PAMARGIN PARA UTUSAN
Para utusane kasiapang mangda nglaksanayang ayah-ayahan
1:1-26
Pengater Surat Dane Lukas
1
Duh jero Teopilus,
tiang sampun nulis cakepan sane kapertamaa kapining jerone.
Ring cakepane punika,
tiang nyeritayang sekancan pakaryan lan pengajahan Sang Hyang Yesuse uling Ida ngawitin pakaryan Idane
2 kantos munggah ka swarga.
Sadereng Ida munggah ka swarga,
Ida sampun ngicen prentah antuk kuasan Roh Sang Hyang Pengardi kapining anak sane kapilih dados para utusan Idane.
3 Sasampune nandang sengsara,
Ida seda ring kayu salibe,
raris Ida maurip malih sekadi jati mula.
Paindikane punika kabuktiang tatkala Ida ngedengang angga kapining para utusan Idane kantos petang dasa (40) dina suene.
Duk punika,
para utusane sering nyingakin Ida saha mirengin pengandikan Idane indik galah Sang Hyang Pengardi mamrentah dados Raja ring jagate.
4 Ring dina anu,
risedek Sang Hyang Yesus ngajeng sareng para utusan Idane,
Ida raris ngandika sapuniki,
“Eda ja cening pesu uli Kota Yerusalem.
Antiang ja dini pica sane kajanjiang olih Sang Hyang Aji tekening cening.
Janjine ento tusing ada len janji ane taen orahang Nira tekening cening.
5 Dugas dane Yohanesb nu idup,
dane nglukat murid danene nganggon yeh biasa dadi tanda ia masalin uling idup ane madosa.
Sakewala bakal enggal teka dinane,
cening bakal kalukatc tusing ja nganggon yeh nanging nganggon Roh Sang Hyang Pengardi.”
Sang Hyang Yesus Kaunggahang ka Swarga
6 Kaceritayang mangkin,
para utusane punika mapunduh sareng Sang Hyang Yesus saha mataken sapuniki,
“Ratu,
napike mangkin Iratu jagi ngrajegang malih karajaan Bangsa Israele sekadi idumun?”
7 Raris Sang Hyang Yesus nyaurin sapuniki,
“Cening tusing perlu nawang buin pidan galahe ento;
galahe ento bakal kapastiang olih kuasan Sang Hyang Aji praragan.
8 Sakewala cening bakal nerima kuasa tatkala Roh Sang Hyang Pengardi tedun sid ceninge apanga cening nyeritayang unduk Nirane di Kota Yerusalem,
di saluirin Wawidangan Yudea,
di wawidangan anak Samaria,
kanti saluirin jagat.”
9 Sasampune ngandika sapunika,
Sang Hyang Yesus raris kaunggahang ka swarga olih Sang Hyang Pengardi.
Para utusan Idane nyaksiang paindikane punika kantos Ida kalingkubin antuk ambu.
10 Risedek para utusane kari nyengenget ka langite,
jeg saget wenten kakalih malekat sane mapengangge putih ngadeg nampek danene.
11 Malekate punika mabaos sapuniki,
“Wih para anak Galileane!
Ngudake ragane ngadeg saha nyengenget ka langite?
Sang Hyang Yesus sampun kaunggahang ka swarga ngalain ragane,
nanging Ida jagi mawali malih ka jagate patuh buka ane tingalin ragane dinane jani.”
Dane Matias Kapilih Ngantinin I Yudas
12 Kaceritayang mangkin,
para utusan Sang Hyang Yesuse mawali ka Kota Yerusalem saking Bukit Saitun,
sane adohnyane kirang langkung akilo (1 km).
13 Sasampune rauh ring Kota Yerusalem,
makasami para utusane raris ngranjing ka genah ipune nginep.
Raris ipun sami munggah ka kamar sane ring baduur.
Makasami para utusane punika nenten tios dane Petrus,
dane Yohanes,
dane Yakobus,
dane Andreas,
dane Pilipus,
dane Tomas,
dane Bartolomeus,
dane Matius,
dane Yakobus okan dane Alpiuse,
dane Simon anak sane nasionalisd,
sareng dane Yudas okan dane Yakobuse.
14 Irika para utusane kasarengin para anak istri miwah dane Maria,
ibun Sang Hyang Yesuse,
sareng para semeton Idane.
Ipun sami pada seleg mabakti antuk manah sane adung.
15 Malih makudang dinane,
tatkala para pengiring Sang Hyang Yesuse mapunduh,
wenten kirang langkung satus duang dasa (120) diri irika.
Raris dane Petrus ngadeg tur mabaos sapuniki,
16 “Duh para semeton!
Napi sane katulis ring Cakepan Sucine musti mamargi.
Duk jaman idumun,
raja Daud polih trawangan saking Roh Sang Hyang Tunggal indik I Yudas,
inggih punika pemimpin seka sane ngejuk Sang Hyang Yesus.
17 I Yudas pada ngayah sareng-sareng tiang sami.”
18 Paindikan I Yudas sapuniki:
ipun sampun numbas tanah nganggen jinah asil ipune malaksana corah kapining Sang Hyang Yesus.
Ring tanahe punika,
I Yudas labuh makakeb raris padem tur weteng ipune bedah kantos daging wetengnyane mabrarakan.
19 Saluirin anake ring Yerusalem pada uning paindikane punika.
Punika mawinan tanahe punika kasambat Akeldama ring basa Ibrani sane maarti Karang Getih.
20 Raris dane Petrus malih nglanturang mabaos indik Yudas sapuniki,
“Krana ring Cakepan Kidung wenten katulis sapuniki,
‘Banggiang ja umah ipune suung,
tur nenten wenten anak sane meneng irika.’
Lan wenten pada katulis sapuniki,
‘Banggiang ja tugas ipune kaambil olih anak lianan.’ Kidung 69:26; Kidung 109:8.
21-22 “Punika mawinan patut yening wenten malih adiri anak sane ngantinin I Yudas.
Anake sane ngantinin ipun sapatutne anak sane setata sareng-sareng iraga dugase Sang Hyang Yesus kari sareng iraga.
Ipun nyarengin iraga uling Ida kalukat olih dane Yohanes kantos Ida kaangkat ka swarga matilar saking iraga sami.
Tatujone mangda anake punika prasida dados saksi sareng iraga indik Sang Hyang Yesus maurip malih sekadi jati mula.”
23 Raris ipun sami ngusul kalih anak,
inggih punika dane Matias sareng dane Yusup.
Dane Yusup punika kasambat Barsabas taler kasambat Yustus.
24 Ipun makasami nunas ica sekadi puniki,
“Duh Sang Hyang Tunggal!
Iratu uning manah anake makasami.
Punika mawinan pitujuhin ja titiang sami sira sane pilih Iratu saking makakalih anake puniki
25 mangda dane ngayah dados utusan ngantinin I Yudas.
Krana I Yudas punika sampun ngalain tugas ipune raris luas ka genah sane pantes buat ragan ipune.”
26 Irika raris ipun sami ngocok undi tur dane Matias sane keni undiane.
Punika mawinan dane Matias dados utusan nyarengin makasolas diri para utusane punika.