Hyang Yesus puniki Punyan Anggur sane Sujati
15
Hyang Yesus malih ngandika sapuniki,
“Tiang ene punyan anggura ane sujati,
lan Ajin Tiange petani anggure.
2 Sebilang carang Tiange ane tusing mabuah kagetep olih Ajin Tiange,
tur sebilang carang ane mabuah kakedasin olih Ida apanga ngancan ngliunang mabuah.
3 Ragane makejang suba kedas ulian pengajahan ane orahang Tiang tekening ragane.
4 Setata ja mabesikan ajak Tiang,
lan Tiang bakal setata mabesikan ajak ragane makejang.
Keto masih carang anggure tusing ja nyidayang mabuah yening tusing setata ngatut sid punyane.
Buka keto ragane tusing bakal mabuah yening tusing mabesikan ajak Tiang.
5 “Tiang ene punyan anggur,
tur ragane makejang carang-carangne.
Nyen ja ane setata mabesikan ajak Tiang tur Tiang ajak ia,
ia bakal liu mabuah.
Yening ragane palas ajak Tiang,
ragane tusing ja nyidang malaksana apa-apa.
6 Anake ane tusing mabesikan ajak Tiang,
ia buka carang-carang anggure ane kakutang laut dadi tuh.
Carang-carange ane tuh buka keto bakal kapunduhang tur katunjel di apine.
7 Yening ragane setata mabesikan ajak Tiang tur setata nuutin pengajahan Tiange,
tunas ja apa ane dotin ragane ring Sang Hyang Aji.
Pastika pinunas ragane ento bakal kicenin.
8 Yening ragane mabuah liu tur dadi murid Tiange ane sujati,
pastika Ajin Tiange kaagungang.
9 “Sekadi Sang Hyang Aji welas asih kapining Tiang,
buka keto Tiang welas asih tekening ragane makejang.
Sapatutne ragane setata idup manut welas asih Tiange.
10 Tiang sampun ninutin prentah Ajin Tiange,
tur Tiang setata idup manut welas asih Idane.
Kenten pada yening ragane makejang ninutin prentah Tiange,
ragane makejang bakal setata idup manut welas asih Tiange.
11 “Tiang midartayang makejang paundukane ene tekening ragane apanga rasa liang Tiange ada di keneh ragane.
Tur rasa liange ento bakal ngebekin keneh ragane.
12 Buka kene prentah Tiange:
ragane makejang musti saling welas asih buka Tiang welas asih tekening ragane makejang.
13 Anake ane paling welas asih tekening sawitrane tusing ada len anake ane misadya nyerahang idupne buat para sawitrane.
14 Ragane makejang tuah para sawitran Tiange,
yening ragane nglaksanayang sekancan prentah Tiange tekening ragane.
15 Tiang tusing ngorahang ragane buin pengayah,
krana pengayah tusing nawang apa ane kalaksanayang olih pamekelnyane.
Tiang ngorahang ragane makejang sawitra,
sawireh makejang ane pirengin Tiang saking Ajin Tiange,
suba tuturin Tiang teken ragane.
16 Tusing ja ragane ane milih Tiang.
Sakewala Tiang ane milih ragane makejang,
tur Tiang nunden apanga ragane luas ngasilang buah,
tusing ada len buah-buah ane langgeng.
Ento mawinan Sang Hyang Aji jagi ngicenin ragane sewatek ane tunas ragane ring Ida,
krana ragane gelah Tiange.
17 Ene suba prentah Tiange teken ragane:
saling welas asih ja!”
Akeh Anake Ngamusuhin Hyang Yesus lan para Sisian Idane
18 Hyang Yesus malih ngandika sapuniki,
“Ritatkala anake di gumine ene ngamusuhin ragane makejang,
ingetang ja unduk anake ento suba malunan ngamusuhin Tiang.
19 Umpamane ragane mabesikan ajak gumine ene,
ragane bakal kademenin,
krana ragane gelah gumine ene.
Sakewala Tiang suba milih ragane uli gumine ene.
Dadine,
ragane tusing ja mabesikan ajak gumine ene.
Ento mawinan anake di gumine ene ngamusuhin ragane.
20 Ingetang ja apa ane taen nikayang Tiang teken ragane,
‘Tusing ja ada pengayah ane tegehan teken pamekelnyane.’
Yening anake di gumine ene nyengsarain Tiang,
ia pada bakal nyengsarain ragane.
Yening ia makejang nuutin pengajahan Tiange,
ia masih bakal nuutin pengajahan ragane.
21 Ia makejang bakal nglaksanayang paundukane makejang ento tekening ragane ane dadi gelah Tiange,
krana ia tusing nawang Sang Hyang Aji ane ngutus Tiang.
22 Yening Tiang tusing rauh lan ngajahin anake di gumine ene,
pastika ia tusing kasambat madosa olih Sang Hyang Pengardi.
Sakewala Tiang suba ngajahin ia makejang.
Dadine jani ia tusing nyidang ngorahang dewekne tusing madosa.
23 Anake ane ngamusuhin Tiang pada ngamusuhin Ajin Tiange.
24 Tiang suba nglaksanayang paundukan-paundukan ane ngangobin,
sing ada len ane tusing taen kalaksanayang olih anak lenan.
Umpamane yening Tiang tusing malaksana buka keto,
pastika ia tusing kasambat madosa.
Sakewala jani,
yadiastun ia suba nyaksiang unduke ento makejang,
ia enu ngamusuhin Tiang lan Ajin Tiange.
25 Sakewala paundukane ento mamargi manut apa ane katulis di Cakepan Sucine kene,
‘Anake ngamusuhin Tiang tanpa dasar.’ Kidung 35:19, 69:5
26 “Tiang bakal ngutus Roh Penulung saking Sang Hyang Aji tekening ragane.
Rohe punika nenten tios,
Roh Sang Hyang Pengardi sane jagi ngedengang napi sane patut indik Sang Hyang Pengardi.
Ida sane jagi ngicen kasaksian unduk Tiang.
27 Tur ragane musti maang kasaksian sid anake lenan unduk Tiang,
krana uli pengawitne ragane suba bareng-bareng ajak Tiang.”