Hyang Yesus Kaejuk
18
Sasampune Hyang Yesus nunas ica,
raris Ida luas nyebrang Telabah Kidron kasarengin olih para sisian Idane.
Irika wenten pategalan sane suung,
tur ipun sami ngranjing ring pategalane punika.
2 I Yudas,
sane nyerahang Ida,
uning genahe punika krana Hyang Yesus sering mapunduh sareng para sisian Idane irika.
3 Punika mawinan I Yudas rauh ring pategalane punika makta pasukan tentara Romawine lan makudang tukang jaga Genah Agung Mabaktine.
Ipun kautus olih para pemimpin rsine wiadin para anak Parisine.
Ipun sami mrika makta damar,
obor,
miwah senjata.
4 Hyang Yesus uning sekancan paindikane sane jagi mamargi ring anggan Idane.
Irika Ida wanen mapadu arep sareng ipun sami tur ngandika sapuniki,
“Sirake sane rereh jerone?”
5 Ipun sami masaur sapuniki,
“Yesus uling Desa Nasaret.”
Hyang Yesus raris ngandika sapuniki,
“Tiang niki Ida.”
Irika pada ngadeg I Yudas.
I Yudas puniki sane nyerahang Ida kapining para penguasane.
6 Ritatkala Ida ngandika,
“Tiang niki Ida,”
ipun sami makirig tur ebah ka tanahe.
7 Raris Hyang Yesus mataken malih sapuniki,
“Sirake sane rereh jerone?”
Ipun sami masaur,
“Yesus uling Nasaret.”
8 Hyang Yesus ngandika malih sapuniki,
“Tiang sampun ngorahang kapining jerone,
Tiang wantah Ida.
Krana Tiang sane rereh jerone,
banggiang ja anake puniki matilar.”
9 Indike punika mamargi manut sekadi sane sampun taen nikayang Ida sapuniki,
“Saking anake sami sane sampun serahang Iratu kapining Titiang,
adiri ja nenten wenten sane ical.”
10 Raris I Simon Petrus sane makta pedang bawak,
ngaud pedang saking saungne,
tur nyepeg kuping kenawan parekan rsi penglingsir agunge kantos pegat.
Parekane punika mapesengan Malkus.
11 Irika Hyang Yesus ngandika kapining I Petrus sapuniki,
“Saungin ja pedang ragane ento.
Boyake ragane nawang unduk Tiang musti nginum cawan kasengsaran ane kapicayang olih Ajin Tiange?”
Hyang Yesus Kabakta ring Arepan Dane Hanas
12 Raris pasukan tentara Romawine sareng pemimpinnyane lan tukang jaga Genah Agung Mabaktine ngejuk saha negul Hyang Yesus.
13 Kapertama Ida kabakta ring arepan dane Hanas,
matuan dane Kayapas.
Ring tahun punika,
dane Kayapas dados rsi penglingsir agung agama Yahudine.
14 Dane sane sampun nuturin para penguasa Yahudine sapuniki,
“Becikan asiki sane padem bandingang kapining saluirin bangsan iragane enyag.” Yohanes 11:50.
I Petrus Nenten Ngaku Dados Sisian Hyang Yesus
15 Duk Hyang Yesus kabakta ka griyan dane Hanas,
I Simon Petrus lan adiri sisia sane lianan nututin Ida.
Krana sisia sane adiri punika uning kapining rsi penglingsir agunge,
ipun sareng ngranjing duk Hyang Yesus kabakta ring natah griyan rsi penglingsir agunge.
16 Nanging I Petrus nyantosang ring jaba nampek ring korin pamedale.
Raris sisia sane adiri punika mawali ka jaba tur mawicara sareng anak istri sane nyaga korin pamedale.
Raris I Petrus kabakta ka jeroan.
17 Anake istri punika mabaos kapining I Petrus sapuniki,
“Jero!
Boyake jero pada salah tunggal pengiring Anake punika?”
I Petrus raris masaur sapuniki,
“Nenten ja tiang!”
18 Duk punika mula dingin,
sane mawinan para parekan rsi penglingsir agunge lan para tukang jaga Genah Agung Mabaktine ngenyitin api nganggen adeng.
Apine punika raris kaanggen ngangetang raga.
Tur I Petrus pada ngadeg irika buat ngangetang raga sareng-sareng anake sami.
Hyang Yesus ring Arepan Rsi Penglingsir Agung Hanas
19 Sasampune kenten,
rsi penglingsir agung mataken kapining Hyang Yesus indik para pengiring Idane miwah pengajahan Idane.
20 Raris Hyang Yesus masaur sapuniki,
“Tiang setata ngilis ngandika ring arepan anake akeh.
Tur Tiang setata ngajahin ring bale-bale wantilan agama Yahudine lan ring Genah Agung Mabakti kapining Sang Hyang Pengardine,
inggih punika genah anak Yahudine biasa mapunduh.
Tiang nenten taen ngandika mengkeb-mengkeb.
21 Adi Tiang takenang jerone?
Takenang ja anake sane sampun mirengin pengajahan Tiange.
Pastika ipun uning napi sane nikayang Tiang.”
22 Risedek Hyang Yesus ngandika sekadi punika,
salah tunggal tukang jaga Genah Agung Mabaktine namplak prarain Hyang Yesuse saha mabaos sapuniki,
“Bani sajan Ragane ngomong buka keto kapining rsi penglingsir agunge!”
23 Hyang Yesus ngandika sapuniki,
“Yening pengandikan Tiange iwang,
baosang ja napi iwangne!
Nanging yening pengandikan Tiange patut,
napike mawinan jerone namplak Tiang?”
24 Raris dane Hanas nunden mangda Hyang Yesus sane kari kategul punika kabakta ka arepan rsi penglingsir agung Kayapas.
I Petrus malih nenten Ngaku dados Sisian Hyang Yesus
25 Duk punika,
I Simon Petrus kari ngadeg irika buat ngangetang raga.
Wenten anak sane mabaos sapuniki,
“Jero,
boyake jero sisian Anake punika?”
Nanging I Petrus nenten ja ngaku tur mabaos sapuniki,
“Nenten ja tiang!”
26 Irika wenten adiri parekan rsi agunge,
inggih punika semeton anak sane kasepeg kupingnyane olih I Petrus.
Ipun mabaos sapuniki,
“Boyake jerone sane cingakin tiang ring tamane sareng-sareng Yesus?”
27 I Petrus malih nenten ngaku tur mabaos sapuniki,
“Nenten ja tiang.”
Jeg pramangkin ayame makruyuk.
Hyang Yesus ring Arepan Gubernur Pilatus
28 Benjangane ritatkala semeng ngremeng,
para pemimpin Yahudine makta Hyang Yesus saking griyan rsi agung Kayapas nuju purin Gubernur Romane.
Nanging para pemimpin Yahudine nenten ngranjing ring purine punika mangda ipun nenten cemer krana anak saking bangsa lianan kaanggep cemer.
Yening cemer,
ipun nenten dados ngajeng ajengan rarainan Paskah.
29 Punika mawinan Gubernur Pilatus medal buat manggihin ipun sami tur mabaos sapuniki,
“Napike tuduhan jerone sami kapining Anake puniki?”
30 Para pemimpin Yahudine punika masaur sapuniki,
“Yening Anake puniki nenten malaksana sane jaat,
titiang sami nenten nyerahang Ipun kapining iratu!”
31 Gubernur Pilatus raris mabaos sapuniki,
“Bakta tur akimin ja Anake puniki manut ukum agaman jerone praragan!”
Nanging para pemimpine punika masaur sapuniki,
“Titiang sami nenten kadadosang olih pemrentah Romawine mangda ngukum padem anak lianan.”
32 Paindikane puniki mamargi mangda manut sekadi pengandikan Idane,
indik sekadi napi carane Idane seda.
33 Sasampune kenten,
Gubernur Pilatus ngranjing malih ka purine tur ngamanggil Hyang Yesus.
Raris ida mataken sapuniki,
“Apake Ragane rajan anak Yahudine?”
34 Hyang Yesus ngandika sapuniki,
“Napike jerone mataken saking manah jerone praragan?
Utawi wenten ke anak lianan sampun nikain jerone indik Tiang?”
35 Gubernur Pilatus raris masaur sapuniki,
“Apake tiang ene anak Yahudi?
Ane nyerahang Ragane teken tiang tusing ada len,
bangsan Ragane padidi lan para pemimpin rsine.
Kapelihan apake ane laksanayang Ragane?”
36 Hyang Yesus masaur sapuniki,
“Karajaan Tiange nenten ja saking jagate puniki.
Yening Karajaan Tiange saking jagate puniki,
pastika para parekan Tiange ngutsahayang mangda Tiang nenten kaserahang ring para penguasa Yahudine.
Nanging sujatine Karajaan Tiange nenten ja saking jagate puniki!”
37 Gubernur Pilatus malih mataken sapuniki,
“Yen keto,
Ragane ene raja?”
Hyang Yesus raris masaur sapuniki,
“Jero sane ngamaosang Tiang niki raja.
Tiang lekad ka jagate puniki buat ngicen kasaksian indik napi sane patut.
Anake sane nerima paindikan patut,
mirengin Tiang.”
38 Gubernur Pilatus mataken malih sapuniki,
“Apake artine paundukan patut ento?”
Gubernur Pilatus Meled Mebasang Hyang Yesus
Sasampune kenten,
Gubernur Pilatus malih ka jaban purine lan mabaos kapining para pemimpin Yahudine sapuniki,
“Tiang nenten manggihin asiki ja kaiwangan Anake puniki.
39 Nanging biasane,
ritatkala rarainan Paskah tiang mebasang anak adiri sane kakrangkeng.
Kayunke jerone sami mangda tiang mebasang Anak sane kanikayang ‘raja anak Yahudi’ puniki?”
40 Ipun sami raris masuryak sapuniki,
“Sampunang ja Ia!
Bebasang ja I Barabas!”
I Barabas puniki nenten tios anak sane nglawan pemrentahan Romawine.