Yohanes 1

Yohanes

Sang Hyang Sabda Dados Manusa

Saking pengawitne, sadereng jagate kaciptayang, Sang Hyang Sabda sampun wenten. Sang Hyang Sabda sareng-sareng , lan Sang Hyang Sabda punika nenten tios Sang Hyang Pengardi. 2 Saking pengawitne Sang Hyang Sabda wenten sareng Sang Hyang Pengardi. 3 Saluirin sane wenten, kaciptayang malantaran Sang Hyang Sabda. Ring saluirin sane sampun wenten, asiki ja nenten kaciptayang tanpa Ida. 4 Sang Hyang Sabda punika sumber urip tur uripe punika ngicen galang ring manusane. 5 Galang Sang Hyang Sabdane punika masinar ring petenge, turmaning petenge nenten mresidayang ngalahang galang Idane punika.

6 Kaceritayang Sang Hyang Pengardi ngutus sinoman adiri sane mapesengan Yohanes Sang Penglukat. 7 Dane rauh dados saksi indik galange punika mangda malantaran dane makasami anake dados pracaya kapining galange punika. 8 Dane nenten ja galange punika, nanging dane rauh dados saksi indik galange punika. 9 Galang sane sujati punika rauh ring jagate tur nyinarin manusane sami.

10 Sang Hyang Sabda sampun wenten ring jagate, tur jagate puniki kaciptayang malantaran Ida. Nanging anake ring jagate puniki nenten uning Ida. 11 Ida ngrauhin druen Idane, nanging ipun sami nenten nerima Ida. 12 Anake sane nerima Ida, nenten tios anake sane pracaya kapining Ida, kicen hak dados putra lan putrin Sang Hyang Pengardi.

13 Putra lan putrin Idane punika, nenten ja kalekadang krana manusa,

Tur nenten ja krana pikayunan anak lanang,

Nanging krana Sang Hyang Pengardi.

14 Sang Hyang Sabda punika sampun dados manusa turmaning meneng ring tengah-tengah iragane. Lan iraga sampun nyingakin kaagungan Idane, inggih punika kaagungan Putra Tunggal Sang Hyang Aji. Ida kaebekin antuk wara nugraha lan napi sane patut. 15 Dane Yohanes ngicen kasaksian indik Sang Hyang Sabda nganggen suara sane keras sapuniki, “Ida puniki sane ortiang tiang duk tiang mabaos: ‘Ida sane rauh sasampun tiange, agengan kapining tiang krana sadereng tiang lekad, Ida sampun wenten.’” 16 Krana Sang Hyang Sabda kalintang welas asih, iraga sampun nerima welas asih sane maliah. 17 Krana idumun sampun kapicayang malantaran dane , nanging sane mangkin wara nugraha lan napi sane patut sampun rauh malantaran Hyang Yesus, inggih punika Sang Prabu Sane Kajanjiang olih Sang Hyang Pengardi. 18 Nenten wenten anak sane taen nyingakin Sang Hyang Pengardi. Nanging Sang Putra sane tunggal punika masikian sareng Sang Hyang Pengardi, Ajin Idane. Putrane punika sane ngedengang Sang Hyang Pengardi kapining iraga.

Dane Yohanes Ngaku Yening Dane nenten ja Sang Prabu sane Kajanjiang

19 Kaceritayang para pemimpin Yahudine ngutus para lan para anak Lewi saking Kota Yerusalem sid dane Yohanese mangda mataken sapuniki, “Sirake jerone puniki?”

Irika dane Yohanes ngicen kasaksian kapining ipun sami. 20 Dane jujur ngaku saha masaur sapuniki, “Tiang nenten ja Sang Prabu Sane Kajanjiang olih Sang Hyang Pengardi.”

21 Raris ipun sami mataken malih, “Yening kenten, sirake jerone? Napike jerone puniki dane Elia, inggih punika idumun?”

Dane masaur, “Tiang nenten ja Sinoman Elia.”

Raris ipun sami malih mataken sapuniki, “Napike jerone Sinoman sane kajanjiang punika?”

Dane masaur, “Nenten!”

22 Raris ipun sami mabaos malih kapining dane Yohanes sapuniki, “Yening kenten, sirake sujatine jerone? Napike sane nikayang jero indik ragan jerone? Krana tiang musti matur indik jerone kapining anake sane ngutus tiang mriki.”

23 Dane Yohanes raris masaur nganggen babaosan dane Yesaya, inggih punika sinoman Sang Hyang Pengardi idumun:

“Tiang niki suara sane gelur-gelur ring genah sane bengang linggah sekadi puniki:

‘Leserang ja margi ring manah ragane buat sapengrauh Sang Hyang Tunggal.’” Yesaya 40:3.

24 Saking anake sane kautus olih para pemimpin Yahudine punika, wenten makudang anak Parisi. 25 Irika ipun mataken kapining dane Yohanes sapuniki, “Napike kranane jerone nglukat anak lianan yening jerone nenten ja Sang Prabu Sane Kajanjiang, nenten ja Sinoman Elia tur nenten ja Sinomane sane jagi rauh punika?”

26 Dane Yohanes raris masaur sapuniki, “Tiang nglukat nganggen toya biasa. Nanging ring tengah-tengah jerone wenten adiri Anak sane nenten uningin jerone. 27 Ida sane rauh sasampun tiang. Kadirasa ngelus sandal Idane, tiang nenten ja pantes.” 28 Paindikane punika mamargi ring Desa Betania, sane wenten ring dangin Tukad Yordane, inggih punika genah dane Yohanes biasane nglukat anak.

Kasaksian Dane Yohanes Indik Hyang Yesus

29 Benjangane, dane Yohanes nyingakin Hyang Yesus rauh ring dane. Irika dane mabaos sapuniki, “Cingakin ja! Panak Biri-biri Sang Hyang Pengardine sane ngambil manusane. 30 Indik Ida puniki sane ortiang tiang tatkala mabaos, ‘Ida sane rauh sasampun tiang agengan kapining tiang krana sadereng tiang lekad, Ida sampun wenten.’ 31 Idumun, tiang nenten uning sira sujatine Ida. Nanging tiang rauh nglukat nganggen toya mangda ngedengang Ida kapining anak Israele.”

32 Dane Yohanes ngicen kasaksian indik Ida sapuniki, “Tiang nyingak Roh Sang Hyang Pengardi tedun saking langite sekadi paksi dara tur meneng ring duur Idane. 33 Idumun, tiang nenten uning Ida. Nanging Sang Hyang Pengardi sane ngutus tiang buat nglukat anak nganggen toya biasa, masabda sapuniki, ‘Cening bakal ningalin adiri Anak katedunin tur Rohe ento meneng ring duur Iane. Ia ane bakal nglukat anak tusing ja nganggen toya nanging nganggen Roh Sang Hyang Pengardi sane suci.’ 34 Tiang praragan sampun nyingak paindikane punika tur ngicen kasaksian indik Ida punika nenten tios Putran Sang Hyang Pengardi.”

Sisian Hyang Yesus sane Kapertama

35 Benjangane dane Yohanes kari ring Desa Betania kasarengin kalih sisian danene. 36 Dane nyingakin Hyang Yesus liwat mrika. Irika dane mabaos sapuniki, “Cingakin ja Panak Biri-birin Sang Hyang Pengardine!”

37 Mirengin baos dane Yohanese sapunika, makakalih sisiane punika nugtug Hyang Yesus. 38 Raris Hyang Yesus nyingak kuri tur manggihin ipun sareng kalih nugtug Ida. Ida raris ngandika sapuniki, “Napike rereh ragane?”

Ipun masaur sapuniki, “Rabi, ring dijake Rabi meneng?” Rabi ring basa Ibrani maarti ‘Guru’.

39 Hyang Yesus nyaurin ipun sapuniki, “Mriki ja tur cingakin!” Ipun raris luas sareng Hyang Yesus tur nyingakin ring dija Ida meneng. Ngawit dinane punika, sawetara jam pat sore, ipun makakalih meneng sareng-sareng Hyang Yesus.

40 Saking kalih sisiane punika sane mirengin baos dane Yohanese tur nugtug Hyang Yesus, wenten sane mapesengan Andreas, semeton I Simon Petruse. 41 Irika raris I Andreas gelis-gelis ngrereh I Simon Petrus, semeton ipune, tur mabaos kapining ipun sapuniki, “Tiang sami sampun matemu sareng Mesias.” “Mesias” pateh teken “Kristus,” sane maarti ‘Sang Prabu Sane Kajanjiang olih Sang Hyang Pengardi’. 42 Raris I Andreas ngatehang I Simon ring Hyang Yesus.

Irika Hyang Yesus nlektekin I Simon saha ngandika, “Wih Simon, okan I Yohanes. Jani Tiang ngadanin ragane Kepas.” Artin Kepas pateh teken Petrus sane maarti gunung batu.

Hyang Yesus Ngamanggil I Pilipus lan I Natanael

43 Benjangane, Hyang Yesus netepang jagi luas ka Wawidangan Galilea. Ida ngrereh adiri anak sane mapesengan Pilipus. Salanturnyane Ida ngandika kapining ipun sapuniki, “Tugtug ja Tiang!”

44 I Pilipus puniki anak saking Kota Betsaida, pateh sareng I Andreas lan I Petrus. 45 I Pilipus ngrereh anak sane mapesengan Natanael. Tur I Pilipus mabaos kapining ipun sapuniki, “Tiang ajak makejang suba matemu ajak Ida ane kabaosang di Cakepan Sucine ane katulis olih dane Musa lan para sinoman Sang Hyang Pengardi. Ida mapesengan Yesus, okan dane Yusup saking Desa Nasaret.”

46 I Natanael raris masaur sapuniki, “Nasaret? Pastika tusing ada paundukan melah teka uling ditu!”

I Pilipus raris masaur sapuniki, “Mai ja tingalin padidi.”

47 Duk Hyang Yesus nyingakin I Natanael rauh ring Ida, Ida raris ngandika sapuniki, “Cingak ja anake puniki, ipun anak Israel tulen tur anak sane tulus ati.”

48 Irika raris I Natanael mataken kapining Hyang Yesus sapuniki, “Punapike Iratu prasida uning titiang?”

Hyang Yesus raris ngandika sapuniki, “Sadereng Pilipus ngamanggil ragane, Tiang nyingakin ragane ring beten punyan ara.”

49 Irika raris I Natanael matur kapining Hyang Yesus sapuniki, “Guru puniki nenten tios Putran Sang Hyang Pengardi tur Prabu anak Israele!”

50 Hyang Yesus raris ngandika sapuniki, “Pih, ragane gelis pracaya kapining Tiang tatkala Tiang ngamaosang, ‘Tiang nyingakin ragane ring beten punyan ara!’ Ragane jagi nyaksiang paindikan-paindikan sane agengan kapining paindikane punika.” 51 Ida malih ngandika sapuniki, “Tiang ngandikayang sane patut, sujatine ragane jagi nyingakin langite mabukak tur Sang Hyang Pengardi menek tuun malantaran Sang Putraning Manusa.”

Penuntun mabligbagan ring pasamuan:

1. Ngaturang penyuksma.

“Ngiring ja iraga ngaturang suksma mangkin. Semeton jagi ngaturang suksma indik napi?”

2. Ceritayang ja pakeweh semetone suang-suang raris iraga saling tunas icayang.

“Napike semeton wenten pakeweh mangkin?”

3. Ngwacen utawi mirengin paplajahane puniki.

4. Saurin ja pitakenne puniki:

“Napi sane plajahin iraga indik Sang Hyang Tunggal ring ceritane puniki?”

“Napi sane plajahin iraga indik manusa saking ceritane puniki?”

“Sekadi napike sapatutne iraga nyalanang idup manut pengajahane puniki?”

“Kapining sirake sapatutne iraga nyeritayang malih ceritane puniki?”