Hyang Yesus Ngubah Toya dados Anggur
2
Sasampune kalih dina,
wenten pesta pawiwahan ring Kota Kana Wawidangan Galilea.
Lan ibun Hyang Yesuse wenten irika.
2 Ida sareng para sisian Idane pada kaundang ring pesta pawiwahane punika.
3 Duk punika anggur sane kaanggen mapesta telas.
Raris,
ibun Hyang Yesuse mabaos kapining Ida sapuniki,
“Anggur anake ane ngelahang gaene telah.”
4 Hyang Yesus raris masaur sapuniki,
“Duh ibu,
eda ja buka keto!
Krana tonden galah Tiange buat ngedengang kuasa.”
5 Nanging ibun Hyang Yesuse mabaos kapining para pengayah pestane sapuniki,
“Laksanayang kamanten napi sane kanikayang Yesus.”
6 Irika wenten nem gentong toya sane kasadyayang kaanggen mabaseh manut budaya anak Yahudine.
Suang-suang gentonge punika sida kadagingin toya ulung dasa (80) kantos satus duang dasa (120) liter.
7 Hyang Yesus ngandika kapining para pengayah pestane sapuniki,
“Dagingin ja gentong-gentonge punika toya!”
Raris gentong-gentonge punika kadagingin toya kantos bek.
8 Irika raris Hyang Yesus malih ngandika kapining ipun sami sapuniki,
“Mangkin ambil ja akidik toyane punika tur bakta ja ka pemimpin pestane.”
Raris toyane punika kabakta ring pemimpin pestane,
9 lan pemimpine ngecapin toyane sane sampun dados anggur.
Ipun nenten uning asal anggure punika;
wantah para pengayah pestane sane mriokang toyane kamanten sane uning.
Raris pemimpin pestane ngamanggil penganten lanange
10 tur mabaos sapuniki,
“Biasane yening anake nyajiang anggur buat mapesta,
anggur sane paling becik dumunan kasajiang.
Raris,
sasampune tamiune wadih,
anake nyajiang anggur sane biasa.
Nanging jerone nyajiang anggur sane paling becik dorinan!”
11 Sekadi punika paindikan ngangobin sane kapertama sane kakaryanin olih Hyang Yesus ring Kota Kana Wawidangan Galilea.
Malantaran paindikan ngangobin punika,
Ida ngedengang kaagungan Idane tur para sisian Idane pracaya kapining Ida.
12 Sasampun paindikane punika,
Hyang Yesus luas ka Kota Kapernaum sareng ibu,
semeton,
lan para sisian Idane.
Ipun sami meneng irika makudang dina suene.
Hyang Yesus Ngusir para Dagange saking Genah Agung Mabaktine
13 Ritatkala rarainan Paskaha anak Yahudine sampun nampek,
Hyang Yesus luas ka Kota Yerusalem.
14 Tatkala Hyang Yesus ngranjing ring Genah Agung Mabakti kapining Sang Hyang Pengardib,
Ida manggihin anake irika pada maadolan.
Wenten makudang anak sane ngadol sampi,
biri-biri lan paksi dara sane kaanggen aturan.
Kenten pada wenten para tukang nukar jinah sedek malinggih irika.
15 Irika raris Hyang Yesus ngaryanin pecut malakar aji tali tur ngulah ipun sami sareng sampi lan biri-birin ipune saking Genah Agung Mabaktine.
Kenten pada Ida madingang meja-meja para tukang nukar jinahe kantos jinahe mabrarakan maideh-idehan.
16 Hyang Yesus raris ngandika kapining para dagang paksi darane sapuniki,
“Tinting ja makejang ene uli dini!
Eda ja ragane makejang nadiang Purin Ajin Tiange dadi tongos madagang!”
17 Irika raris para sisian Hyang Yesuse inget kapining daging Cakepan Sucine sane katulis sapuniki,
“Tresnan Titiange kapining Purin Iratune ngranayang jengah manah Titiange.” Kidung 69:10.
18 Duaning parilaksanan Hyang Yesus sekadi punika,
para pemimpin Yahudine nungkasin Ida saha mabaos sapuniki,
“Buktiang ja indik Ragane madue hak mangda malaksana sekadi punika.
Paindikan sane ngangobin napike jagi edengang Ragane mangda dados bukti buat tiang sami?”
19 Hyang Yesus raris masaur sapuniki,
“Uug ja Purin Sang Hyang Pengardine puniki.
Tur kapuanc kamanten Tiang mresidayang ngwangun malih.”
20 Pemimpin Yahudine punika mabaos malih sapuniki,
“Petang dasa nem (46) tiban suene anake ngwangun Purin Sang Hyang Pengardine puniki.
Ngudake Ragane mapineh mresidayang ngwangun kapuan kamanten?”
21 Sujatine Purin Sang Hyang Pengardine sane kanikayang olih Hyang Yesus punika nenten ja wangunan nanging anggan Idane.
22 Sasampune Ida kauripang malih sekadi jati mula,
irika para sisian Idane inget yening Ida taen ngandikayang indike puniki.
Raris ipun sami pracaya kapining napi sane katulis ring Cakepan Sucine miwah pengandikan Hyang Yesuse.
Hyang Yesus Uning Manusane Sami
23 Ritatkala Hyang Yesus wenten ring Yerusalem duk rarainan Paskahe punika,
akeh anake pracaya kapining Ida krana paindikan-paindikan ngangobin sane kakaryanin.
24 Nanging Hyang Yesus praragan nenten ngugu ipun sami krana Ida uning manusane sami.
25 Ida nenten ja perlu kasaksian buat muktiang indik manusane kapining Ida,
krana Ida uning manah ipune sami.