Dane Saulus Masalin saking Urip sane Madosa
9
Kaceritayang mangkin,
dane Saulus sarat pisan nakut-nakutin lan meled pisan ngamademang para pengiring Sang Hyang Yesuse.
Dane luas sid rsi penglingsir agunge
2 jagi nunas surat kuasa mangda kabakta ring para pemimpin bale wantilan agama Yahudine ring Kota Damsik.
Tatujone,
ritatkala dane manggihin anak sane ninutin Margi sane katujuin olih Sang Hyang Yesus irika,
dane prasida ngejuk tur makta ipun ka arepan Pengadilan Agama Yahudine ring Kota Yerusalem.
3 Ritatkala dane Saulus sampun nampek ring Kota Damsik,
jeg saget wenten sinar saking langite ngiterin dane Saulus.
4 Irika raris dane nyelempoh ka tanahe saha mirengin suara sane masabda sapuniki,
“Saulus,
Saulus!
Ngudake cening nyiksa Nira?”
5 Raris dane Saulus matur sapuniki,
“Duh Ratu,
Sirake Iratu?”
Suarane punika masabda sapuniki,
“Nira ene Sang Hyang Yesus ane siksa cening.
6 Sakewala ane jani bangun ja tur luas ja ka kota.
Ditu cening bakal orahina apa ane musti laksanayang cening.”
7 Anake sane luas sareng dane Saulus makesiab kantos nenten mresidayang mawicara;
krana ipun mirengin suarane punika,
nanging nenten ja nyingakin sapa sira.
8 Raris dane Saulus matangi saha ngedatang peningalane nanging nenten mresidayang nyingakin napi-napi.
Punika mawinan anake sane sareng-sareng dane ngamel tangan danene tur nuntun dane ngranjing ka Kota Damsik.
9 Telung dina suene dane Saulus nenten mresidayang nyingakin saha nenten ngajeng lan nginum napi-napi.
10 Ring Kota Damsik,
wenten adiri pengiring Sang Hyang Yesuse sane mapesengan Ananias.
Dane nyingakin pelawatan saking Sang Ratu Agung sane masabda sapuniki,
“Wih Ananias!”
Raris dane Ananias masaur sapuniki,
“Inggih Ratu,
niki titiang.”
11 Sang Ratu Agung masabda malih sapuniki,
“Luas ja cening ka umah I Yudas di jalan ane madan Jalan Leser.
Alih ja anak ane madan Saulus uli Kota Tarsus.
Ia sedek mabakti di umahe ento.
12 Ditu ia suba maan pelawatan nepukin ceninga teka ngenahang tangan di duur sirahne apanga ia nyidang ningalin buin.”
13 Irika raris dane Ananias matur sapuniki,
“Duh Ratu,
titiang sampun mirengin saking anake akeh indik anake puniki.
Ipun sampun akeh nyiksa para krama suci Iratune ring Kota Yerusalem.
14 Tur,
sane mangkin ipun sampun rauh mriki makta surat kuasa saking para pemimpin rsine mangda ngejuk makasami anake sane pracaya ring Iratu.”
15 Nanging Sang Ratu Agung malih masabda kapining dane Ananias sapuniki,
“Luas ja cening krana Nira suba milih ia apanga dadi pengayah Nirane.
Ia bakal ngortiang indik Nira sid bangsa-bangsane lenan ane tusing Bangsa Israel,
sid para rajane,
turmaning sid para krama Israele.
16 Buina,
Nira praragan bakal ngedengang teken ia amat ke liune kasengsaran ane musti tandahanga krana ngortiang indik Nira.”
17 Irika raris dane Ananias luas ka umahe punika,
genah dane Sauluse nginep.
Raris dane Ananias ngenahang tangannyane ring duur sirah dane Sauluse.
Tur dane Ananias mabaos sapuniki,
“Duh jero Saulus semeton tiange,
Sang Hyang Yesus ngedengang angga kapining jero ring margi sane nuju ka kotane iriki.
Ida sane nikain tiang mriki sid jerone mangda jerone prasida nyingak malih tur mangda jerone kaebekin olih Roh Sang Hyang Pengardi.”
18 Jeg pramangkin wenten sekadi sisik ulam ulung saking peningalan dane Sauluse.
Irika raris dane Saulus prasida nyingakin malih.
Sasampune kenten,
dane ngadeg tur kalukat dados tanda dane ngiring Sang Hyang Yesus.
19 Sasampune dane ngajeng,
dane mawali kuat.
Dane Saulus Ngortiang Orti Rahayu ring Kota Damsik
Makudang dina suene dane Saulus meneng ring Kota Damsik sareng para pengiring Sang Hyang Yesuse.
20 Irika dane pramangkin nyeritayang ring bale-bale wantilan agama Yahudine indik Sang Hyang Yesus punika Putran Sang Hyang Pengardi.
21 Anake akeh pada angob mirengin dane Saulus.
Ipun sami mabaos sapuniki,
“Boyake anake puniki sane ngutsahayang ngamademang sewatek anake pracaya kapining Sang Hyang Yesus ring Kota Yerusalem?
Samaliha,
tatujon ipune mriki jagi ngejuk tur makta para pengiringe ka arepan para pemimpin rsine ring Yerusalem.”
22 Nanging dane Saulus ngancan sue ngancan mawibawa nyeritayang indik Sang Hyang Yesus.
Tur dane ngranayang paling anak Yahudine sane meneng ring Kota Damsik,
krana dane muktiang saking Cakepan Suci yening Sang Hyang Yesus punika Sang Prabu Sane Kajanjiang olih Sang Hyang Pengardi.
23 Sasampun makudang dina suene,
para pemimpin Yahudine pada adung jagi ngamademang dane Saulus.
24 Duk punika,
lemah peteng anak Yahudine nyantosang dane Saulus ring pamedal kotane mangda prasida ngamademang dane.
Nanging dane Saulus uning rencanan ipune sami.
25 Punika mawinan ring galah wengine,
para pengiring dane Sauluse nulungin dane mangda prasida magedi saking kotane punika.
Raris dane Saulus katedunang nganggen keranjang ngliwatin tembok kotane.
Dane Saulus Mawali ka Kota Yerusalem
26 Sasampune dane Saulus rauh ring Kota Yerusalem,
dane ngutsahayang mangda macampuh sareng para pengiring Sang Hyang Yesuse.
Nanging para pengiringe pada jejeh kapining dane Saulus,
krana ipun nenten pracaya indik dane Saulus yakti dados pengiring Sang Hyang Yesuse.
27 Raris dane Barnabas nerima tur makta dane Saulus ring para utusan Sang Hyang Yesuse.
Irika dane Barnabas nyeritayang indik dane Saulus sampun nyingakin Sang Ratu Agung sane masabda kapining dane ritatkala dane luas nuju Kota Damsik.
Kenten pada dane Barnabas nyeritayang indik dane Saulus sane wanen ngajahin anak Yahudine indik Sang Hyang Yesus irika.
28 Punika mawinan dane Saulus prasida sareng-sareng para pengiring Sang Hyang Yesuse ring Kota Yerusalem.
Tur dane wanen ngajahin anak Yahudine indik Sang Hyang Yesus.
29 Dane Saulus pada majulat raos indik Cakepan Suci sareng soroh anak Yahudine sane mabasa Yunani.
Nanging ipun sami ngutsahayang jagi ngamademang dane.
30 Tatkala anake sane pracaya kapining Sang Hyang Yesus uning paindikane punika,
ipun sami makta dane Saulus ka Kota Kaisarea,
tur dane luas ka Kota Tarsus.
31 Kaceritayang mangkin,
para krama druen Sang Hyang Yesuse sane wenten ring Wawidangan Yudea,
Galilea,
lan Samaria makasami pada dame.
Lan para kramane punika dados kuat krana Roh Sang Hyang Pengardi ngibur manah ipune.
Turmaning para kramane punika ngancan ngakehang.
Samaliha ipun sami ngajiang Sang Ratu Agung.
Dane Petrus Makarya Paindikan sane Ngangobin
32 Kaceritayang mangkin,
dane Petrus luas maideh-idehan ring Wawidangan Yudea lan Samaria.
Tur dane ngrauhin para krama suci sane meneng ring Desa Lida.
33 Irika dane matemu sareng anak lanang sane mapesengan Eneas.
Anake punika sampun kutus tiban sungkan lumpuh kantos nenten taen matangi saking pasareane.
34 Dane Petrus raris mabaos kapining ipun sapuniki,
“Duh Eneas!
Sang Hyang Yesus Kristus nyegerin ragane.
Matangi ja tur tampedang pasarean ragane.”
Irika jeg pramangkin I Eneas bangun.
35 Ritatkala makasami warga Kota Lida lan warga Wawidangan Saron nyingakin I Eneas seger,
ipun sami dados pracaya kapining Sang Hyang Yesus.
36 Kaceritayang mangkin,
ring Kota Yope wenten anak istri adiri,
inggih punika pengiring Sang Hyang Yesus sane mapesengan Ni Tabita.
Wastannyane ring basa Yunani nenten tios Ni Dorkas sane maarti kidang.
Ipun setata malaksana becik pisan lan sering mapitulung kapining anak sane tiwas.
37 Duk punika Ni Tabita sungkan kantos ngemasin padem.
Sasampune sawan ipune kasiramin,
sawane punika raris kagenahang ring kamare sane baduur yadiastun musti gelis kapendem.
38 Krana Kota Yope punika nenten ja adoh saking Desa Lida,
para pengiring Sang Hyang Yesuse ring Kota Yope mirengin indik dane Petrus wenten ring Desa Lida.
Punika mawinan para pengiringe punika ngutus kalih anak kapining dane Petrus mangda mabesen sapuniki,
“Gelisang ja rauh mriki.”
39 Raris dane Petrus madabdaban tur luas sareng-sareng ipun.
Sasampune rauh ring Kota Yope,
dane Petrus kabakta ka kamare sane baduur punika.
Raris para janda sane wenten irika,
nampekin dane Petrus.
Ipun sami sedek nangis saha ngedengin baju miwah jubah sane kakaryanin olih Ni Tabita ritatkala kari maurip.
40 Nanging dane Petrus nikain ipun sami mangda medal saking kamare punika.
Raris dane praragan matimpuh saha nunas ica.
Sasampune kenten dane marep ka sawane punika saha mabaos sapuniki,
“Wih Tabita,
matangi ja!”
Irika Ni Tabita ngedatang peningalannyane.
Tur ritatkala Ni Tabita nyingakin dane Petrus,
ipun raris malinggih.
41 Dane Petrus raris ngamel tangan Ni Tabita tur nulungin ipun matangi.
Raris dane Petrus ngamanggil para krama sucine miwah para jandane saha ngedengang Ni Tabita sane sampun maurip malih kapining ipun sami.
42 Irika orti paindikan sane ngangobin punika kasub ring saluirin Kota Yope.
Punika mawinan akeh anake irika dados pracaya kapining Sang Ratu Agung.
43 Sasampune paindikane punika,
dane Petrus kari meneng ring Kota Yope makudang dina malih.
Dane meneng ring umah tukang kulit sane mapesengan Simon.