Pengajahan indik Mabakti ring Sang Hyang Pengardi
11
Ring dina anu,
Hyang Yesus mabakti praragan.
Sasampune wusan mabakti,
wenten sisian Idane matur sapuniki,
“Ratu,
ajahin ja titiang sami mabakti,
sekadi dane Yohanesa ngajahin para sisian danene.”
2 Irika raris Hyang Yesus ngandika sapuniki,
“Yening ragane mabakti,
matur ja buka kene:
‘Inggih Aji,
kaagungang ja parab Iratu sane suci punika,
Dumogi ja Iratu yakti mamrentah dados Raja ring jagate.
3 Dumogi ja titiang sami kicen dadaaran sane saratang titiang sebilang dina.
4 Dumogi ja dosan-dosan titiange sami kaampurayang,
duaning titiang ngampurayang sira ja sane malaksana iwang ring titiang.
Dumogi ja Iratu miara titiang mangda nenten keni gagodan.’”
5 Raris Hyang Yesus ngandika ring para sisian Idane sapuniki,
“Umpamane,
tatkala tengah lemenge,
ada anak ka umah timpalne laut ngraos kene,
‘Mbok,
baang ja tiang ngidih dadaaran abedikb,
6 krana ada timpal tiange ane uli joh singgah di umah tiange lan tiang tusing ngelah dadaaran.’
7 “Pastika timpalne ane kaidihin dadaaran ento tusing ja bakal masaut buka kene,
‘Eda ja ngugul tiang.
Korine suba makunci;
tiang ajak pianak-pianak tiange suba masare.
Tiang tusing ja nyidang bangun lan maang apa-apa.’
8 Ane jani dingehang ja Tiang:
sujatine anake ento tusing ja makita bangun lan maang apa-apa.
Nanging apanga tusing lek teken timpalne ane ngidih,
ia bakal bangun lan maang ane saratanga.
9 “Keto mawinan,
Tiang ngorahin ragane:
nunas ja ring Sang Hyang Pengardi,
tur ragane bakal kicen;
alih ja,
tur ragane lakar makatang;
dogdog ja tur korine bakal kaampakang buat ragane.
10 Krana nyen ja ane nunas bakal nampi;
nyen ja ane ngalih bakal makatang;
lan nyen ja ane nogdog korine,
korine bakal kaampakang.
11 “Adake dini bapa ane maang lelipi tekening pianakne ane ngidih be?
12 Utawi maang teledu tatkala pianakne ngidih taluh?
13 Ragane ane jaat nu nyidang maang ane melah tekening pianak padidi.
Apa buin Sang Hyang Aji,
Ajin ragane sane ring swarga!
Ida jagi nglugrahin Roh Idane tekening anake ane nunas ring Ida.”
Hyang Yesus Ngulah Ratun Para Setan
14 Ring dina anu,
Hyang Yesus ngulah buta kala saking anake sane kolok.
Sasampune buta kalane punika mawetu,
anake kolok punika mresidayang nutur.
Raris anake akeh sane wenten irika angob.
15 Nanging irika taler wenten sane ngraos sapuniki,
“Ia ngulah roh-roh kalane nganggon kuasan ratun buta kala ane madan ‘ratun para setan’c.”
16 Wenten pada anak Yahudi sane lianan nunas mangda Hyang Yesus ngaryanin paindikan sane ngangobin.
Ipun nagih bukti yening Ida yakti rauh saking Sang Hyang Pengardi.
17 Nanging Hyang Yesus uning manah anake punika raris ngandika sapuniki,
“Yening wenten karajaane sane maruang-ruangan mamusuh,
pastika karajaane punika nenten ja jagi langgeng.
Tur yening masemeton saling puikin,
pastika kaluarga punika jagi uug.
18 Kenten pada yening sekan ratun para setane saling ngamusuhin,
nentenke karajaan iane jagi uug?
Punika muktiang jerone iwang ngamaosang Tiang ngulah roh-roh kalane krana kuasan ratun para setan.
19 Yening yakti Tiang ngulah roh-roh kalane nganggen kuasan ratun para setan,
artine para sisian jerone taler ngulah roh-roh kalane nganggen kuasan ratun para setan.
Sisian jerone praragan jagi muktiang wantah jerone iwang.
20 Nanging yening Tiang ngulah roh-roh kalane nganggen kuasan Sang Hyang Pengardi,
artine Ida sampun mamrentah dados Raja ring jagate.
21 “Umpami ratun para setan punika sekadi anake sane siteng masenjata rangkep nyaga purinnyane padidi;
pastika saluirin druennyane jagi trepti.
22 Nanging tatkala Tiang dados musuh iane sane sitengan maperang nglawan ia,
pastika ia kalah.
Sasampune punika,
Tiang jagi ngambil saluirin senjatan iane sane andelanga,
tur barang-barangnyane kaedum-edum.
23 “Sira ja sane nenten ngilonin Tiang,
sujatine matungkasan sareng Tiang.
Tur sira ja nenten munduhang anak lianan mangda ngiring Tiang,
sujatine ipun nguug napi sane karyanin Tiang.”
Roh Buta Kala Mawali Malih ring Anake sane Taen Kuasaina
24 Hyang Yesus taler ngandika sekadi puniki,
“Sasampun buta kalane matilar saking manusane,
ia kemu-mai ka genah-genah sane tuh gersang mangda ngrereh genah masandekan.
Krana ia nenten polih genah irika,
raris ia mabaos sekadi puniki,
‘Wake bakal mabalik ka umah ane suba kalain wake ento’.
25 Nah irika ia rauh ka umahe punika,
ia manggihin umahe punika sampun kedas lan rapi sane mawinan dados genah meneng sane becik buat ia.
26 Raris ia luas saha ngajak papitu buta kala lianan sane lebih jaat kapining deweknyane.
Makasami buta kala punika ngranjing lan meneng ring manusane punika.
Pamuputne,
manusane punika lebih jele bandingang kapining idumun.”
Bagia sane Sujati
27 Ritatkala Hyang Yesus ngandika sekadi punika,
wenten anak istri saking anake akeh sane matur antuk suara keras sekadi puniki,
“Bagia ja anak istri sane sampun nglekadang lan nyusuin Iratu!”
28 Nanging Hyang Yesus nyaurin sekadi puniki,
“Lebih bagia anake sane mirengin pengajahan Sang Hyang Pengardi tur nglaksanayang pengajahane punika.”
Anake Akeh Nunas Mangda Hyang Yesus Makarya Paindikan sane Ngangobin
29 Ritatkala anake ngancan akeh rauh mrika,
irika raris Hyang Yesus ngandika sekadi puniki,
“Amat ke jaatne anake makasami ring jamane puniki!
Krana ragane sami nunas ring Tiang ngaryanin paindikan sane ngangobin mangda prasida pracaya kapining Tiang.
Nanging nenten ja jagi kicen,
lianan kapining tanda dane Yunusd,
inggih punika sinoman Sang Hyang Pengardi idumun.
30-32 “Ingetang ja paindikan dane Yunus;
dane dados tanda buat warga Kota Niniwee.
Krana idumun,
warga Niniwe masalin saking urip sane madosa tatkala mirengin pabesen dane Yunus.
Punika mawinan,
duk dinane pamuput,
warga Niniwe jagi maurip malih tur ngedengin kapelihan Bangsa Yahudi ring jamane puniki krana ragane nenten masalin.
Samaliha Tiang,
Sang Putraning Manusaf,
dados tanda buat anake ring jamane puniki.
Nguda ragane nenten masalin saking urip sane madosa?
Tiang agengan kapining dane Yunus.
Nguda ragane nenten mirengin Tiang?
“Duk dinane pamuput,
ratu Negeri Sebag jagi maurip malih tur ngedengin kapelihan Bangsa Yahudi ring jamane puniki.
Krana idumun ratu Negeri Seba rauh saking negeri sane adoh mangda mirengin kawicaksanaan raja Salomoh.
Tiang lebih wicaksana bandingang kapining raja Salomo.
Nguda ragane nenten mirengin Tiang?”
Galang lan Peteng
33 Salanturnyane Hyang Yesus ngandika malih sekadi puniki,
“Nenten wenten anak sane ngenyitin lampu raris kasilibang utawi katekepin nganggen kekeb.
Nanging lampune punika kagantung mangda anake sane ngranjing ka jeroan sida nyingakin galang.
34 Peningalan ragane kaumpamiang sekadi lampu buat dewek ragane.
Yening peningalan ragane seger,
saluirin dewek ragane galang.
Nanging yening peningalan ragane samur,
saluirin dewek ragane peteng.
35 Punika mawinan,
melahang ja nyaga galange sane wenten sid ragane mangdane nenten dados peteng.
36 Yening saluirin dewek ragane galang lan akidik ja nenten wenten sane peteng,
pastika dewek ragane jagi galang sekadi kasinarin lampu.”
Hyang Yesus Nganistayang para Anak Parisi lan para Guru Agama Yahudine
37 Sasampune Hyang Yesus wusan ngajahin,
irika wenten anak Parisi ngundang Ida ngajeng ring jeronnyane.
Raris Hyang Yesus rauh tur ngajeng irika.
38 Anak Parisine punika angob krana nyingakin Hyang Yesus nenten ninutin adat anak Yahudine inggih punika mersihin tangan sadereng Ida ngajeng.
39 Punika mawinan Hyang Yesus ngandika sekadi puniki,
“Jerone para anak Parisi,
mersihin cangkir lan piring ring sisine kamanten,
nanging ring tengah manah jerone setata mapineh loba lan paindikan jaat.
40 Wih anak belog!
Sang Hyang Pengardi ngaryanin sane wenten ring sisin manusane,
tur Ida pada ngaryanin sane wenten ring tengah manusane.
41 Nanging,
druen jerone sapatutne kapakidihang ring anake sane tiwas.
Paindikane punika ngranayang jerone kedas ring sisi lan ring manah.
42 “Wih para anak Parisi,
sengkala ja jerone sami!
Jerone maturan apahdasa (1/10) lakar basa lan janganan asil tegale kapining Sang Hyang Pengardi.
Nanging jerone nenten maurip antuk parilaksana adil lan nenten nresnain Sang Hyang Pengardi.
Sujatine paindikane punika sane sapatutne laksanayang jero,
tanpa lali maturan apahdasa.
43 “Wih para anak Parisi,
sengkala ja jerone sami!
Jero seneng malinggih paling arep ring bale wantilan agama Yahudine lan seneng kaajumang olih anake ring pasar.
44 “Sengkala ja jerone sami!
Jero sekadi kuburan sane nenten madaging tanda;
anake dados cemer ulian nenten uning nyekjek kuburane punika.”
45 Irika raris wenten saking para guru agama Yahudine mabaos sekadi puniki,
“Guru,
pengandikan Gurune punika taler nganistayang titiang sami.”
46 Nanging Hyang Yesus nyaurin ipun sekadi puniki,
“Sengkala ja jerone pada,
duh para guru agama Yahudine!
Jerone sami nuntut paindikan sane sukeh lan ngicen awig-awig sane baat kalaksanayang,
nanging akidik ja jerone praragan nenten kayun nulungin anake sane ngamargiang sekancan awig-awige punika.
47 “Sengkala ja jerone sami!
Jero ngwangun kuburan para sinoman Sang Hyang Pengardine idumun.
Para leluhur jerone nenten ninutin pengajahan para sinomane,
nanging ngamademang para sinomane punika.
48 Jerone sami pateh sekadi leluhur jerone,
samaliha satinut ring parilaksanan leluhur jerone punika.
Indike punika mabukti saja tatkala jerone ngwangun kuburan para sinoman Sang Hyang Pengardine sane kapademang olih leluhur jerone.
49 Sang Hyang Pengardi sane kalintang wicaksana,
idumun masabda sekadi puniki,
‘Nira bakal ngutus para sinoman lan para utusan sid bangsane ene,
sakewala makudang sinoman lan utusane ento bakal kasiksa tur ane lenan kapademang olih bangsane ene.’
50 Punika mawinan anake ring jamane puniki jagi nanggung kaiwangan para leluhurnyane punika uling jagate kakardinin,
51 ngawit saking Sinoman Habel kantos Sinoman Sakaria.
Dane Habel punika sinoman sane kapertama kapademang.
Samaliha dane Sakaria kapademang ring selagan genah mabaktine lan tugu genah nunjel aturane.
Tiang ngandika kapining jero:
Anake ring jamane puniki pastika jagi kaukum krana pademnyane para sinomane punika.
52 “Sengkala ja jerone,
para guru agama!
Jero sekadi anake sane nyimpen konci kori pamedal buat uning ring Sang Hyang Pengardi,
nanging jerone praragan nenten meled ngranjing mrika.
Turmaning jero nambakin anake sami sane meled ngranjing!”