Anak Janda Tiwas sane Maturan Akeh
21
Ritatkala Hyang Yesus wenten ring Genah Agung Mabakti kapining Sang Hyang Pengardia,
Ida nlektekin para anak sugih sane maturan jinah ring kropak aturane.
2 Kenten pada Ida nlektekin anak janda sane tiwas sedek nyemplungin jinah logam kakalih.
3 Raris Hyang Yesus ngandika ring para sisian Idane sapuniki,
“Raos tiange ene saja!
Aturan anak jandane ento liunan tekening aturan anake makejang ane ada dini.
4 Krana anake sugih ento maturan uling arta branannyane ane maliah.
Nanging anak jandane ane tiwas ento ngaturang saluirin pagelahannyane ane bakal anggona sadina-dina.”
Hyang Yesus Ngandikayang Indik Dina Pamuput Sampun Nampek
5 Kaceritayang mangkin wenten saking para pengiring Hyang Yesuse ngamaosang indik kaluihan wangunan Genah Agung Mabakti kapining Sang Hyang Pengardi.
Krana genah mabaktine punika kapayasin nganggen batu-batu sane luih lan prabot-prabotan sane kaaturang ring Sang Hyang Pengardi.
Punika mawinan Hyang Yesus ngandika sapuniki,
6 “Bakal teka galahe,
makejang ane tingalin ragane ditu,
bakal kaenyagang kanti tusing ada batu ane matumpuk di duur batu ane lenan.”
7 Irika raris para sisian Hyang Yesuse mataken sekadi puniki,
“Guru,
malih pidanke paindikane punika jagi mamargi?
Sekadi napike tandane yening paindikane punika jagi gelis mamargi?”
8 Hyang Yesus nyaurin ipun sami sapuniki,
“Waspada ja apanga ragane tusing kabelog-belogin.
Krana liu anake bakal teka nganggon pesengan Tiange tur ngorahang,
‘Tiang ene Sang Prabu sane Kajanjiang olih Sang Hyang Pengardi!’
Lan ‘Dina pamuput suba paek.’
Eda ja nugtug ia.
9 Tur ritatkala ragane ningeh unduk bangsa-bangsa ane maperang wiadin seka ane maruang-ruangan pada brontak,
eda ja ragane tengkejut.
Krana makejang paundukane ento musti mamargi malunan.
Sakewala,
ento tusing ja maarti dinane pamuput suba paek,
dinane ento manusane bakal kaakimin.”
10 Raris Ida nglanturang pengandikan Idane sapuniki,
“Bangsa lakar maperang nglawan bangsa,
lan karajaan lakar maperang nglawan karajaan.
11 Buina maideh-idehan bakal ada linuh gede lan bencana kakirangan ajengan tur liu anake bakal kena penyakit ane nglahlah.
Keto masih bakal ada tanda-tanda di langite ane makada manusane jejeh.
12 “Sakewala satonden makejang paundukane ento mamargi,
ragane bakal kaejuk lan kasiksa.
Ragane bakal kaadilin di bale wantilane tur kakrangkeng di buine.
Buina ragane bakal kapaid ka arepan para raja lan para penguasane krana ragane nugtug Tiang.
13 Sakewala makejang pakewehe ento dadi galah buat ragane ngortiang Orti Rahayune.
14 Ento mawinan,
kukuhang ja keneh ragane,
apanga tusing ngenehang malu apa ane bakal raosang ragane buat mabela raga.
15 Krana Tiang padidi bakal maang ragane kawicaksanaan ngraos,
apanga adiri ja tusing ada anak ane nyidang nglawan utawi nungkasin raos ragane.
16 “Ragane bakal kaserahang sid penguasane baan rerama,
nyama tugelan,
nyama braya,
muah timpal-timpal ragane.
Keto masih ada uli ragane ane bakal kamatiang.
17 Buina makejang anake bakal gedeg tekening ragane krana nugtug Tiang.
18 Sakewala akatih ja bok uli sirah ragane tusing bakal ilang.
19 Yening ragane setata satya tekening Tiang,
ragane bakal slamet di swarga.”
Kota Yerusalem Jagi Kaenyagang
20 Hyang Yesus malih ngandika sekadi puniki,
“Yening ragane ningalin Kota Yerusaleme kaiterin tentara musuh,
ragane lakar nawang tusing ja buin mekelo kotane ento bakal kaenyagang.
21 Tatkala ento,
nyen ja ane ada di Wawidangan Yudea musti malaib ka pegunungan.
Tur nyen ja ane ada di kotane,
musti magedi uli ditu.
Tur nyen ja ane ada di jaban kotane,
eda ja buin macelep ka kota.
22 Krana duk galahe ento,
anake katiben ukuman saking Sang Hyang Pengardi,
apanga mamargi makejang paundukan ane suba katulis di Cakepan Sucine.
23 Buina amat ke sengkalane luh-luhe ane beling lan ane sedek manyonyoin pianak!
Krana bangsane ento bakal katiben pakeweh ane gede ulian kaduken olih Sang Hyang Pengardi.
24 Ada ane bakal kamatiang nganggon pedang,
tur ada masih ane bakal kadadiang tawanan olih bangsa-bangsa lenan.
Lantas Kota Yerusalem bakal kajekjek olih bangsa-bangsa lenan ane tusing Yahudi,
kanti genep galahe ane suba kapastiang olih Sang Hyang Pengardi buat bangsane ento.”
Sapengrauh Sang Putraning Manusa
25 Raris Hyang Yesus malih ngandika sapuniki,
“Buina bakal ada tanda-tanda ngenah uli matan aine,
bulane,
lan bintang-bintange.
Di saluirin gumine bangsane bakal jejeh tur bingung teken munyin kuugan ombak segarane.
26 Anake makejang bakal pingsan ulian kaliwat jejeh tekening paundukan ane mamargi di gumine ene,
krana matan ai,
bulan lan bintang-bintange bakal mabarburan.
27 Tatkala ento manusane di gumine bakal ningalin Tiang,
Sang Putraning Manusab,
rauh kalingkubin ambu.
Keto masih manusane bakal ningalin kuasa lan kaagungan Tiange.
28 Yening unduke ento nyumunin mamargi,
bangun ja tur tingalin ja ka langite,
krana ragane bakal enggal kaslametang.”
Pengumpamian Indik Punyan Delima
29 Raris Hyang Yesus nyeritayang pengumpamian ring ipun sami sapuniki,
“Tingalin ja punyan delimane utawi punyan kayu ane lenan.
30 Yening ragane ningalin punyan-punyanane ento nyumunin madon,
ragane nyidang nawang masan panese suba paek.
31 Nah,
buka keto yening ragane ningalin tanda-tanda nyejehin ane nikain Tiang,
ragane bakal nawang Sang Hyang Pengardi bakal enggal mamrentah dados Raja di gumine.
32 “Raos Tiange ene saja!
Sujatine makejang paundukane ento bakal mamargi,
satondene makejang katurunane ene padem.
33 Langit lan gumine bakal ilang,
sakewala pengandikan Tiange tetep salamin-laminne.”
Piteket Mangda Siaga
34 Raris Hyang Yesus ngandika malih sapuniki,
“Waspada ja ragane.
Eda ja ragane kaliwat sibuk mapesta-pesta lan nginum inuman sane munyahin.
Tur eda ja ragane sengsaya tekening idupe di gumine ene,
ane ngranayang ragane tusing siaga,
tatkala dinane Sang Putraning Manusa rauh buka jebag.
35 Krana dinane ento bakal nadak teka buat makejang manusane di gumine ene.
36 Setata siaga ja lan nunas ica apanga ragane makejang kukuh kanti luput uli paundukan ane bakal teka ento.
Turmaning nunas ica ja apanga ragane nyidang tangkil ring ajeng Sang Putraning Manusa.”