Dane Kornelius Nyingakin Malekat Saking Sang Hyang Pengardi
10
Ring Kota Kaisarea,
wenten adiri anak lanang sane mapesengan Kornelius.
Dane Kornelius punika dados prawira soroh tentara sane kasambat Pasukan Italia.
2 Dane Kornelius sareng kaluargannyane anak sane subakti lan jejeh kapining Sang Hyang Pengardi.
Tur dane sering mapitulung kapining anak Yahudine sane tiwas,
saha setata mabakti kapining Sang Hyang Pengardi.
3 Ring dina anu,
sawetara jam tiga sorene,
dane sedek mabakti.
Irika dane nyingakin adiri malekat sane kautus olih Sang Hyang Pengardi.
Malekate punika mabaos sapuniki,
“Wih Kornelius!”
4 Raris dane Kornelius nlektekin antuk manah sane jejeh saha matur sekadi puniki,
“Duh Ratu,
wenten napi?”
Malekate punika mabaos sapuniki,
“Makejang pinunas lan pitulungan ragane buat anak tiwas suba kaelingin olih Sang Hyang Pengardi.
5 Ane jani,
utus ja anak ka Kota Yope apanga mapagin anak ane madan Simon;
dane masih madan Petrus.
6 Dane Petrus nginep sid umah tukang kulit ane masih madan Simon.
Ia ngoyong di pasisir pasihe.”
7 Sasampune mabaos sapunika,
malekate punika matilar ngalain dane Kornelius.
Raris dane Kornelius ngamanggil kalih pengayahne sareng tentara pengabihne sane subakti kapining Sang Hyang Pengardi.
8 Tur,
sasampune dane Kornelius nyeritayang sekancan sane mamargi,
dane ngutus ipun makatiga ka Kota Yope.
Dane Petrus Nyingak Pelawatan saking Sang Hyang Pengardi
9 Benjangane,
para pengayah dane Kornelius kari ring pamargin ipune tur sampun nampek ring Kota Yope.
Duk punika,
sawetara jam roras tengaine,
dane Petrus munggah ka duur umahe sane rata jagi mabakti.
10 Raris dane meled pisan ngajeng krana marasa seduk.
Nanging ritatkala ajengane sedek kasiapang,
jeg saget dane nyingak pelawatan:
11 langite mabukak tur tedun ka tanahe sekadi kain lombeng.
Makapapat bucun kaine punika magantung saking baduur.
12 Ring tengah kaine punika wenten sekancan beburon sane mabatis papat,
beburon sane ngrayang,
miwah paksi-paksi alas.
13 Raris wenten suara sane masabda kapining dane sapuniki,
“Wih Petrus!
Majujuk ja,
tampah ja beburone ene tur daar ja ebene!”
14 Raris dane Petrus matur sapuniki,
“Duh Ratu,
sampunang ja!
Duaning titiang nenten taen ngajeng ajengan sane cemer manut awig-awig agama Yahudine.”
15 Suarane punika masabda malih sapuniki,
“Apa ja ane nikayang Nira dadi daar,
eda ja cening ngorahang cemer.”
16 Kantos ping tiga paindikane punika mamargi.
Raris kaine punika pramangkin kaangkat ka langite.
17 Dane Petrus raris mapineh-pineh napike artin pelawatane sane kacingakin punika.
Duk punika,
para utusan dane Kornelius manggihin umah I Simon tukang kulite;
ipun sampun wenten ring arepan angkul-angkule.
18 Pengayahe punika ngamanggil anak saha mataken,
“Napike Simon sane kasambat Petrus nginep iriki?”
19 Duk punika,
dane Petrus sedek mineh-minehang artin pelawatane punika,
Roh Sang Hyang Pengardi masabda sapuniki,
“Ada anak ajak tatelu ngalih cening.
20 Majujuk ja tur enggalang tuun!
Eda ja sengsaya luas ajak anake tusing Yahudi ento,
krana Nira sane nunden anake ento mai.”
21 Irika raris dane Petrus tedun tur mabaos ring para pengayah dane Kornelius sapuniki,
“Tiang niki sane rereh ragane.
Napike tatujon ragane mriki?”
22 Pengayahe punika masaur sapuniki,
“Titiang makatiga kautus mriki olih dane Kornelius,
prawira sane kaajiang olih saluirin anak Yahudine.
Dane Kornelius anak sane subakti tur jejeh kapining Sang Hyang Pengardi.
Dane sampun nerima sabdan Sang Hyang Pengardi malantaran malekat Idane,
mangda dane ngundang jero ka jeron danene,
tur irika dane prasida mirengin sekancan pengajahan jerone.”
23 Raris dane Petrus ngajak anake punika nginep irika.
Dane Petrus Ngortiang Orti Rahayu ring Jeron Dane Kornelius
Kaceritayang mangkin, benjangane dane Petrus matangi raris luas sareng-sareng para pengayahe punika. Tur wenten pada makudang pengiring Sang Hyang Yesuse saking Kota Yope nyarengin ipun sami.
24 Malih benjangane,
ipun sami rauh ring Kota Kaisarea.
Duk punika dane Kornelius sedek nyantosang ipun sami.
Irika dane sampun ngamanggil saha munduhang para semeton lan para sawitran danene.
25 Ritatkala dane Petrus rauh irika,
dane Kornelius nyambut dane Petrus raris matimpuh ring arepan danene tur nyembah dane.
26 Nanging dane Petrus ngedetin dane Kornelius saha mabaos,
“Matangi ja tur sampunang nyembah tiang!
Tiang niki manusa pateh sekadi jerone sami.”
27 Dane sareng kalih mabligbagan sambilanga ngranjing ka jeroan.
Ritatkala ngranjing ka jeroan,
dane Petrus napetang wenten anak akeh sedek mapunduh irika.
28 Raris dane Petrus mabaos kapining ipun sami sapuniki,
“Pastika jerone sampun uning awig-awig anak Yahudine.
Tiang sami nenten dados ngranjing ka jeron anak nenten Yahudi utawi sareng-sareng ipun sami.
Nanging Sang Hyang Pengardi sampun mitujuhin kapining tiang indik nenten wenten anak sane cemer.
29 Punika mawinan ritatkala pengayah jerone ngrauhin tiang,
tiang nenten ja nulak rauh mriki.
Nah sane mangkin,
napike mawinan jerone nunas mangdane tiang mriki?”
30 Raris dane Kornelius nyaurin sapuniki,
“Duk iteluna,
sekadi galahe mangkin sawetara jam tiga sorene,
tiang sedek mabakti ring jeron tiange iriki.
Jeg saget wenten malekat sane mapengangge sarwa makenyah ngadeg ring arepan tiange.
31 Tur malekate punika mabaos sapuniki,
‘Wih Kornelius!
Pinunas ragane sampun kapirengin olih Sang Hyang Pengardi turmaning Ida sampun eling parilaksanan ragane buat anak tiwas.
32 Ane jani,
utus ja anak ka Kota Yope apanga mapagin anak ane madan Simon ane kasambat Petrus.
Dane Petrus nginep sid umah tukang kulit ane masih madan Simon.
Ia ngoyong di pasisir pasihe.’
33 Punika mawinan tiang gelis-gelis ngutus pengayah sid jerone.
Tur becik pisan manah jerone krana sampun kayun rauh mriki.
Sane mangkin tiang sami sampun mapunduh iriki ring ajeng Sang Hyang Pengardi buat mirengin napi sane kanikayang Ida malantaran jerone.”
34 Raris dane Petrus ngawitin mabaos sapuniki,
“Sane mangkin tiang pedas uning Sang Hyang Pengardi nenten ja mina-minayang anak.
35 Sujatine Ida nerima sapa sira ja sane jejeh kapining Ida tur malaksana paindikane sane patut,
tanpa nyingakin napi bangsan ipune.
36 Jerone sami sampun uning daging orti sane kaprentahang olih Sang Hyang Pengardi ring bangsa Israele.
Orti Rahayune punika nenten tios orti sane ngranayang jerone mawali dame sareng Sang Hyang Pengardi malantaran Sang Hyang Yesus Kristus,
inggih punika Ratu Agung anake makasami.
37 Lan jerone pada uning napi sane kalaksanayang olih Sang Hyang Yesus ring saluirin Wawidangan Yudea.
Ayah-ayahan Idane punika kakawitin saking Galilea,
sasampun dane Yohanes nunden wargane irika malukat dados tanda masalin saking urip sane madosa.
38 Jerone pada uning indik Sang Hyang Yesus saking Desa Nasaret kapilih mangda kicen kuasa lan Roh Sang Hyang Pengardi.
Ida mamargi maideh-idehan makarya paindikan sane ngangobin.
Tur Ida nyegerin anake akeh sane kakuasain olih ratun para setane krana Ida kasarengin olih Sang Hyang Pengardi.
39 Tiang sareng sisiane sane lianan dados saksi indik pakaryan Idane ring Wawidangan Yudea lan ring Kota Yerusalem.
Yadiastun sekadi punika,
Ida kagantung ring kayu salibe tur kapademang olih anak Yahudine.
40 Nanging malih puaneb Sang Hyang Pengardi nguripang Ida malih sekadi jati mula lan ngedengang anggan Idane.
41 Duk punika Ida nenten ngedengang angga ring makasami anak Yahudine,
nanging ring anake sane sampun kapilih olih Sang Hyang Pengardi dados saksi.
Tiang sami sane sampun ngajeng lan nginum sareng Ida sasampune Ida kauripang malih saking anake padem.
42 Tur Ida mrentahang tiang sami mangda ngortiang Orti Rahayune ring anak Yahudine makasami.
Kenten pada mangda tiang sami dados saksi ngortiang indik Sang Hyang Yesus sane sampun kaangkat olih Sang Hyang Pengardi dados akim ring sekancan manusane sane maurip lan padem.
43 Kenten pada para sinoman Sang Hyang Pengardine idumun sampun taen nulis indik Ida.
Sapa sira ja sane pracaya ring Sang Hyang Yesus,
dosan-dosannyane kaampurayang malantaran kuasan Idane.”
44 Ritatkala dane Petrus sedek mabaos,
irika Roh Sang Hyang Pengardi tedun tur ngebekin anake sami sane mirengin orti saking dane.
45 Risedek nyaksiang paindikane sekadi punika,
anake pracaya saking Bangsa Yahudi sane nyarengin dane Petrus saking Kota Yope pada angob pisan.
Sujatine Roh Sang Hyang Pengardi taler kapicayang ring anake sane nenten Yahudi.
46 Krana anak Yahudine punika mirengin sekan dane Kornelius mawicara nganggen basa sane nenten taen ipun uningin saha ngagungang Sang Hyang Pengardi.
Punika mawinan dane Petrus mabaos sekadi puniki,
47 “Cingakin ja!
Ipun sami kapicayang Roh Sang Hyang Pengardi pateh sekadi iraga dumun.
Sujatine nenten wenten anak sane sida nambakin ipun sami kalukat nganggen toya biasa dados tanda ipun ngiring Sang Hyang Yesus Kristus.”
48 Irika raris dane Petrus nikain ipun mangda kalukat dados tanda ipun ngiring Sang Hyang Yesus Kristus.
Raris ipun sami nunas mangda dane Petrus meneng irika makudang dina malih.