Pengumpamian indik Pangangon sareng Biri-birinnyane
10
Hyang Yesus ngandika sapuniki,
“Tiang ngandikayang sane patut,
sujatine sira ja sane ngranjing ka kandangbiri-birinea nenten malantaran korine,
nanging menek tembok pagehan kandange,
anake punika wantah maling lan perampok.
2 Nanging anake sane ngentasin korin kandange,
ipun pengangon biri-birine.
3 Tukang jaga kandang biri-birine ngampakang korine mangda pangangone ngranjing,
tur biri-birine ningeh suaran pangangone.
Ipun nyeritin biri-birine antuk adannyane suang-suang,
tur ipun nuntun biri-birine pesu.
4 Sasampune biri-birine kabakta pesu,
pangangone punika mamargi ring arep tur biri-birine nututin pangangone krana biri-birine nawang suaran pangangone.
5 Nanging biri-birine punika nenten ja nyak nututin anak lianan,
samaliha biri-birine bakal malaib ritatkala ningehang suaran anake lianan punika,
krana biri-birine tusing nawang suaran ipune.”
6 Hyang Yesus nyeritayang pengumpamiane punika ring anak Parisine,
nanging ipun nenten ngerti artin pengumpamiane punika.
Hyang Yesus puniki Pengangon sane Becik
7 Punika mawinan Hyang Yesus malih apisan ngandika sapuniki,
“Tiang ngandikayang sane patut,
sujatine Tiang niki kori mangda biri-birine nyidang macelep ka kandange.
8 Makasami sane rauh sadereng Tiang nenten tios maling lan perampok.
Turmaning biri-birin Tiange tusing ningehang suaran ipune.
9 Tiang niki kori.
Sapa sira ja sane ngranjing malantaran Tiang,
ipun jagi slamet.
Tur ipun jagi mamargi lan budal saha polih ajeng-ajengan.
10 Malinge rauh jagi ngamaling lan ngamademang tur menyahang.
Nanging Tiang rauh mangda manusane polih urip sujati sane maliah.
11 “Tiang niki pangangon sane becikb.
Pangangon sane becik nyerahang uripnyane mangda nylametang biri-birine.
12 Nanging buruh angon sane kaupah,
nenten ja pangangon tur nenten sane nuenang biri-birine punika.
Ipun jagi malaib ngalain biri-birine ritatkala nyingakin asu alase teka.
Tur biri-birine bakal kasagrep samaliha biri-birine sane lianan bakal sambrag maideh-idehan.
13 Buruhe punika jagi malaib krana ipun nenten ja rungu kapining biri-birine punika.
14-15 “Tiang niki pangangon sane becik.
Pateh sekadi Ajin Tiange uning Tiang lan Tiang uning Ida.
Kenten pada Tiang uning biri-birin Tiange,
tur biri-birin Tiange nawang Tiang.
Tiang nyerahang urip Tiange mangda biri-birin Tiange slamet.
16 Kenten pada,
kari wenten biri-biri lianan sane dados pagelahan Tiange,
sane nenten maasal saking kandange puniki.
Biri-birine lianan punika musti punduhang Tiang.
Tur biri-birine punika bakal ningehang suaran Tiange.
Makejang biri-birine bakal dadi asoroh ane kaangonin olih pangangon adiri.
17 “Sang Hyang Aji welas asih kapining Tiang krana Tiang nyerahang urip Tiange.
Nanging Tiang jagi nerima urip Tiange malih.
18 Nenten ja wenten anak sane prasida ngambil urip Tiange,
nanging Tiang nyerahang urip Tiange antuk pikayunan Tiange praragan.
Tiang madue kuasa nyerahang raris ngambil urip Tiange malih.
Sapunika pakaryan sane terima Tiang saking Ajin Tiange.”
19 Raris para anak Yahudine ngawitin maiegan krana mirengang pengajahane punika.
20 Wenten akeh anake sane mabaos sapuniki,
“Ia karangsukin buta kala!
Ia buduh!
Ngudake iraga ningehang Ia?”
21 Nanging wenten pada sane ngamaosang sapuniki,
“Anake ane karangsukin buta kala tusing ja ngraos buka keto!
Apake buta kala nyidang nyegerin anak buta?”
Anak Yahudi Nenten Kayun Nerima Hyang Yesus
22 Sasampun masan dingin rauh,
wenten pestac ring Kota Yerusalem sane dados paingetd indik Genah Agung Mabaktine idumun kasuciang malih.
23 Kaceritayang,
Hyang Yesus sedek mamargi ring amben Salomo sane ring Genah Agung Mabaktine.
24 Irika raris para pemimpin Yahudine rauh ngiterin Hyang Yesus.
Ipun sami mataken sapuniki,
“Ngudake Ragane sue pisan manggiang tiang sami bimbang?
Orahang ja yening Ragane puniki Sang Prabu Sane Kajanjiang.”
25 Raris Hyang Yesus ngandika sapuniki,
“Tiang sampun ngandikayang kapining jerone nanging jero nenten pracaya.
Sekancan pakaryan sane laksanayang Tiang malantaran kuasan Sang Hyang Ajin Tiange,
dados kasaksian indik Tiange.
26 Jerone sami nenten pracaya duaning jero nenten ja biri-birin Tiange.
27 Biri-birin Tiange ningehang suaran Tiange.
Tiang uning biri-birin Tiange tur biri-birin Tiange nugtug Tiang.
28 Tiang ngicen biri-birin Tiange punika urip sujati salamin-laminne tur ia makejang tusing bakal kabenyahang salamin-laminne.
Nenten ja wenten sane mresidayang ngrampas ia makejang saking tangan Tiange.
29 Ajin Tiange sane micayang biri-birine punika kapining Tiang.
Ida agengan kapining saluirin sane wenten.
Nenten wenten anak sane mresidayang ngrampas biri-birine punika saking tangan Sang Hyang Aji.
30 Tiang sareng Sang Hyang Aji wantah siki.”
31 Irika raris para pemimpin Yahudine malih ngambil batu meled nimpugine Hyang Yesus kantos padem.
32 Nanging Ida ngandika kapining ipun sami sapuniki,
“Tiang sampun akeh ngedengang paindikan sane ngangobin saking Sang Hyang Aji.
Cenke sane ngranayang jerone jagi nimpugin Tiang?”
33 Raris para pemimpin Yahudi punika masaur sapuniki,
“Tiang sami makeneh nimpugin Ragane nenten ja krana paindikan angob sane karyanin Ragane.
Tiang jagi nimpugin Ragane krana Ragane degag kapining Sang Hyang Pengardi.
Ragane puniki manusa biasa matehang raga sareng Sang Hyang Pengardi!”
34 Raris Hyang Yesus ngandika sapuniki,
“Boyake wenten katulis ring Cakepan Suci jerone sapuniki,
‘Sang Hyang Pengardi masabda:
cening makejang buka dewa?’ Kidung 82:6.
35 “Iraga uning napi sane katulis ring Cakepan Sucine punika setata patut kantos salamin-laminne.
Irika,
Sang Hyang Pengardi nyambat anak sane nerima sabdan Idane sekadi para dewa.
36 Nanging Tiang puniki kapilih tur kautus ka jagate olih Ida.
Punika mawinan jerone nenten prasida nuduh Tiang degag kapining Sang Hyang Pengardi krana Tiang ngandikayang,
‘Tiang Putran Idane.’
37 Yening Tiang nenten nglaksanayang pakaryan sane kaprentahang olih Ajin Tiange,
sampunang ja pracaya kapining Tiang.
38 Nanging krana Tiang nglaksanayang pakaryane punika,
pracaya ja kapining paindikane punika,
yadiastun jerone nenten kayun pracaya kapining Tiang.
Sekadi punika jerone jagi uning lan ngerti yening Sang Hyang Aji setata masikian sareng Tiang,
lan Tiang setata masikian sareng Sang Hyang Aji.”
39 Irika raris malih pisan ipun sami ngutsahayang mangda ngejuk Hyang Yesus.
Nanging Ida lolos saking ipun sami.
40 Raris Hyang Yesus mawali nyebrang Tukad Yordane ka genah dane Yohanese nglukat anak idumun,
tur Ida meneng irika.
41 Akeh pisan anake ngrauhin Ida irika.
Ipun sami saling ngraos sapuniki,
“Asiki ja nenten taen dane Yohanes makarya paindikan sane ngangobin.
Nanging saluirin sane baosang dane indik Anake puniki yakti patut.”
42 Tur akeh anake sane wenten irika pracaya kapining Hyang Yesus.