Dane Petrus sareng Dane Yohanes ring Arepan Pengadilan Agama Yahudi
4
Risedek dane Petrus sareng dane Yohanes mabaos ring anake akeh,
irika raris rauh para pemimpin rsi,
soroh Sadukia sareng pemimpin tukang jaga Genah Agung Mabaktine.
2 Ipun sami kalintang gedeg krana dane Petrus sareng dane Yohanes midartayang ring anake akeh indik Sang Hyang Yesus sampun urip malih sekadi jati mula.
Paindikane punika muktiang yening anake padem jagi urip malih.
3 Raris dane Petrus sareng dane Yohanes kaejuk tur kakrangkeng ring buine.
Krana sampun wengi,
dane sareng kalih kakrangkeng ring buine kantos benjangane.
4 Nanging saking anake sane sampun mirengin pengajahan saking dane Petrus sareng dane Yohanes,
akeh sane pracaya ring Sang Hyang Yesus.
Anake sane pracaya sawetara akehne kantos limang tali (5.000) diri anak lanang dereng kapetek anak istri wiadin alit-alit.
5 Benjangane para pemimpin Yahudi,
tur para guru agama Yahudi,
kenten pada seka Pengadilan Agama Yahudi sane lianan mapunduh ring Kota Yerusalem.
6 Ipun matemu sareng dane Hanas nenten tios rsi penglingsir agung.
Kenten pada wenten dane Kayapas,
dane Yohanes lan dane Aleksander tur saluirin kaluarga rsi penglingsire punika.
7 Raris dane Petrus sareng dane Yohanes kabakta ring arepan pengadilan agamane punika tur katakenang sekadi puniki,
“Kuasa sekadi napi lan kuasa saking sirake kaanggen nglaksanayang paindikane punika?”
8 Raris dane Petrus sane kaebekin olih Roh Sang Hyang Pengardi nyaurin sekadi puniki,
“Duh para pemimpin bangsa lan para penglingsir!
9 Dinane mangkin titiang sareng kalih kaadilin krana malaksana paindikan sane becik ring anak lumpuh,
turmaning titiang sareng kalih kaadilin krana jerone sami meled uning punapike carane anake punika kasegerin.
10 Sane mangkin jerone sami lan anak Israel musti uning indik anak lumpuh puniki seger tur majujuk jegjeg ring arep jerone sami krana kuasan Sang Hyang Yesus Kristus anak saking Desa Nasaret punika.
Jerone makasami sampun ngamademang Ida ring kayu salibe,
nanging Sang Hyang Pengardi sampun nguripin malih Ida sekadi jati mula.
11 Wenten trawangan saking Cakepan Sucine indik Sang Hyang Yesus sane kaumpamiang sekadi batu dasar sapuniki:
‘Batu sane kakutang olih tukang-tukange,
sampun dados batu dasar utama.’ Kidung 118:22.
12 “Sujatine wantah malantaran Sang Hyang Yesus kamanten manusane prasida karahayuang.
Krana ring jagate puniki nenten wenten anak lianan sane kautus olih Sang Hyang Pengardi mangda ngrahayuang manusane saking ukuman ulian dosa.”
13 Irika raris Pengadilan Agama Yahudine angob nyaksiang kawanenan dane Petrus sareng dane Yohanes ring pengadilane punika.
Samaliha ipun sami uning dane sareng kalih wantah panjak biasa sane nenten taen masekolah agama Yahudi.
Raris ipun sami eling yening dane Petrus sareng dane Yohanes punika malajah saking Sang Hyang Yesus idumun.
14 Nanging ipun nenten mresidayang nglawan dane Petrus sareng dane Yohanes krana anake sane sampun kasegerin punika ngadeg irika.
15 Punika mawinan para pemimpin agama Yahudine punika nunden dane Petrus sareng dane Yohanes mangda medal saking genah Pengadilan Agama Yahudine.
Raris para pemimpine punika sangkep,
16 saha mabaos sapuniki,
“Sane mangkin jagi punapiang I Petrus sareng I Yohanes puniki?
Sami anake sane wenten ring Kota Yerusalem sampun uning indik ipun makarya paindikan sane ngangobin.
Iraga nenten mresidayang nulak paindikane punika.
17 Nanging mangdane nenten ngakehang anake mirengin paindikan angob punika,
becikan yening iraga nakut-nakutin ipun lan nenten nadosang ipun mawicara malih ring sapa sira ja nganggen pesengan Yesus punika.”
18 Raris Pengadilan Agama Yahudine ngamanggil dane Petrus sareng dane Yohanes.
Sasampune ngranjing ring genah pengadilan punika,
dane sareng kalih kanikain mangda nenten pisan dados mawicara lan ngajahin indik Sang Hyang Yesus.
19 Nanging dane Petrus sareng dane Yohanes nyaurin ipun sami sapuniki,
“Indayang ja jerone sami minehang cenke sane patut ring ajeng Sang Hyang Pengardi:
satinut kapining jerone sami utawi satinut kapining Sang Hyang Pengardi.
20 Krana titiang musti midartayang ring anake lianan paindikan sane sampun pirengin lan cingakin titiang indik Sang Hyang Yesus.”
21 Kaceritayang mangkin,
anake akeh irika ngagungang Sang Hyang Pengardi krana paindikan sane ngangobin punika.
Punika mawinan Pengadilan Agama Yahudi jejeh ngukum dane sareng kalih.
Dane sareng kalih keras katakut-takutin,
nanging pamuputne dane kabebasang.
22 Anake sane kasegerin malantaran paindikan sane ngangobin punika sawetara mayusa petang dasa tiban lebih.
Para Pengiring Sang Hyang Yesus Nunas Pitulung ring Sang Hyang Pengardi
23 Sasampune dane Petrus sareng dane Yohanes kabebasang,
raris dane sareng kalih mawali ring para semeton sane pracaya.
Tur dane nyeritayang sekancan sane kabaosang olih para pemimpin rsi lan para penglingsir Yahudine.
24 Sasampune mirengin baos dane Petrus sareng dane Yohanes indik nenten dados mawicara nganggen parab Sang Hyang Yesus,
ipun makasami pada adung nunas pitulung ring Sang Hyang Pengardi saha matur sekadi puniki,
“Duh Ratu Sang Hyang Pengardi!
Iratu sane ngardi langit miwah jagate tur segara lan sekancan dagingnyane.
25 Antuk Roh Iratune,
Iratu polih masabda sekadi sane katulis olih leluhur titiange sang raja Daud,
inggih punika parekan Iratune.
Sabdane punika indik Iratu sane jagi katungkasin sekadi puniki:
‘Ngudake anake sane boya Bangsa Yahudi pada mamedih?
Ngudake bangsa-bangsa madue rencana sane nenten maguna?
26 Para raja ring jagate pada siaga maperang
lan para pemimpin mapunduh
pada adung nglawan Sang Hyang Tunggal sareng Sang Prabu sane kapilih Ida.’ Kidung 2:1-2.
27 “Santukan mula saja raja Herodes lan gubernur Pilatus sampun mapunduh sareng-sareng anake sane nenten Bangsa Yahudi,
lan anak Yahudi ring Kota Yerusalem punika.
Ipun sami pada mapunduh jagi nglawan Sang Hyang Yesus,
inggih punika Parekan suci sane sampun pilih Iratu.
28 Ipun sami sampun nglaksanayang saluirin paindikane punika ring Ida,
sekadi sane sampun pastiang Iratu idumun manut kuasa lan rencanan Iratune.
29 Sane mangkin,
duh Sang Hyang Pengardi,
cingakin ja titiang sami krana Pengadilan Agama Yahudine punika nakut-nakutin titiang sami.
Tur lugrahin ja titiang sami para parekan Iratune puniki mangda wanen midartayang sabdan Iratune ring anake lianan.
30 Duh Sang Hyang Pengardi,
lugrahin ja titiang sami pitulungan mangda anake sungkan kasegerin miwah praciri lan paindikan sane ngangobin prasida kalaksanayang malantaran kuasan Sang Hyang Yesus Kristus,
Parekan Iratune sane suci punika.”
31 Sasampune ipun sami wusan mapinunas,
jeg saget magejeran genah ipune mapunduh.
Irika ipun makasami kaebekin olih Roh Sang Hyang Pengardi,
tur ipun sami ngancan wanen midartayang Sabdan Idane ring anake lianan.
Para Pengiring Sang Hyang Yesuse Makasami pada Adung
32 Sekancan anake sane pracaya ring Sang Hyang Yesus,
manah lan idep ipune pada adung.
Adiri ja saking para pengiringe punika nenten wenten marasa druene dados druen praragan,
nanging sekancan druene dados druen sareng-sareng.
33 Tur malantaran kuasa sane ageng,
para utusan Sang Hyang Yesuse nyeritayang ring anake lianan indik Sang Hyang Yesus sampun maurip malih sekadi jati mula.
Raris anake pracaya punika nerima wara nugraha ageng saking Sang Hyang Pengardi.
34 Samaliha nenten wenten anake sane pracaya ring Sang Hyang Yesus sane uripne kakirangan,
santukan anake sane madue umah wiadin pategalan ngadol druene punika.
Raris asilne kabakta
35 tur kaserahang ring para utusane mangda kaedum-edumang manut kaperluannyane suang-suang.
36 Duk punika wenten anak saking soroh Lewib sane mapesengan Yusup.
I Yusup puniki maasal saking Pulo Siprus.
Para utusan Sang Hyang Yesuse nyambat ipun I Barnabas sane maarti,
‘sane ngibur manah.’
37 Kenten pada I Barnabas puniki ngadol pategalane raris asilne kabakta ring para utusan Sang Hyang Yesus.