Dane Petrus Nyegerin Anak Sungkan Lumpuh
3
Ring dina anu duk jam tiga sore,
dane Petrus sareng dane Yohanes luas ka Genah Agung Mabakti kapining Sang Hyang Pengardi jagi sareng-sareng ring acara mabakti.
2 Ring kori sane kasambat Kori Luih,
irika wenten anak lanang sane lumpuh saking lekad.
Sebilang dina ipun kabakta mrika mangda idih-idih ring anake sane ngranjing ka genah mabaktine.
3 Ritatkala anake lumpuh nyingakin dane Petrus sareng dane Yohanes sedek ngranjing ka genah mabaktine punika,
ipun matur sapuniki,
“Icen ja titiang nunas jinah akidik!”
4 Dane Petrus sareng dane Yohanes nlektekin anake lumpuh punika lan dane Petrus mabaos sapuniki,
“Cingakin ja tiang sareng kalih.”
5 Irika raris anake lumpuh punika nyingakin dane makakalih krana ipun ngaden jagi kicen jinah.
6 Nanging dane Petrus mabaos sapuniki,
“Tiang nenten pisan madue jinah.
Nanging napi sane gelahang tiang jagi aturang tiang kapining ragane.
Madasar kuasa Sang Hyang Yesus Kristus anak saking Desa Nasaret punika,
mamargi ja!”
7 Raris dane Petrus ngamel tangan kenawan anake lumpuh punika saha nulungin ipun mangda ngadeg.
Jeg pramangkin batis anake lumpuh punika dados kuat.
8 Ipun ngencolang ngadeg tur mamargi kemu-mai.
Raris ipun nututin dane Petrus sareng dane Yohanes ka jeroan genah mabaktine saha mamargi tur ancog-ancog sambilanga ngagungang Sang Hyang Pengardi.
9 Makasami anake irika nyingakin anake lumpuh punika mamargi saha ngagungang Sang Hyang Pengardi.
10 Irika raris anake akeh eling yening anake punika nenten tios anak sane biasane idih-idih ring Kori Luih genah mabaktine.
Anake sami pada bengong lan angob pisan nyingakin paindikane sane mamargi ring anake punika.
Dane Petrus Midartayang Indik Sang Hyang Yesus sane Nyegerin Anak Lumpuh
11 Duk punika anake sane sampun kasegerin tetep nugtug dane Petrus sareng dane Yohanes.
Ritatkala ipun makatiga rauh ring amben genah mabaktine sane kasambat “Amben Salomo,”
makasami anake malaib magrunyung mrika krana angob.
12 Ritatkala dane Petrus nyingakin anake akeh punika,
dane mabaos sapuniki,
“Duh semeton anak Israel,
ngudake para semeton angob nyingakin paindikane puniki?
Tur ngudake semeton kari nlektekin tiang sareng dane Yohanes sekadi punika?
Nenten ja ulian kuasan tiange anake puniki kasegerin.
Sampunang ja mapineh yening anake puniki kasegerin krana tiang sareng kalih anak sane dharma.
13 Leluhur iragane,
inggih punika dane Abraham,
dane Isak,
lan dane Yakub nyembah Sang Hyang Pengardi.
Ida punika sampun ngagungang Parekan Idane,
nenten tios Sang Hyang Yesus.
Sang Hyang Yesus punika sane serahang semeton kapining gubernur Pilatus mangda kaukum padem.
Irika,
semeton nulak Ida ring arepan gubernur Pilatus,
yadiastun gubernur Pilatus sampun mutusang jagi mebasang Ida.
14 Turmaning semeton sami nulak Sang Hyang Yesus sane suci lan dharma punika.
Samaliha semeton sami nunas ring gubernur Pilatus mangda mebasang adiri anak sane sampun ngamademang anak.
15 Sekadi punika semeton sami ngamademang Ida,
inggih punika Anak sane ngicen manusane urip salamin-laminne.
Nanging Sang Hyang Pengardi sampun nguripin Ida malih saking anake padem.
Tiang sami sane dados saksi paindikane punika.
16 Anake lumpuh sane cingakin lan uningang para semeton sampun kuat krana tiang sami pracaya kapining kuasan Sang Hyang Yesus.
Malantaran kuasan Idane punika,
anake puniki kasegerin ring arepan semeton sami.
17 “Duh semeton sareng sami!
Tiang uning indik semeton sami sareng para pemimpin semetone nenten uning napi sane kalaksanayang kapining Sang Hyang Yesus.
18 Nanging malantaran paindikane punika,
Sang Hyang Pengardi sampun nglaksanayang saluirin sane kaortiang Ida malantaran para sinomane idumun.
Trawangane punika nenten tios indik Sang Prabu Sane Kajanjiang musti sengsara.
19 Nah,
sane mangkin para semeton musti masalin saking urip sane madosa tur mawali ring Sang Hyang Pengardi mangda dosan-dosan semetone kaampurayang.
20 Samaliha semeton musti malaksana sekadi punika mangda kicen seger jiwatman semetone,
tur mangda Sang Hyang Pengardi ngutus Sang Hyang Yesus dados Sang Prabu sane sampun kapastiang saking idumun buat semeton.
21 Ida musti meneng ring swarga kantos sekancan paindikane mawali seger.
Paindikane punika sampun kanikayang olih Sang Hyang Pengardi idumun ring tulisan para sinoman sane suci.”
22 Dane Petrus malih nglanturang mabaos sapuniki,
“Dane Musa taen mabaos sapuniki,
‘Sang Hyang Pengardi,
Sasembahan Tunggal semetone jagi ngutus adiri sinoman saking bangsan semetone praragan sane jagi dados sinoman sekadi tiang.
Semeton musti mirengin sekancan sane kanikayang dane.
23 Sapa sira ja sane nenten ninutin pengandikan sinomane punika,
ipun jagi katundung saking kraman Sang Hyang Pengardine tur kasirnayang.’ Pengeling-eling 18:15,18,19.
24 “Lan sekancan sinoman ngawit saking dane Samuela kantos para sinoman lianan sane kautus salanturnyane sampun ngortiang indik jaman iragane mangkin.
25 Sujatine,
semeton sami sane ngwarisin makasami janjin Sang Hyang Pengardine sane kabaosang olih para sinomane punika.
Kenten pada,
semeton sane ngwarisin janjin Idane kapining leluhur iragane ritatkala Ida masabda ring dane Abraham sapuniki,
‘Malantaran soroh sentanan ceninge,
makejang bangsane di gumine bakal nerima pica.’ Purwakaning Dadi 22:18
26 Punika mawinan Sang Hyang Pengardi ngangkat tur ngutus Sang Hyang Yesus,
Parekan Idane,
dumunan sid semeton Bangsa Yahudine.
Tatujone mangda Ida ngicenin pica ring semeton mangda masalin saking urip sane madosa lan jaat.”