Iraga Musti Masalin saking Urip Madosa
13
Ritatkala punika,
wenten anak sane nyeritayang ring Hyang Yesus,
indik para warga Galileane sane kapademang olih gubernur Pilatus saking pemrentahan Romaa.
Risedek kapademang,
ipun sami ngaturang aturan marupa beburon kapining Sang Hyang Pengardi.
2 Mirengin baos anake punika,
Hyang Yesus ngandika sapuniki,
“Napike ragane ngaden ulah pati punika muktiang ipun lebih madosa bandingang kapining anak Galileane sane lianan?
3 Nenten ja sekadi punika!
Nanging elingin ja:
yening ragane nenten masalin saking urip sane madosa,
ragane makasami taler jagi padem.
4 Ragane pastika eling wenten plekutus (18) diri sane padem ring Siloam krana tepen menara uug.
Napike ragane ngaden salah pati punika muktiang ipun lebih madosa bandingang kapining anake lianan sane meneng ring Kota Yerusalem?
5 Nenten ja sekadi punika!
Tiang negesin malih:
yening ragane nenten masalin saking urip sane madosa,
ragane makasami taler jagi padem.”
6 Raris Hyang Yesus nyeritayang pada pengumpamian sekadi puniki,
“Wenten anak madue abian anggur.
Ring abian anggure punika masih wenten punyan delima.
Sedek dina anu,
ipun mrika ngrereh buah delimane,
nanging asiki ja ipun nenten polih buahnyane.
7 Raris ipun mabaos kapining tukang abiane sapuniki,
‘Suba telung tiban tiang ngalih buah delimane ene,
sakewala tusing ja taen maan apa-apa.
Ebah ja punyan delimane ene!
Tusing ja ada gunane punyane ene mentik di tanah tiange.’
8 “Nanging tukang abiane punika mabaos sapuniki,
‘Ratu,
banggiang ja dumun punyan delimane niki mentik malih atiban.
Titiang jagi ngiterin numbegin lan nagingin lemekan punyane niki.
9 Minab malih atiban mabuah.
Yening tetep nenten mabuah,
ebah ja!’”
Hyang Yesus Nyegerin Anak Sungkan Ring Rahina Sabat
10 Ring rahina Sabatb,
Hyang Yesus ngajahin ring bale wantilan agama Yahudi.
11 Irika wenten adiri anak istri sane sampun plekutus (18) tiban karangsukin buta kala.
Punika mawinan ipun sungkan bengkut lan nenten mresidayang ngadeg jegjeg.
12 Ritatkala Hyang Yesus nyingakin anak istri punika,
Ida ngamanggil ipun saha ngandika,
“Wih ibu,
ibu sampun kenak saking penyakit ibune.”
13 Raris Hyang Yesus ngusud anake punika;
jeg saget ipun ngadeg jegjeg tur ngagungang Sang Hyang Pengardi.
14 Kelian bale wantilane gedeg krana Hyang Yesus nyegerin anak ring rahina Sabat.
Punika mawinan kelian bale wantilane mabaos ring anake akeh sapuniki,
“Wenten nem dina kaanggen dina makarya;
rauh ja maubad ring salah tunggil dinane punika.
Sampunang ja ring rahina Sabat.”
15 Hyang Yesus nyaurin sapuniki,
“Wih ragane makasami sane mapi-mapi patut!
Nentenke risedek rahina Sabat ragane tetep nglebang sampi wiadin kambing ragane saking tategulane mangda katuntun ka genah nginem?
16 Iriki,
wenten anak luh saking soroh sentanan dane Abrahamc.
Ipun plekutus tiban suene sampun kategul olih ratun para setan.
Nentenke pantes ipun kalebang saking tategulane ring rahina Sabate?”
17 Pasaur Hyang Yesuse punika ngranayang anake sane nungkasin Ida pada kimud.
Nanging anake akeh irika seneng nyaksiang sekancan parilaksanan Hyang Yesuse sane ngangobin.
Pengumpamian indik Batun Bingin sane Alit lan Ragi
18 Hyang Yesus malih ngandika sekadi puniki,
“Napi anggen Tiang ngumpamiang indik Sang Hyang Pengardi dados Raja ring jagate?
Tiang ngumpamiang Karajaan Idane sekadi puniki:
19 Karajaan Sang Hyang Pengardi punika sekadi batun bingin sane alit kasambehang ring tegale.
Batune punika mentik tur dados punyan kayu lan paksi-paksine masebun ring carang-carang punyan kayune punika.”
20 Hyang Yesus malih ngandika sapuniki,
“Napi anggen Tiang ngumpamiang indik Sang Hyang Pengardi dados Raja ring jagate?
21 Karajaan Idane sekadi ragi sane kaambil olih anak istri.
Raris ragine sane akidik punika kaadonin sareng telung dasa (30) kilo tepung kantos saluirin adonane kembang.”
Ngranjing Liwat Kori sane Cupit
22 Risedek Hyang Yesus nglanturang pamargin Idane ka Yerusalem,
Ida ngliwatin kota-kota lan kampung-kampung sambilanga ngajahin.
23 Raris wenten anak sane mataken ring Hyang Yesus sapuniki,
“Ratu,
akidik kamantenke anake sane kaslametang saking ukuman ulian dosa?”
24 Hyang Yesus nyaurin sapuniki,
“Utsahayang ja ngranjing ring korine sane cupit mangda prasida nerima Sang Hyang Pengardi dados Rajan ragane.
Tiang mituturin,
akeh anake ngutsahayang ngranjing mrika nanging nenten ja mresidayang ngranjing.
25 Ritatkala sane nuenang purine punika matangi tur ngubetang korine,
nanging ragane kari ring sisi,
irika ragane jagi nogdog saha matur,
‘Jero,
ampakang ja titiang kori!’
“Raris sane nuenang purine punika jagi masaur sapuniki,
‘Tiang tusing ja nawang nyenke ragane.’
26 “Tur ragane jagi nyaurin sapuniki,
‘Titiang sampun sering ngajeng lan nginum sareng-sareng jerone,
lan jero sampun ngajahin ring margi-margi kotan titiange!’
27 “Nanging anake sane nuenang purine punika jagi mabaos sapuniki,
‘Tiang tusing ja taen ngorahang ragane kraman tiange.
Magedi ja ragane ane malaksana jaat!’
28 “Ragane jagi nyingakin dane Abraham,
dane Isak,
dane Yakub lan makasami para sinoman Sang Hyang Pengardine maliang-liang krana sampun kaprentah olih Sang Hyang Pengardi dados Rajan ipune.
Nanging ragane nenten dados ngranjing ka jeronne.
Ragane jagi nangis tur kalara-lara krana ragane wenten ring jaba.
29 Nanging saking maideh-idehan anake akeh jagi rauh ka Karajaan Idane punika;
sinamian ipun jagi maliang-liang irika.
30 Sujatine,
wenten anak sane kadena sidori jagi dados simalu,
lan sane kadena simalu jagi dados sidori.”
Manah Hyang Yesuse Sebet Nyaksiang Kawentenan Warga Yerusalem
31 Duk punika wenten pada anak Parisi sane rauh sid Hyang Yesus tur matur sekadi puniki,
“Matilar ja saking iriki krana raja Herodes meled ngamademang Ragane.”
32 Raris Hyang Yesus ngandika sekadi puniki,
“Luas ja tur orahang kapining anake sane nenten maguna punikad,
‘Tiang ngulah roh-roh kala lan nyegerin anak sungkan dinane mangkin lan benjang.
Lan malih puane Tiang jagi muputang pakaryan Tiange.’
33 Yadiastun kenten,
dinane mangkin,
benjang lan malih puane,
Tiang musti nglanturang pamargin Tiange ka Yerusalem.
Krana sinoman Sang Hyang Pengardine kapademang wantah ring Kota Yerusalem sane suci punika.
34 “Wih warga Kota Yerusalem!
Ragane ngamademang para sinoman Sang Hyang Pengardine,
inggih punika anake sane kautus buat ragane;
ragane nimpugine ipun sami nganggen batu kantos padem!
Tiang sampun sering meled munduhang ragane sami sekadi siap pengina munduhang panak-panaknyane di beten kampidne,
nanging ragane nenten ja kayun!
35 Punika mawinan Sang Hyang Pengardi nenten malih ngempon ragane.
Pengandikan Tiange puniki patut,
ngawit mangkin ragane sami nenten jagi nyingak Tiang malih,
kantos ragane ngamaosang sapuniki,
‘Kaagungang ja Ida sane rauh dados utusan Sang Hyang Tunggal.’”