Pasamuan Para Utusan Ring Kota Yerusalem
15
Kaceritayang mangkin,
wenten makudang anak Yahudi sane pracaya saking Wawidangan Yudea rauh ka Kota Antiokia.
Para anak Yahudine punika ngajahin para pengiring Sang Hyang Yesuse sapuniki,
“Yening ragane nenten masunat manut awig-awig agama Yahudine sane katulis olih dane Musa,
ragane nenten sida kaslametang saking ukuman ulian dosan-dosan ragane.”
2 Nanging dane Paulus lan dane Barnabas keras pisan nungkasin pengajahane punika.
Punika mawinan para pengiring ring Antiokia milih dane Paulus,
dane Barnabas,
sareng makudang pengiring sane lianan mangda luas ka Kota Yerusalem.
Tatujone mangda irika ipun sami mabligbagan indik prakarane punika sareng para utusane lan para penglingsir kraman Sang Hyang Yesuse.
3 Raris,
para krama druen Sang Hyang Yesuse sane ring Antiokia ngutus ipun sami ka Yerusalem.
Ritatkala ipun sami ngliwatin Wawidangan Penisia lan Samaria,
ipun pada nyeritayang indik akeh anak nenten Yahudi sampun masalin saking urip sane madosa lan pracaya kapining Sang Hyang Yesus.
Mirengin paindikane punika,
pengiringe irika pada kalintang masukarena.
4 Ritatkala ipun sami rauh ring Kota Yerusalem,
irika ipun sami kasambut olih para kramane,
para utusan Sang Hyang Yesuse,
muah para penglingsire.
Raris dane Paulus lan makasami sane nyarengin dane nyeritayang sekancan paindikan sane sampun kalaksanayang olih Sang Hyang Pengardi malantaran ipun sami.
5 Nanging wenten makudang anak pracaya saking soroh anak Parisine ngadeg saha mabaos sapuniki,
“Anak nenten Yahudi sane pracaya punika musti kasunat tur ninutin ukum dane Musa.”
6 Irika raris para utusane lan para penglingsire mapunduh jagi mabligbagan paindikane punika.
7 Sasampune sue mabligbagan,
raris dane Petrus ngadeg saha mabaos kapining ipun sami sapuniki,
“Duh para semeton!
Jerone sami uning Sang Hyang Pengardi sampun milih titiang dumunan saking jerone mangda midartayang Orti Rahayu kapining anak nenten Yahudi.
Tatujone mangda anake punika mirengin Orti Rahayune lan pracaya kapining Sang Hyang Yesus.
8 Samaliha,
Sang Hyang Pengardi sane uning manah manusane sami sampun kayun nerima bangsa-bangsa nenten Yahudi.
Paindikane punika mabukti ritatkala Sang Hyang Pengardi ngicen Roh Idane kapining anake punika,
pateh sekadi Roh Idane sane sampun kicen kapining iraga sami.
9 Sang Hyang Pengardi nenten ja mina-minayang iraga sami sareng ipun.
Ida nyuciang manah ipune krana ipun pracaya kapining Ida.
10 Sane mangkin,
napi mawinan jerone nglawan Sang Hyang Pengardi antuk ngicen awig-awig sane keweh ring para pengiringe punika?
Napike iraga sami tur para leluhur iragane mresidayang nglaksanayang awig-awige punika?
11 Pastika nenten mresidayang!
Nanging iraga pracaya yening iraga kaslametang krana wara nugraha Sang Hyang Yesus kamanten;
kenten pada ipun makasami.”
12 Makasami anake sane wenten irika mendep.
Raris ipun sami mirengin dane Paulus lan dane Barnabas nyeritayang praciri lan paindikan ngangobin sane sampun kalaksanayang olih Sang Hyang Pengardi malantaran dane ring bangsa nenten Yahudi.
13 Sasampune dane sareng kalih wusan mabaos,
irika raris dane Yakobus mabaos sapuniki,
“Duh para semeton,
pirengin ja titiang!
14 Simon Petrus sampun nyeritayang sekadi napi Sang Hyang Pengardi ngawitin nyuryanin anak nenten Yahudi.
Tatujone mangdane Ida milih anak saking bangsa nenten Yahudi dados krama druen Idane.
15 Paindikane punika manut sekadi trawangan para sinoman Sang Hyang Pengardi idumun sane katulis sapuniki,
16-18 “Sang Hyang Tunggal sampun nglaksanayang makasami paindikane puniki tur sampun ngortiang rencanan Idane saking idumun.
Ida masabda sapuniki,
‘Sasubane ento,
Nira bakal teka buin,
tur ngadegang buin kaluargan raja Daud ane suba uug
buka umahe ane uug kaadegang.
Nira bakal ngwangun buin uug-uugane ento
buka umah ane uug kabenehang kanti kukuh.
Tatujone apanga makejang bangsa tusing Yahudi bakal ngalih Nira.
Ia makejang bakal kadadiang krama druen Nirane.’”
Amos 9:11-12.
19 Dane Yakobus malih nglanturang mabaos sapuniki,
“Punika mawinan tiang mapineh nenten patut iraga makewehin anak nenten Yahudi sane sampun nyerahang raga nyembah Sang Hyang Pengardi.
20 Nanging iraga musti nulis surat nuturin ipun mangda nenten ngajeng ajengan sane cemer,
inggih punika surudan togog-togoge.
Tur mangdane ipun ngadohang raga saking paindikan cabul.
Turmaning mangdane ipun nenten ngajeng getih miwah daging beburon ane mati kacekuk.
21 Duaning ukum dane Musa sampun kawartayang ring sebilang kota.
Turmaning kantos mangkin ukume punika kawacenang sebilang rahina Sabat ring bale-bale wantilan agama Yahudine.”
Surat Majeng ring Krama Sang Hyang Yesus sane Nenten Yahudi
22 Raris para utusan Sang Hyang Yesus,
para penglingsir sareng makasami krama druen Sang Hyang Yesuse pada adung milih makudang krama.
Tatujone mangda ipun kautus ka Antiokia nyarengin dane Paulus lan dane Barnabas mrika.
Ipun sami milih dane Silas lan dane Yudas sane kasambat Barsabas.
Makakalih anake punika dados pemimpin para pengiring Sang Hyang Yesus ring Kota Yerusalem.
23 Irika dane Silas lan dane Yudas kapapetin surat.
Daging surate punika sekadi puniki,
“Majeng ring para semeton sane nenten Yahudi,
sane meneng ring Kota Antiokia tur Propinsi Siria lan Propinsi Kilikia.
Salam saking para utusan sareng para penglingsire makasami,
inggih punika para semeton jerone.
24 Titiang sami mirengin indik wenten makudang anak saking sekan titiange sane luas mrika tur ngajahin pengajahan sane ngranayang jerone bingung tur keweh.
Sujatine titiang sami nenten ja ngutus ipun mangda malaksana sekadi punika.
25 Punika mawinan titiang sami mabligbagan turmaning pada adung jagi ngutus anak sane sampun kapilih.
Tatujone mangda luas nyarengin dane Paulus lan dane Barnabas sane tresnain titiang sami.
26 Makakalih anake puniki sampun ngetohin uripne krana ngayahin Sang Ratu Agung iragane,
nenten tios Sang Hyang Yesus Kristus.
27 Sane mangkin,
titiang sami ngutus dane Yudas sareng dane Silas mangdane ipun sareng kalih nyeritayang langsung pidaging surate puniki kapining para semeton.
28 Santukan manut pikayunan Roh Sang Hyang Pengardi,
titiang sami pada adung mangda jerone nenten kicen awig-awig sane keweh.
Sapatutne jerone wantah ninutin awig-awige puniki:
29 sampunang ja jerone ngajeng surudan togog-togoge.
Tur sampunang ja ngajeng getih utawi ngajeng daging beburon sane mati kacekuk.
Turmaning jerone sami musti ngadohang raga saking paindikan cabul.
Yening jerone malaksana sekadi puniki,
jerone malaksana becik.
Inggih sekadi punika puputang titiang,
dumogi ja sami pada rahayu.”
30 Sasampune mapamit,
ipun sami luas nuju Kota Antiokia.
Ritatkala rauh irika,
dane sareng kalih ngamanggil saluirin krama druen Sang Hyang Yesuse mangda mapunduh.
Salanturnyane dane nyerahang surate punika.
31 Ritatkala para kramane irika ngwacen surate punika,
ipun sami pada liang krana surate punika ngibur manah ipune sami.
32 Dane Yudas sareng dane Silas sane taler dados sinoman Sang Hyang Pengardi sue nuturin pengiringe irika mangda ngibur lan ngukuhang manah ipune sami.
33 Sasampune dane Yudas sareng dane Silas sue meneng irika,
para pengiringe irika ngutus dane sareng kalih mawali ring anake sane ngutus dane idumun.
Irika ipun sami nunas ica mangda rahayu ring margine.
34 [Nanging dane Silas tetep meneng ring Kota Antiokia.]a
35 Kenten pada dane Paulus lan dane Barnabas sada sue meneng irika.
Tur dane sareng kalih ngajahin lan ngortiang pengajahan Sang Ratu Agung kasarengin akeh anake sane lianan.
Dane Paulus Matungkasan sareng Dane Barnabas
36 Sasampune sada sue,
raris dane Paulus mabaos kapining dane Barnabas sapuniki,
“Lan ja iraga luas buin nengokin para nyaman iragane di sebilang kota tongos iragane taen ngortiang pengajahan Sang Ratu Agung.
Tatujone apanga iraga nawang kenken kabarne ajak makejang ditu.”
37 Dane Barnabas meled ngajak dane Markus sane kasambat Yohanes nyarengin ipun sami.
38 Nanging dane Paulus marasa nenten pantes yening ngajak dane Markus.
Krana idumun dane Markus nenten malih meled nglanturang ayah-ayahan tur ngalain ipun sami ring Pampilia.
39 Punika mawinan dane Paulus lan dane Barnabas kalintang matungkasan kantos palas.
Raris dane Barnabas ngajak dane Markus malayar nuju pulo Siprus.
40 Nanging dane Paulus milih dane Silas mangda nyarengin dane.
Duk dane jagi luas,
para pengiring ring Antiokia nyerahang dane sareng kalih ring wara nugraha Sang Ratu Agung.
41 Raris dane Paulus lan dane Silas ngiterin Propinsi Siria lan Propinsi Kilikia.
Tur dane ngukuhang para kramane irika.