Hyang Yesus Sareng Para Semeton Idane
7
Kaceritayang mangkin,
Hyang Yesus luas maideh-idehan ring Wawidangan Galilea.
Ida nenten kayun luas ka Wawidangan Yudea krana para pemimpin Yahudine irika meled ngamademang Ida.
2 Duk punika,
sampun nampek rarainan Pondok Dauna anak Yahudine.
3 Irika para semeton Hyang Yesuse mabaos kapining Ida sapuniki,
“Magedi ja uli dini tur luas ja ka Wawidangan Yudea,
apanga murid-murid Ragane nyidang ningalin paundukan-paundukan ngangobin ane gae Ragane.
4 Krana anake ane dot kasub tusing ja ngengkebang makejang pagaene.
Nah,
yening Ragane nyidang ngae makejang paundukan ane ngangobin,
edengang ja dewek Ragane teken anake makejang.”
5 Semeton Idane mabaos sekadi punika duaning ipun sami nenten ja pracaya kapining Ida.
6 Raris Hyang Yesus ngandika sapuniki,
“Tonden ja jani galah Tiange,
sakewala setata ada galah buat ragane.
7 Krana manusa di gumine ene tusing ja ngamusuhin ragane.
Sakewala ia makejang ngamusuhin Tiang,
krana Tiang dadi saksi unduk parilaksanannyane ane jaat.
8 Luas ja ragane malunan ka acara rarainane ento.
Tiang tusing ja luas jani krana tonden ja galah Tiange.”
9 Sasampune ngandika sapunika,
Ida tetep meneng ring Galilea.
Hyang Yesus Ngajahin Tatkala Rarainan Pondok Daun
10 Nanging sasampune para semeton Hyang Yesuse luas ring rarainane punika,
irika Ida nyilib luas praragan mangda nenten wenten anak sane uning.
11 Duk rarainane punika,
para pemimpin Yahudine ngrereh Ida saha mataken sapuniki,
“Dijake Anake punika?”
12 Akeh anake pada kisi-kisi indik Hyang Yesus.
Wenten sane mabaos sapuniki,
“Ida Anak dharma.”
Wenten pada sane lianan mabaos sapuniki,
“Tusing ja keto,
Ia ngranayang anak lenan inguh paling.”
13 Nanging nenten wenten anak sane bani mabaos jujur indik Ida ring arepan anake akeh,
krana ipun sami jejeh kapining para pemimpin Yahudine.
14 Ritatkala dina sane kaping pat acara Pondok Daun kalaksanayang,
Hyang Yesus ngranjing ka Genah Agung Mabaktine tur ngawitin ngajahin irika.
15 Para pemimpin Yahudine ngon pisan lan mabaos sapuniki,
“Anake ene tusing taen masekolah;
kenkenke carane Ia liu ngelah keduegan?”
16 Raris Hyang Yesus masaur sapuniki,
“Pengajahan Tiange nenten ja maasal saking dewek Tiange praragan,
nanging saking Ida sane ngutus Tiang.
17 Sapa sira ja sane kayun ninutin pikayunan Sang Hyang Pengardi,
ipun jagi uning napike pengajahan Tiange maasal saking Ida utawi saking dewek Tiange praragan.
18 Sapa sira ja sane ngicen pengajahan manut papinehnyane praragan,
sujatine ipun ngutsahayang mangda deweknyane kaajiang.
Nanging Tiang ngajahin mangda Ida sane ngutus Tiang punika kaajiang.
Indike punika dados bukti Tiang ngandikayang sane patut.
Nenten ja wenten kaiwangan ring dewek Tiange.
19 Boyake dane Musa idumun sane ngicen ukum agama buat jerone sami?
Nanging jerone sami nenten ninutin ukum agamane punika.
Ngudake jerone meled ngamademang Tiang?”
20 Anake akeh punika masaur sapuniki,
“Ragane karangsukin buta kala!
Nyenke ane nagih ngamatiang Ragane?”
21 Hyang Yesus malih masaur sapuniki,
“Tiang sampun makarya asiki paindikan ngangobin ring rahina Sabatb sane ngranayang jerone makesiab.
22 Nanging jerone pada makarya ritatkala rahina Sabat ritatkala jerone nyunat anake alit sane sampun mayusa kutus dina manut ukum dane Musa.
Sujatine awig-awig masunat nenten maasal saking ragan danene,
nanging saking leluhur iragane sadereng dane urip.
23 Yening jerone malaksana sekadi punika ring rahina Sabat buat ninutin ukum dane Musa indik masunat,
ngudake jerone gedeg kapining Tiang krana Tiang nyegerin makaukud ragan anak tatkala rahina Sabat?
24 Sampunang ja ngakimin anak manut napi sane kacingak,
nanging akimin ja manut pengakiman sane adil.”
Matungkasan indik Asal Hyang Yesuse
25 Sasampune punika,
wenten makudang warga Yerusalem mabaos sapuniki,
“Boyake Anake puniki sane karereh mangda kapademang?
26 Cingakin ja,
Anake puniki bebas pisan ngajahin anake akeh,
nanging nenten wenten anak sane mabaos napi-napi mangda nambakin Ipun.
Napike para pemimpin iragane sampun yakti uning yening Anake puniki Sang Prabu Sane Kajanjiang?
27 Nanging iraga sami uning asal Anake puniki.
Tur yening Sang Prabu Sane Kajanjiang punika rauh,
nenten ja wenten anak sane uning saking dija asal Idane!”
28 Ritatkala Hyang Yesus ngajahin ring Genah Agung Mabaktine,
Ida ngandika antuk suara sane keras sapuniki,
“Napike yakti jerone sami uning sira Tiang niki lan saking dija asal Tiange?
Tiang rauh nenten ja manut pikayunan Tiange praragan,
nanging Ida sane ngutus Tiang punika patut.
Jerone nenten uning Ida,
29 nanging Tiang uning Ida krana Tiang maasal saking Ida.
Ida sane ngutus Tiang.”
30 Sasampune Hyang Yesuse ngandika sekadi punika,
irika para pemimpin Yahudine ngutsahayang ngejuk Hyang Yesus.
Nanging asiki ja nenten wenten sane mresidayang ngusud Ida,
krana galah Idane dereng rauh.
31 Nanging saking anake akeh punika wenten akeh sane pracaya kapining Ida.
Ipun mabaos sapuniki,
“Pastika Anake puniki Sang Prabu Sane Kajanjiang.
Duaning nenten wenten anak sane mresidayang makarya paindikan sane ngangobin,
akehan kapining sane karyanin Ida.”
32 Para anak Parisine mirengin anake akeh punika kisi-kisi indik Hyang Yesus.
Punika mawinan para pemimpin rsi sareng para anak Parisine nunden makudang tukang jaga Genah Agung Mabaktine luas mangda ngejuk Hyang Yesus.
33 Raris Hyang Yesus ngandika sapuniki,
“Kari malih akidik galah tiange meneng ring tengah-tengah jerone sami.
Raris Tiang jagi mawali ring Ida sane ngutus Tiang.
34 Jerone jagi ngrereh Tiang,
nanging jerone nenten manggihin Tiang.
Jerone nenten sida luas ka genah Tiange.”
35 Irika raris para pemimpin Yahudine saling mabaos sapuniki,
“Kijake Anake ene bakal luas kanti iraga tusing nyidang ningalin Ia?
Pastika Ia tusing bakal luas sid anak Yahudi ane nongos di negeri anak tusing Yahudi.
Ia tusing ja bakal ngajahin anak tusing Yahudi ditu.
36 Apake artine Ia ngraos,
‘Jerone jagi ngrereh Tiang,
nanging jerone nenten manggihin Tiang,’
tur,
‘Jerone nenten sida luas ka genah Tiange’?”
Toya sane Ngicen Urip
37 Ring dina pamuput rarainane punika,
nenten tios dina puncak karyane,
irika Hyang Yesus ngadeg saha ngandika antuk suara keras sapuniki,
“Sapa sira ja sane bedak,
durusang ja rauh sid Tiange tur nginum!
38 Indik anake sane pracaya kapining Tiang,
wenten katulis ring Cakepan Sucine sapuniki,
‘Toya sane ngicen urip sane sujati,
jagi membah kantos maliah saking manahnyane.’”
(Yesaya 55:1, 58:11)
39 Pengandikan Hyang Yesuse puniki maarti Roh Sang Hyang Pengardi sane jagi katerima olih anake sane pracaya.
Rohe punika dereng rauh,
duaning Hyang Yesus dereng nerima kaagungan saking Sang Hyang Aji.
40 Saking anake akeh sane mirengin pengandikan Idane irika,
wenten sane mabaos sapuniki,
“Anake puniki pastika Sinoman sane kajanjiangc punika!”
41 Tur wenten pada sane mabaos sapuniki,
“Anake puniki Sang Prabu Sane Kajanjiang.”
Nanging wenten pada sane lianan mabaos sapuniki,
“Pastika Sang Prabu Sane Kajanjiang nenten ja rauh saking Wawidangan Galilea!
42 Ring Cakepan Sucine katulis yening Sang Prabu Sane Kajanjiang punika maasal saking sentanan raja Daud tur saking Betlehem,
kotan raja Daude idumun.”
43 Sekadi punika anake irika pada matungkasan indik Hyang Yesus.
44 Wenten sane meled ngejuk Ida,
nanging adiri ja nenten wenten anak sane ngusud Ida.
Para Pemimpin Yahudine nenten Pracaya kapining Hyang Yesus
45 Raris para tukang jaga Genah Agung Mabaktine mawali ring para pemimpin rsine lan para anak Parisine.
Irika para tukang jagane punika katakenang sekadi puniki,
“Nguda ragane tusing ngaba Yesus mai?”
46 Para tukang jagane punika masaur sapuniki,
“Nenten ja wenten anak sane taen mabaos sekadi Gurune punika!”
47 Irika raris para anak Parisine mabaos kapining tukang jagane punika sapuniki,
“Beh,
ragane suba kadadiang inguh paling!
48 Tonden ja ada pemimpin iragane utawi anak Parisine ane pracaya tekening Ia!
49 Sakewala anake liu ane nuutin Ia,
tusing ja nawang ukum agaman iragane.
Pastika anake liu ento lakar kena ukuman uling Sang Hyang Pengardi!”
50 Nanging saking soroh pemimpin Yahudine,
wenten dane Nikodemus sane taen tangkil ring Hyang Yesusd.
Dane mabaos kapining anak Parisine sane lianan sapuniki,
51 “Manut ukum agaman iragane,
nenten dados ngukum anak sadereng prakarannyane kapirengin lan parilaksanannyane kapreksa.”
52 Irika raris para pemimpin sane lianan mataken sapuniki,
“Napike ragane pada anak Galilea?
Wacen ja Cakepan Sucine!
Irika ragane jagi nyingakin nenten wenten sinoman maasal saking Galilea!”
Anak Istri sane Mamitra