Yohanes
Pengater
Indik Orti Rahayu Manut Dane Yohanes
Orti Rahayu manut dane Yohanes puniki,
cakepan sane nerangang indik urip Sang Hyang Yesuse.
Ida lekad idumun dados manusa ring jagate sampun duang tali (2.000) tiban sane sampun lintang.
Sang Hyang Yesus meneng ring Negara Israel.
Ida ngawitin ngajahin indik Sang Hyang Pengardi kirang langkung tahun telung dasa (30) Masehi.
Ritatkala punika,
Ida mayusa kirang langkung telung dasa (30) tiban.
Pengajahan sane pokok ring cakepane puniki inggih punika:
1) Sang Hyang Pengardi punika nenten tios Sang Hyang Aji.
Ida sane ngutus Sang Hyang Yesus mangda nglaksanayang pikayunan Idane.
2) Sang Hyang Yesus akeh ngaryanin paindikan sane ngangobin.
Paindikane punika ngranayang akeh anake pracaya kapining Ida.
3) Sang Hyang Yesus punika nenten tios Sang Putra.
4) Sang Hyang Yesus ngajahin indik:
a) Kapatutan sane mawit saking Sang Hyang Pengardi
b) Urip sujati salamin-laminne
c) Welas asih lan satya kapining Ida kamanten
d) Pakaryan Roh Sang Hyang Pengardi.
Indik Pidaging Cakepan Yohanes
Cakepan puniki katulis olih dane Yohanes sane nyambatang ragannyane ‘sisia sane kasayangin’ olih Sang Hyang Yesus.
Dane Yohanes puniki akeh nyeritayang paindikan ngangobin sane kakaryanin olih Sang Hyang Yesus,
tur dane pada nyeritayang akeh pengajahan Idane.
Saluirin paindikane punika katulis ring cakepane puniki mangdane iraga sane ngwacen jagi pracaya indik Sang Hyang Yesus puniki nenten tios Sang Prabu Sane Kajanjiang olih Sang Hyang Pengardi.
Kenten pada sapatutne iraga pracaya indik Ida punika Putran Sang Hyang Pengardi.
Lan malantaran pracaya kapining Ida,
iraga ngamolihang urip sujati salamin-laminne.
Agama Sane Wenten ring Israel Idumun
Sang Hyang Yesus lekad ring Negara Israel,
tur wargane irika magama Yahudi.
Kenten pada Sang Hyang Yesus lan para pengiring Idane magama Yahudi;
duk punika dereng wenten agama ‘Kristen’.
Pengiring agama Yahudine punika pracaya kapining Sang Hyang Tunggal lan ninutin piteket-piteket sane katulis ring ukum agama Yahudine.
Kenten pada,
anak Israele pracaya yening bangsan ipune punika bangsa sane luih krana kapilih olih Sang Hyang Tunggal.
Salah tunggal seka sane dados pemimpin agama Yahudine inggih punika anak Parisi.
Ipun sami anteng nglaksanayang saluirin daging Cakepan Suci dane Musa lan ukum adat anak Yahudine.
Yadiastun anteng magama,
akeh saking anak Parisine punika mapi-mapi patut tur nenten nyalanang welas asih kapining sasama.
Ipun lebih ngutamayang linggih ipune mangda kaajiang bandingang satinut lan bakti kapining Sang Hyang Pengardi.
Akeh anak Parisine nenten seneng kapining Sang Hyang Yesus lan pengajahan Idane.
Punika mawinan anak Parisine sering matungkasan sareng Sang Hyang Yesus krana Ida kanikayang nglanggar ukum agama Yahudine.
Basa sane Kaanggen ring Cakepan Dane Yohanes
Ritatkala dane Yohanes kari urip,
orti indik Sang Hyang Yesus sampun kasub ring wawidangan (i) Timur Tengah,
inggih punika Yudea,
Arab,
Siria tur Asia Alit miwah (ii) Eropa Kelod,
inggih punika Makedonia,
Akaya,
Italia tur sane lianan.
Duk punika,
saluirin wawidangane punika kajajah olih Bangsa Romane.
Kenten pada,
para padagange irika nganggen basa Yunani.
Punika mawinan dane Yohanes nulis cakepane puniki nganggen basa Yunani.
Cakepan Puniki Kasalin ka Basa Bali
Pidaging cakepane puniki kaambil saking Cakepan Suci sane asli.
Sane mangkin cakepane puniki kasalin dados basa Bali madya mangdane aluh karesepang.
Cakepane puniki nenten tios pengajahan sane patut,
krana pidagingnyane kasalin manut basa asli.
Paindikan ring sor puniki nenten wenten ring basa asli,
nanging kaimbuhin mangda aluh karesepang.
Minakadi:
- Judul cerita nujuin pengajahan.
- Catetan ring sor sane madaging tanda sekadi puniki [a] tatujone mangda nerangang indik kruna wiadin lengkarane punika.
- Lengkara sane macetak sendeh ring cakepane puniki maarti lengkarane punika nenten wenten ring cakepan sane asli.
Lengkarane punika kaimbuhin mangdane iraga prasida ngresepang napi sane katuek saking cakepan asline.
- Kruna sane nganggen tanda bintang [*] kajelasin ring kamus sane wenten ring dorin bukune puniki.
- Lengkara sane wenten tulisan cakepan lianan umpamane:
Lukas 19:10.
Artine lengkarane punika kaambil saking cakepane punika.