Pengurus Arta Brana sane Dayane Akeh
16
Hyang Yesus malih nyeritayang pengumpamian ring para sisian Idane sapuniki,
“Ada anak sugih ane ngelah pegawe ane ngurus arta branane.
Kaceritayang,
ada anak ane nekedang sid anake sugih ento unduk pegawene ento boros nganggon arta branan anake sugih ento.
2 Laut ia ngaukin pegawene ento tur ngraos kene,
‘Tiang liu ningeh paundukan jele unduk ragane.
Keto mawinan ragane tusing ja buin dadi pegawe ane ngurus arta branan tiange.
Ane jani petek ja tur serahang ja catetan ragane unduk utang anake teken tiang ane urus ragane.’
3 “Ditu lantas pegawene ento mapineh kene,
‘Kenken abet tiang jani?
Tiang bakal pecata olih pamekel tiange.
Numbeg,
tiang tuara kuat;
idih-idih,
tiang lek.
4 Jani tiang ngelah daya.
Yening tiang suba pecata tekening pamekel tiange,
tiang musti liu ngelah timpal ane nyak maang tiang nginep sid umahne!’
5 “Ditu lantas pegawe ento ngaukin seka besik saluirin anake ane mutang teken pamekelne.
Sid anake ane kapertama ia ngraos kene,
‘Kudake utang ragane kapining pamekel tiange?’
6 “Laut anak ento masaut kene,
‘Tiang mutang lengis saitun telung tali limang atus (3.500) liter.’
“Nah ditu lantas pegawene ento ngomong kene,
‘Niki surat utang ragane.
Malinggih tur tulis ja utang ragane atenga kamanten,
inggih punika siu pitung atus seket (1.750) liter.’
7 “Laut pegawene ento ngomong masih teken ane lenan kene,
‘Kudake utang ragane?’
“Laut anake ento masaut kene,
‘Duang dasa (20) ton gandum.’
“Tur pegawene ento laut ngomong kene,
‘Niki surat utang ragane.
Tulis ja utang ragane enem belas (16) ton.’
8 “Nah,
pamuputne pamekelne ngajumang pegawe ane tusing jujur ento krana dayane liu.”
Raris Hyang Yesus ngandika ring para sisian Idane sapuniki,
“Pengumpamiane ento dadi paplajahan unduk anake ane idupne tuah ngenehang paundukan sekala dogenan.
Anake ane buka keto liunan ngelah daya anggona mragatang pakewehne bandingang teken anake ane idup di galange.
9 Raos Tiange ene saja!
Anggon ja arta branan ragane ngalih timpal.
Apanga tatkala arta branane ane di gumine ene telah,
ragane katerima di tongos dija ragane bakal urip salamin-laminne.
10 “Anake ane satya tekening paundukan ane cenik,
anake ento pada lakar satya tekening paundukan ane gede.
Lan anake ane tusing jujur tekening paundukan ane cenik,
anake ento pada tusing jujur tekening paundukan ane gede.
11 Nah,
yening ragane tusing satya ngurus arta brana di gumine ene,
nyenke ane bakal ngugu maang arta di swarga?
12 Tur yening ragane tusing satya ngurus arta branan anak len,
nyenke ane bakal maang ragane arta brana apang dadi pagelahan ragane padidi?
13 “Tusing ja ada pengayah ane nyidang ngayah sid pamekel dadua.
Yening keto,
pastika ia tresna asih teken pamekel ane besikan,
tur tusing demen teken pamekel ane lenan.
Utawi ia bakal lebih satya teken pamekel ane besikan tur tusing ngrunguang pamekel ane lenan. Buka keto ragane tusing nyidang ngayahin Sang Hyang Pengardi yening arta brana ane utamayang ragane.”
Pengandikan Hyang Yesus ring Para Anak Parisi
14 Duk punika para anak Parisine mirengin sekancan pengandikan Hyang Yesuse.
Krana ipun sami loba kapining jinah,
raris ipun sami ngedekin Hyang Yesus.
15 Punika mawinan Hyang Yesus ngandika kapining ipun sami sapuniki,
“Jero setata ngutsahayang mangda anake lianan mapineh jerone anak patut.
Nanging Sang Hyang Pengardi uning manah jerone sane jaat punika.
Krana napi sane kaajumang olih manusa,
kanistayang olih Sang Hyang Pengardi.
16 “Cakepan Suci sane katulis olih dane Musa lan para sinoman Sang Hyang Pengardi kari ajeg kantos jaman dane Yohanesa penglukat.
Ngawit jaman dane Yohanese punika,
Orti Rahayu setata kaortiang,
inggih punika indik Sang Hyang Pengardi jagi gelis mamrentah dados Raja ring jagate.
Tur sebilang diri anake ngutsahayang pisan mangda dados kraman Sang Prabune punika.
17 Nanging aluhan langit lan gumine ical,
bandingang agecek daging Cakepan Sucine punika nenten kaanggen malih.
18 “Sapa sira ja sane malasang kurenannyane sane istri,
raris makurenan malih sareng anak istri lianan,
artine anake punika mamitra.
Tur anake sane makurenan sareng anak istri sane sampun kapalasang,
anake punika pada mamitra.”
Pengumpamian indik Pikolih Momo kapining Arta Brana
19 Raris Hyang Yesus nyeritayang pengumpamian sekadi puniki,
“Wenten anak sugih sane setata mapengangge melah malakar kain sutra mael.
Sebilang dina ipun masukarena lan ngajeng ajengan sane sarwa mael.
20 Nanging ring pamedal jeronnyane wenten anak idih-idih mapesengan I Lasarus kaslelegang irika.
Ragannyane akeh madaging berung.
21 Lan ipun meled ngajeng sisan ajengan sane kakutang olih anake sugih punika.
Turmaning kuluke nyilapin berungnyane.
22 “Kaceritayang mangkin,
I Lasarus punika padem.
Irika para malekate ngatehin jiwatmannyane ka pabinan dane Abrahameb.
Anake sugih punika taler padem raris kakubur.
23 Irika anake sugih punika kasiksa kalara-lara ring kawah apine.
Ipun nyingak marep menek lan nyingakin saking adoh I Lasarus ring sisin dane Abrahame.
Gambar: Anake Sugih Kasiksa Kalara-lara (16:23)
24 Raris anake sugih punika majeritan,
‘Bapa Abraham,
olasin ja titiang!
Nikain ja Lasarus mangda ngetelin toya sane nyeng nganggen jerijin limane mangda layah titiange belus,
saantukan titiang kalintang sengsara ring genine.’
25 “Nanging dane Abraham nyaurin,
‘Tusing ja keto.
Inget ja dugase idup,
cening suba napetang saluirin ane melah lan I Lasarus napetang ane jelek.
Nanging jani I Lasarus liang dini lan cening napetang sengsarane ditu.
26 Apa buin ada pangkung ane linggah!
Iraga kapalasin apanga anake ane dini tusing nyidang ngliwat kemu,
lan anake ane ditu tusing nyidang ngliwat mai.’
27 “Anake sane sugih punika matur,
‘Yening asapunika,
inggih Bapa Abraham,
titiang nunas mangda I Lasarus kautus pramangkin ka genah bapan titiange,
28 krana wenten lalima nyaman titiang drika.
Nikain ja I Lasarus nuturin ipun mangda nenten ngranjing ring genah sengsarane puniki.’
29 “Nanging dane Abraham masaur,
‘Tusing ja keto.
Ia makejang suba namping Cakepan Suci sane katulis dane Musa lan para sinoman sane lianan.
Depang ja apanga ia makejang ninutin ane katulis ditu.’
30 “Anake sane sugih punika masaur,
‘Bapa Abraham!
Cakepane punika manten nenten ja nyandang.
Nanging yening wenten anake sane sampun padem mrika nuturin ipun,
ipun jagi masalin saking urip sane madosa.’
31 “Raris dane Abraham masaur,
‘Tusing ja keto!
Yen ia makejang tusing ninutin Cakepan Suci sane katulis dane Musa lan sinoman sane lianan,
pastika ia makejang masih tusing bakal pracaya yadiapin anake mati idup buin laut kemu.’”