura.
Raris ipun sami nuntun dane Paulus lan dane Silas medal saking buine saha nunas mangda dane sareng kalih matilar saking kotane punika.
40 Sasampune dane Paulus lan dane Silas matilar saking buine,
raris dane sareng kalih luas ka umahne Ni Lidia.
Irika dane matemu sareng para pengiring Sang Hyang Yesuse tur ngibur manah ipun makasami.
Raris dane Paulus lan dane Silas matilar saking kotane punika.