Hyang Yesus Masehin Batis Sisian Idane
13
Dina sadereng rarainan Paskah,
Hyang Yesus uning galah Idane sampun rauh buat matilar saking jagate puniki tur mawali ring Sang Hyang Aji.
Ida setata tresna kapining anake sane dados druen Idane ring jagate puniki.
Samaliha Ida kari tresna kapining ipun sami kantos ring dina pamuput urip Idane.
2 Kaceritayang ring dina wengi,
Hyang Yesus lan para sisian Idane sedek ngajeng.
Duk punika,
ratun para setane sampun ngicen daya ring manah I Yudas,
okan dane Simon Iskariot mangda ipun nyerahang Hyang Yesus kapining para pemimpin Yahudi.
3 Hyang Yesus uning Sang Hyang Aji sampun nyerahang sekancan kuasa kapining ragan Idane.
Kenten pada Ida uning indik Ida maasal saking Sang Hyang Pengardi tur jagi mawali ring Sang Hyang Pengardi.
4 Punika mawinan Hyang Yesus matangi saha ngembus jubah Idane,
tur nyaetang anduk ring bangkiang Idane.
5 Ida mriokang toya ring pasone raris masehin batis para sisian Idane tur nyusutin nganggen anduk sane ring bangkiang Idane.
6 Ritatkala Hyang Yesus rauh sid I Simon Petruse,
irika ipun matur sapuniki,
“Ratu,
pantes ke Iratu masehin batis titiange?”
7 Irika raris Hyang Yesus ngandika sapuniki,
“Ane jani ragane tusing ngerti apa ane laksanayang Tiang.
Sakewala manian ragane bakal ngerti.”
8 Raris I Petrus matur sapuniki,
“Ratu,
apisan ja titiang nenten ngicen Iratu masehin batis titiange!”
Hyang Yesus raris masaur sapuniki,
“Yening Tiang tusing masehin batis ragane,
artine ragane tusing ja gelah Tiange.”
9 Irika I Petrus matur kapining Hyang Yesus sapuniki,
“Ratu,
yening kenten,
sampunang ja batis titiange kamanten,
nanging tiang nunas tangan lan sirah titiange pada!”
10 Raris Hyang Yesus ngandika malih sapuniki,
“Nyen ja ane suba mandus,
awakne suba kedas.
Tuah batisne dogen ane perlu kabasehin.
Ragane makejang suba kedas,
sakewala ada masih anak ane tusing kedas.”
11 Hyang Yesus ngandika sekadi punika krana Ida uning sira sane jagi nyerahang Ida kapining para penguasane.
Punika mawinan Ida ngandika,
“Ragane makejang suba kedas,
sakewala ada masih anak ane tusing kedas.”
12 Sasampune Hyang Yesus masehin batis para sisian Idane,
Ida nganggen jubah malih tur mawali malinggih.
Raris Ida ngandika kapining para sisian Idane sapuniki,
“Ngertike ragane makejang apa ane laksanayang Tiang buat ragane?
13 Ragane ngamanggil Tiang ‘Guru’ lan ‘Ratu’,
tur saja buka keto.
14 Nah yadiastun Tiang Guru lan Ratu,
Tiang misadya masehin batis ragane.
Keto mawinan ragane makejang sapatutne saling masehin batis.
15 Tiang suba ngedengang tatuladan apanga ragane malaksana patuh buka ane suba laksanayang Tiang teken ragane.
16 Tiang ngandikayang ane patut,
sujatine tusing ja ada pengayah ane tegehan bandingang teken pamekelnyane.
Keto masih tusing ja ada utusan ane tegehan bandingang teken ane ngutus.
17 Krana ragane nawang unduke ene,
ragane bakal kapicayang bagia yening ragane nglaksanayang unduke ene.
18 “Tiang tusing nikayang yening makejang uling ragane kapicayang bagia.
Tiang nawang nyen dogen ane suba pilih Tiang.
Sakewala apa ane katulis di Cakepan Sucine musti mamargi,
‘Anake ane naar rotin Tiange bakal ngamusuhin Tiang.’ Kidung 41:9
19 “Tiang ngorahin ragane apa ane bakal mamargi.
Tatujone apang sasubane paundukane ento mamargi,
ragane makejang bakal pracaya Tiang niki Idaa.
20 Tiang ngandikayang ane patut,
sujatine nyen ja nerima anake ane utus Tiang,
anake ento nerima Tiang.
Tur nyen ja ane nerima Tiang,
ia nerima Ida sane ngutus Tiang.”
Hyang Yesus Nguningayang indik Sira sane Jagi Nyerahang Ida kapining Musuh Idane
21 Sasampune Hyang Yesus ngandika sekadi punika,
manah Idane dados inguh paling.
Irika Ida ngicen kasaksian sapuniki,
“Tiang ngandikayang ane patut,
sujatine ada adiri uling ragane bakal nyerahang Tiang tekening para penguasane.”
22 Irika raris para sisian Idane dados bingung saha saling cingakin krana nenten uning sira sane katuek olih Hyang Yesus.
23 Adiri saking sisian Idane nenten tios sisia sane kasayangin Idab,
nyleleg ring sisi kenawan Hyang Yesuse.
24 Raris I Simon Petrus ngicen tanda kapining sisiane punika mangdane nakenang Hyang Yesus sirake sane katuek.
25 Irika raris sisiane punika nyleleg saha makipekan marep ring Hyang Yesus tur mataken sapuniki,
“Ratu,
sirake anake punika?”
26 Irika raris Hyang Yesus ngandika sapuniki,
“Anake ento tusing ada len,
anake ane bakal nerima roti ane encebang Tiang di jembunge ene.”
Sasampune ngandika sapunika,
Hyang Yesus ngambil roti atebih,
raris ngencebang rotine punika ring jembunge tur kicen ring I Yudas,
okan dane Simon Iskariot.
27 Sasampune I Yudas nerima rotine punika,
irika ratun para setane ngebekin ipun.
Raris Hyang Yesus ngandika kapining I Yudas sapuniki,
“Enggalang ja nglaksanayang apa ane kenehang ragane.”
28 Nanging anake sane sareng ngajeng irika nenten ngerti napi mawinan Hyang Yesus ngandika sekadi punika kapining I Yudas.
29 Krana I Yudas sane makta jinah kas ipune sami,
wenten sane ngaden Hyang Yesus nikain ipun numbas kaperluan buat pestane.
Taler wenten sane ngaden ipun kanikain mapitulung kapining anak tiwas.
30 Sasampune I Yudas nerima rotine punika,
raris ipun ngencolang matilar.
Duk punika galahe sampun wengi.
Prentah sane Anyar
31 Sasampune I Yudas matilar,
raris Hyang Yesus ngandika sapuniki,
“Ane jani Sang Putraning Manusa bakal kaagungang,
tur malantaran Ida,
Sang Hyang Pengardi jagi kaagungang.
32 Krana Sang Hyang Pengardi kaagungang malantaran parilaksanan Sang Putraning Manusa,
ento mawinan Ida praragan jagi ngedengang kapining manusane unduk kalintang agung Sang Putraning Manusa punika.
Tur paundukane ento enggal kalaksanayang.
33 “Duh cening ajak makejang,
tuah buin akejep galah Tiange ajak cening.
Salanturnyane cening bakal ngalih Tiang.
Sakewala apa ane nikayang Tiang jani,
patuh buka ane nikayang Tiang tekening para pemimpin Yahudine ipidan:
ka tongos Tiange luas,
cening tusing nyidang kemu.
34 “Tiang maang cening prentah ane anyar:
cening musti saling tresnain.
Pateh buka Tiang tresna tekening cening,
keto masih cening musti saling tresnain.
35 Yening cening saling tresnain,
anake lianan bakal nawang unduk cening dadi murid Tiange.”
Indik Hyang Yesus Ngingetin I Petrus
36 Irika raris I Simon Petrus matur kapining Hyang Yesus sapuniki,
“Ratu jagi lunga kija?”
Hyang Yesus raris masaur sapuniki,
“Jani,
ka tongos Tiange luas,
ragane tusing nyidang nugtug kemu.
Nanging manian ragane bakal nugtug Tiang.”
37 Raris I Petrus matur malih sapuniki,
“Ratu,
napike mawinan titiang nenten sida nugtug Iratu mangkin?
Titiang misadya nyerahang idup titiange buat Iratu!”
38 Raris Hyang Yesus masaur sapuniki,
“Sajake ragane bakal nyerahang idup buat Tiang?
Pasti tusing.
Tiang ngandikayang ane patut,
sujatine satondene siape makruyuk,
ragane suba ping telu tusing ngaku yening ragane nawang Tiang.”