Hyang Yesus Ngajahin Dane Nikodemus
3
Kaceritayang wenten adiri pemimpin anak Yahudi sane mapesengan Nikodemus.
Dane Nikodemus puniki anak saking soroh Parisi.
2 Ring dina wengi,
dane Nikodemus rauh ring Hyang Yesus lan matur sapuniki,
“Guru,
tiang sami uning Guru puniki kautus olih Sang Hyang Pengardi.
Duaning nenten wenten anak sane mresidayang makarya paindikan sane ngangobin sekadi sane karyanin Guru,
yening nenten kasarengin olih Sang Hyang Pengardi.”
3 Raris Hyang Yesus masaur sapuniki,
“Tiang ngandikayang sane patut,
sujatine nenten ja wenten anak sane mresidayang dados warga karajaan Sang Hyang Pengardi yening anake punika nenten kicen urip sane anyar sekadi anak sane kalekadang malih.”
4 Dane Nikodemus matur sapuniki,
“Mresidayang ke anake sane sampun duur kalekadang malih?
Sirake sane prasida ngranjing malih ring weteng ibunnyane raris kalekadang malih?”
5 Hyang Yesus nyaurin sapuniki,
“Tiang ngandikayang sane patut,
sujatine manusane musti kalekadang saking toya lan Roh Sang Hyang Pengardi.
Yening nenten,
ipun nenten prasida dados warga Karajaan Sang Hyang Pengardi.
6 Manusa sekala kalekadang olih reramannyane,
nanging manut niskala manusane kalekadang olih Roh Sang Hyang Pengardi.
7 Sampunang ja jero makesiab yening Tiang ngandikayang sapuniki,
‘Jerone sami musti kalekadang malih.’
8 “Umpamine angine mampehan kija ja kitane.
Iraga mirengin kuusane kamanten,
nanging nenten uning saking dija tekan angine punika lan kija magedine.
Sekadi punika taler paindikan anake sane kalekadang olih Roh Sang Hyang Pengardi.”
9 Raris dane Nikodemus mataken sapuniki,
“Punapike paindikane punika prasida mamargi?”
10 Hyang Yesus masaur sapuniki,
“Jerone puniki guru sane ageng ring Israel.
Ngudake jerone nenten ngresepang sekancan paindikane punika?
11 Tiang ngandikayang sane patut kapining jerone,
sujatine tiang sami mabaos indik napi sane uningin tiang.
Lan tiang sami ngicen kasaksian indik napi sane sampun cingakin tiang.
Nanging jerone sami nenten nerima kasaksian tiange.
12 Jerone sami nenten pracaya tatkala Tiang praragan nyeritayang paindikan-paindikan sekala kapining jerone.
Pastika jerone nenten pracaya tatkala Tiang nyeritayang paindikan-paindikan niskala.
13 Nenten ja wenten anak sane taen menek ka swarga lianan kapining Ida sane sampun tedun saking swarga,
nenten tios Sang Putraning Manusa.
14 “Pateh sekadi idumun dane Musa ngunggahang lelipi sane malakar aji temaga ring tiang kayune mangda anak Yahudi kaslametang ring genah sane bengang linggah.
(Cacah Jiwa 21:9).
Sekadi punika,
Sang Putraning Manusa musti kaunggahang,
15 mangdane makasami anake sane pracaya kapining Ida polih urip sujati salamin-laminne.
16 “Krana kalintang ageng welas asih Sang Hyang Pengardine kapining manusane sami,
punika mawinan Ida micayang Putran Idane sane tunggal.
Tatujone mangda sebilang anake sane pracaya kapining Ida nenten ja enyag salamin-laminne,
nanging polih urip sujati.
17 Duaning Sang Hyang Pengardi ngutus Putran Idane boya ja ngicen ukuman kapining manusane,
nanging mangda nylametang manusane.
18 Sapa sira ja sane pracaya kapining Sang Putra nenten kaukum.
Nanging sapa sira ja sane nenten pracaya kapining Ida,
pastika katiben ukuman saking Sang Hyang Pengardi,
krana ipun nenten pracaya kapining Putran Sang Hyang Pengardi sane tunggal.
19 Dasar ukumane punika sekadi puniki:
galange punika sampun rauh ring jagate,
nanging manusane lebih seneng maurip ring petenge bandingang maurip ring galange,
krana parilaksanannyane jaat.
20 Sapa sira ja sane malaksana jaat,
nungkasin galange;
anake punika nenten kayun rauh ring galange mangda parilaksana jaat ipune nenten kauningin.
21 Nanging sapa sira ja sane nglaksanayang paindikan sane patut,
rauh ring galange.
Lan galange punika jagi ngedengang yening parilaksanannyane manut sekadi pikayunan Sang Hyang Pengardi.”
Dane Yohanes Ngaku Hyang Yesus sane Utama
22 Sasampun paindikane punika,
Hyang Yesus kasarengin para sisian Idane matilar saking Kota Yerusalem nuju desa-desa ring Wawidangan Yudea.
Irika Ida meneng makudang minggu suene sareng sisian Idane lan nglukat anak.
23 Ritatkala punika,
dane Yohanes taler nglukat anak ring Desa Ainon nampek ring Desa Salim krana irika akeh wenten toya.
Tur akeh anake rauh mrika mangda kalukat.
24 Duk punika dane Yohanes dereng kakrangkeng ring buine.
25 Sasampune kenten,
makudang sisian dane Yohanese ngawitin matungkasan sareng adiri anak Yahudine.
Ipun matungkasan indik upacara pabersihan raga manut awig-awig agama Yahudine.
26 Raris sisian dane Yohanese punika rauh ring dane tur matur sapuniki,
“Guru,
napike guru kari eling kapining Anake sane sareng guru ritatkala ring dangin Tukad Yordane?
Idumun guru sampun ngicen kasaksian indik Anake punika nenten tios Sang Prabu sane Kajanjiang olih Sang Hyang Pengardi.
Sane mangkin Anake punika pada nglukat anak.
Tur mangkin makasami anake mrika.”
27 Dane Yohanes raris masaur sapuniki,
“Tiang sing kenken.
Manusane tusing nyidang maan apa-apa yen tusing kapicayang olih Sang Hyang Pengardi.
28 Ragane suba ningehang tiang ngraos buka kene,
‘Tiang boya ja Sang Prabu Sane Kajanjiang olih Sang Hyang Pengardi,
nanging tiang kautus dadi pengayah Idane apanga ngamalunin Ida.’
29 Umpamane,
penganten istri tuah gelah penganten lanange.
Nanging timpal penganten lanange ngantiang ditu sambilanga ningehang munyine.
Ia liang sajan yen ningehang munyin penganten lanange ento.
Keto liang keneh tiange buka timpal penganten lanange ento.
Tur jani keneh tiange liang sajan ulian sapengrauh Sang Prabune.
30 Ida sane musti ngancan ageng,
lan tiang ngancan cenik.”
Ida sane Rauh Saking Swarga
31 Ida sane rauh saking swarga agungan kapining saluirin manusa.
Ipun sane maasal saking jagate puniki,
wantah mresidayang mapineh lan mawicara paindikan sane ring jagate kamanten.
Ida sane rauh saking swarga agungan kapining saluirin manusane.
32 Ida ngicen kasaksian indik napi sane sampun cingak lan pirengin Ida.
Nanging adiri ja nenten wenten anak sane pracaya kapining kasaksian Idane.
33 Nanging sapa sira ja sane pracaya kapining kasaksian Idane punika,
artine anake punika muktiang Sang Hyang Pengardi punika yakti patut.
34 Ida sane kautus olih Sang Hyang Pengardi ngandikayang sabdan Sang Hyang Pengardine,
krana Roh Sang Hyang Pengardi sampun kapicayang ring Ida tanpa wates.
35 Sang Hyang Aji tresna kapining Sang Putra,
tur sampun nyerahang saluirin kuasa ring tangan Idane.
36 Sapa sira ja sane pracaya kapining Sang Putrane punika jagi polih urip sujati salamin-laminne.
Nanging sapa sira ja sane nulak dados pracaya kapining Sang Putra nenten polih urip;
Sang Hyang Pengardi tetep murka kapining anake punika salamin-laminne.