Hyang Yesus Nyegerin Anak Sungkan Beteg ring Rahina Sabat
14
Ring rahina Sabata,
Hyang Yesus kaundang ngajeng ring griyan pemimpin anak Parisineb.
Anake akeh sane wenten irika nlektekin Ida menek tuun,
napike Ida jagi nglanggar awig-awig indik rahina Sabat.
2 Saget rauh anak sungkan beteg ring tangan lan batisnyane;
ipun ngadeg ring ajeng Hyang Yesuse.
3 Raris Hyang Yesus mataken ring soroh Parisi lan guru agama Yahudine sapuniki,
“Manut ukum agaman iragane,
dadoske nyegerin anak sungkan ring rahina Sabat?”
4 Nanging ipun sami meneng kamanten.
Raris Hyang Yesus ngamel tangan anake sungkan punika tur nyegerin ipun.
Sasampune punika,
Ida mrentahang ipun mapamit.
5 Raris Hyang Yesus ngandika ring anake sami sapuniki,
“Umpami,
wenten okan jerone utawi lembun jerone ulung ka sumure ring rahina Sabat.
Sapa sirake saking jerone nenten pramangkin ngutsahayang nulungin oka utawi lembunnyane?”
6 Nanging ipun sami nenten wenten sane prasida nyaurin Hyang Yesus.
Anake sane Matilesang Raga Jagi Kautamayang
7 Hyang Yesus nyingakin wenten tamiu-tamiune punika sane milih malinggih ring genahe sane pinih ajeng.
Punika mawinan Ida ngicen pengumpamian kapining ipun sami sekadi puniki,
8 “Yening jerone kaundang ring acara pawiwahan,
sampunang ja jerone malinggih ring genah sane pinih ajeng.
Krana minab sang madue karya ngundang tamiu sane utamaan kapining jerone.
9 Ritatkala tamiu utamane punika rauh,
sang madue karya mabaos kapining jerone sapuniki,
‘Ampura,
genahe puniki genah tamiu sane utama.’
Nah irika,
pastika jerone jagi makisid antuk manah sane kimud tur malinggih ring genah sane pinih ungkur.
10 Punika mawinan,
ritatkala jerone kaundang,
pilih ja genah sane pinih ungkur.
Minab sang madue karya ngrauhin jerone lan mabaos sapuniki,
‘Duh sawitran tiange,
rarisang ja malinggih ring ajeng.’
Paindikane punika ngadakang jerone jagi kautamayang ring arepan para tamiune sane lianan.
11 Krana sira ja sane ngajumang raga jagi kanistayang;
lan sira ja sane matilesang raga jagi kaagungang.”
12 Raris Hyang Yesus ngandika ring anak Parisine sane ngundang Ida sapuniki,
“Yening jerone ngundang anak jagi ngajeng ring griyan jerone,
sampunang ja ngundang sawitra,
semeton,
penyamaan wiadin pisaga sane sugih.
Krana benjangan ipun jagi ngwales ngundang jerone mapesta ring jeronnyane.
Nika artine jerone sampun polih walesan.
13 Yening jerone madue pesta,
undang ja anak tiwas,
anak cacad,
anak lumpuh,
lan anak buta.
14 Punika mawinan jerone jagi kaswecanin,
sawireh ipun sami nenten prasida ngwales parilaksana becik jerone.
Jerone jagi nerima walesan ring swarga,
saking Sang Hyang Pengardi ritatkala anake sane malaksana patut jagi kauripang malih saking padem.”
Baya Ngelidin Undangan Pesta Agung
15 Mirengin pengandikan Hyang Yesuse sapunika,
wenten adiri anak Yahudi ring griyane punika mabaos sapuniki,
“Bagia ja anake sane kaundang ka pesta tatkala Sang Hyang Pengardi mamrentah dados Raja ring jagate.”
16 Nanging Hyang Yesus ngajahin indik pestan Sang Hyang Pengardi nganggen pengumpamian sapuniki,
“Wenten pamekel sane madue karya pesta agung lan akeh ngundang tamiu.
17 Ritatkala pestane jagi kakawitin,
pamekele punika nunden pengayahnyane mastiang para undangane punika mangda rauh duaning sami sampun siaga.
18 “Nanging ipun seka besik madaya mangda nenten durus rauh.
Sane kapertama mabaos ring pengayahe punika sapuniki,
‘Tiang wawu numbas tegal atebih lan patut nengokin.
Tiang nunas sinampura.’
19 “Sane lianan pada mabaos sapuniki,
‘Tiang wawu numbas sampi limang akit,
lan jagi negarang sampi-sampine punika.
Tiang nunas sinampura.’
20 “Sane malih siki mabaos sapuniki,
‘Tiang wawu marabian.
Punika mawinan tiang nenten sida mrika.’
21 “Raris budal pengayahe punika tur nyeritayang paindikane punika ring pamekel ipune.
Pamekel punika kalintang duka lan mabaos,
‘Enggalang ja luas ka jalan-jalane lan sekancan rurunge di kota.
Ajak ja mai anak tiwas,
anak cacad,
anak buta,
lan anak lumpuh.’
22 “Kaceritayang mangkin,
pengayahe matur sapuniki,
‘Jero,
prentah jerone sampun laksanayang tiang,
nanging genahe malinggih kari akeh.’
23 “Raris pamekele punika mabaos malih,
‘Kemu ja ka jalan-jalan ane gede lan rurung-rurunge di jaban kotane,
tur sedsed ja ngorahin anak mai apang umah tiange bek.
24 Tiang negesin!
Nyen ja ane ngelidin undangan tiange,
tusing bakal naar dadaaran ane kasajiang di pestan tiange ene.’”
Pakeweh Dados Sisian Hyang Yesus
25 Kaceritayang mangkin,
akeh anake mamargi nyarengin Hyang Yesus,
lan Ida nyingakin kuri saha ngandika,
26 “Sirake sane pantes dados sisian Tiange?
Nenten tios anake sane bani ngutang bapa,
meme,
somah,
oka,
tur semeton-semetonnyane lanang lan istri,
turmaning bani ngutang angkihane praragan.
27 Anake sane nenten misadya nugtug Tiang kantos padem - sekadi anake sane negen kayu salibc - ipun nenten mresidayang dados sisian Tiange.
28 “Umpamine wenten anak sane jagi ngaryanin bale sane tegeh.
Nentenke ipun jagi malinggih dumun ngitungang penelasne,
napike genep jinahne kaanggen ngaryanin bale punika kantos pragat?
29 Krana yening ipun ngaryanin dasar nanging nenten mresidayang mragatang,
pastika anake akeh sane nyingakin jagi ngedekin ipun.
30 Tur anake akeh mabaos sapuniki,
‘Ipun ngawitin ngaryanin bale sane tegeh,
nanging nenten mresidayang mragatang.’
31 “Umpamine,
wenten raja sane madue tentara dasa tali (10.000) jagi maperang nglawan raja sane madue tentara duang dasa tali (20.000).
Nentenke rajane punika jagi malinggih dumun,
mineh-minehang napike sanggup ipun nglawan musuhe punika?
32 Yening rajane punika nenten sanggup,
pastika ipun jagi ngutus utusan ngidih dame kapining musuhe punika tatkala musuhe kari adoh.
33 “Kenten pada ragane suang-suang,
yening ragane dados murid Tiange,
ragane patut ngutang saluirin arta branane.”
Pageh Dados Sisian Hyang Yesus
34 Raris Hyang Yesus malih ngandika sekadi puniki,
“Uyahe melah.
Nanging yening umpamine uyahe punika dados nyem,
punapike carane kapakehang malih?
35 Uyahe sane nyem nenten maguna krana nenten prasida kadadosang lemekand utawi nyuburin pategalan.
Melahan kutang kamanten!
Yening makuping,
resepang ja pengajahan Tiange.”