Dane Petrus Mabela Raga Kapining Para Kramane Ring Yerusalem
11
Para utusan Sang Hyang Yesus lan para pengiringe sane lianan ring Wawidangan Yudea mirengin indik bangsa nenten Yahudi pada pracaya kapining pengajahan Sang Hyang Pengardine.
2 Ritatkala dane Petrus mawali ka Kota Yerusalem,
dane matemu sareng anak Yahudi sane pracaya ring Sang Hyang Yesus.
Ipun sami nungkasin dane krana sampun nglanggar awig-awig agama Yahudine.
3 Ipun sami mabaos sapuniki,
“Sapatutne ragane nenten ngranjing ka jeron anak nenten Yahudi turmaning ngajeng sareng-sareng ipun sami.”
4 Irika raris dane Petrus meberang sekancan paindikan saking pengawit sekadi puniki,
5 “Ritatkala tiang sedek mabakti ring Kota Yope,
jeg saget tiang nyingak pelawatan saking Sang Hyang Pengardi.
Tiang nyingakin saking langite tedun sekadi kain lombeng.
Makapapat bucune magantung saking baduur,
saha kaine punika tedun ring arepan tiange.
6 Duk tiang nlektekin kaine punika,
wenten sekancan beburon sane mabatis papat,
beburon alas,
beburon sane ngrayang,
miwah paksi alas.
7 Raris tiang mirengin suara sane masabda kapining tiang sapuniki,
‘Wih Petrus!
Majujuk ja,
tampah ja beburone ene lan daar ja ebene!’
8 Nanging tiang matur sapuniki,
‘Duh Ratu,
sampunang ja!
Duaning titiang nenten taen ngajeng ajengan sane cemer manut awig-awig agama Yahudine.’
9 Nanging suarane punika masabda malih sapuniki,
‘Apa ja ane nikayang Nira dadi daar,
eda ja cening ngorahang cemer.’
10 Kantos ping tiga paindikane punika mamargi.
Raris,
saluirin kaine lan dagingnyane kaangkat mawali ka langite.”
11 “Nah jeg pramangkin,
wenten tatiga anak sane rauh saking Kota Kaisarea ngadeg ring arepan umah tiange nginep.
Anake punika kautus jagi ngrereh tiang.
12 Roh Sang Hyang Pengardi masabda kapining tiang sapuniki,
‘Eda ja sengsaya luas ajak anake ento.’
Duk punika,
tiang kasarengin nem diri semeton iragane sane Yahudi niki luas ka Kaisarea tur ngranjing ring jeron dane Kornelius.
13 Irika raris dane Kornelius nyeritayang kapining tiang sami indik dane nyingakin malekat adiri ngadeg ring tengah jeronnyane saha mabaos sapuniki,
‘Utus ja anak ka Kota Yope apanga mapagin anak ane madan Simon ane masih kasambat Petrus.
14 Anake ento bakal ngaba orti apanga ragane makejang ane ada di umah ragane kaslametang.’
15 “Nah,
duk tiang sedek mabaos irika,
jeg saget Roh Sang Hyang Pengardi tedun tur ngebekin anake sami punika,
pateh sekadi ritatkala Roh Idane tedun ring iraga idumuna.
16 Raris tiang inget indik Sang Hyang Yesus ngandika kapining iraga sekadi puniki,
‘Dane Yohanes nglukat nganggon yeh biasa,
sakewala cening makejang bakal kalukat nganggon Roh Sang Hyang Pengardi.’
17 Nah sane mangkin,
Sang Hyang Pengardi sampun ngicen Roh Idane kapining anake sane nenten Yahudi,
pateh sekadi iraga idumun ritatkala ngawitin pracaya kapining Sang Hyang Yesus Kristus.
Pastika tiang nenten mresidayang nambakin Sang Hyang Pengardi!”
18 Sasampune mirengin baos dane Petruse,
ipun sami nenten malih nungkasin dane.
Raris ipun sami ngagungang Sang Hyang Pengardi,
saha mabaos sapuniki,
“Yening kenten,
bangsa nenten Yahudi kicen margi olih Ida mangda masalin saking urip sane madosa lan nerima urip sane sujati.”
Krama Druen Sang Hyang Yesus ring Kota Antiokia
19 Kaceritayang mangkin,
para pengiring Sang Hyang Yesus sane wenten ring Kota Yerusalem kasiksa.
Paindikane punika ngawit saking dane Stepanus kapademang.
Punika mawinan wenten para pengiring Idane sane malaib maideh-idehan kantos ka Wawidangan Penisia,
Pulo Siprus,
lan Kota Antiokia.
Irika ipun sami ngortiang Orti Rahayune ring anak Yahudine kamanten.
20 Nanging wenten makudang pengiring Sang Hyang Yesuse punika sane maasal saking Pulo Siprus lan Kota Kirene rauh ka Kota Antiokia.
Para pengiringe punika taler ngortiang Orti Rahayu indik Sang Hyang Yesus kapining anak nenten Yahudib.
21 Krana kuasan Sang Hyang Pengardi ngebekin ipun sami tatkala ngortiang pengajahane,
akeh anake dados pracaya tur nyerahang raga nyembah Sang Ratu Agung.
22 Duk para krama druen Sang Hyang Yesuse sane ring Kota Yerusalem mirengin sekancan paindikane punika,
kramane irika ngutus dane Barnabas ka Antiokia.
23-24 Dane Barnabas puniki anak sane dharma tur kaebekin olih Roh Sang Hyang Pengardi.
Turmaning dane pracaya pisan kapining Sang Hyang Pengardi.
Ritatkala dane rauh irika,
manah danene liang pisan nyingakin bukti wara nugraha Sang Hyang Pengardi sane kapicayang ring anake irika.
Dane raris mituturin anake sami mangda yakti-yakti satya ngiring Sang Ratu Agung.
Irika akeh anake katuntun dados pengiring Idane.
25 Raris dane Barnabas luas ka Kota Tarsus ngrereh dane Saulus.
26 Sasampune dane matemu sareng dane Saulus,
dane Barnabas ngajak dane Saulus ka Kota Antiokia.
Atiban suene dane sareng kalih meneng sareng-sareng para krama druen Sang Hyang Yesuse irika sambilanga ngajahin anake akeh.
Ring kotane punika,
para pengiring Sang Hyang Yesuse ngawitin kasambat anak Kristenc.
27 Duk punika makudang sinoman Sang Hyang Pengardi rauh saking Yerusalem ka Antiokia jagi ngortiang pabesen saking Sang Hyang Pengardi.
28 Wenten adiri saking sinomane punika sane mapesengan Agabus.
Dane kaebekin olih Roh Sang Hyang Pengardi.
Punika mawinan dane ngadeg tur nrawang indik saluirin karajaan Romawined jagi keni bencana kakirangan ajengan sane ageng.
Paindikane punika yakti mamargi ritatkala Klaudius dados kaisar Romawi.
29 Irika raris para pengiring Sang Hyang Yesuse pada adung nyumbang manut sasidan-sidan ipune mangdane nulungin para semeton sane meneng ring Wawidangan Yudea.
30 Sasampune sumbangane punika kapunduhang,
dane Barnabas sareng dane Saulus kautus mangda nyerahang sumbangane punika kapining para penglingsir krama druen Sang Hyang Yesuse ring Yudea.