Para Anak Istri sane Ngayahin Hyang Yesus
8
Sasampune Hyang Yesus ngampurayang dosan anak istri sane malaksana asusila,
kaceritayang mangkin Ida raris mamargi ka kota-kota wiadin desa-desa ring Wawidangan Galilea.
Ida mrika mangda ngortiang Orti Rahayu indik Sang Hyang Pengardi jagi gelis mamrentah dados Raja ring jagate.
Ida kasarengin makaroras para utusan Idane.
2 Samaliha Ida pada kasarengin makudang anak istri sane sampun kabebasang saking kuasan roh-roh kalane lan kasegerin saking sekancan penyakit.
Ipun sami nenten tios,
Maria sane maasal saking Kota Magdala,
inggih punika anak sane sampun kabebasang saking kuasan papitu buta kala.
3 Kenten pada Ni Yohana rabin dane Kusa.
Dane Kusa puniki nenten tios pengede ring purin raja Herodes.
Malih wenten Ni Susana,
tur akeh anak istri sane lianan.
Irika,
para anake istri punika ngayahin Hyang Yesus lan para pengiring Idane nganggen jinah ipune suang-suang.
Manah Manusane Kaumpamiang Sekadi Tanahe
4 Ring dina anu,
wenten anak akeh saking kota-kotane ring Galilea rauh ring Hyang Yesus.
Duk punika Hyang Yesus raris nyeritayang pengumpamian sekadi puniki:
5 “Wenten anak sane nyambehang bibit ring tegale.
Tatkala ipun nyambehang bibit,
wenten bibite sane ulung ring pundukane.
Bibite punika raris kajekjek olih anake sane ngliwat irika,
turmaning amaha teken paksi-paksine kantos telas.
6 Wenten pada bibite sane ulung ring tanahe sane mabatu-batu.
Tatkala bibite punika mentik,
raris entikane punika layu krana nenten polih toya.
7 Wenten pada bibite sane ulung ring bet-bete sane madui.
Tatkala bibite punika mentik sinarengan bet-bete irika,
entikan bibite punika mati krana majepit.
8 Kenten pada wenten bibite sane ulung ring tanahe sane landuh;
tatkala mabuah ngasilang kantos ping satus (100) lipet.”
Sasampune Hyang Yesus nyeritayang pengumpamian punika,
raris Ida ngandika sapuniki,
“Yening makuping,
resepang ja pengajahan Tiange.”
9 Raris para sisian Hyang Yesuse nakenin artin pengumpamiane punika.
10 Tur Hyang Yesus nyaurin sapuniki,
“Ragane suba kicen wara nugraha.
Ento mawinan,
ragane suba nawang paundukan ane silib unduk kenken carane Sang Hyang Pengardi mamrentah dados Raja di jagate.
Nanging tekening ane tusing ja murid Tiange,
Tiang ngajahin nganggon pengumpamaan,
apanga
Yadiapin ia ningalin,
nanging ia tusing ja seken-seken ningalin;
Yadiapin ja ia ningeh,
ia tusing ja ngerti. Yesaya 6:9.
11 “Kene artin pengumpamaane ento:
bibite ento satmaka pengajahan uling Sang Hyang Pengardi.
12 Bibite ane ulung di pundukane ento kadi anake ane ningehang pengajahan uling Sang Hyang Pengardi.
Laut ada ratun para setan ngamaling pengajahane ento uling kenehne.
Keto mawinan ia tusing pracaya pengajahane ento kanti tusing kaslametang uling ukuman krana dosa.
13 Bibit ane ulung di tanahe ane mabatu-batu kadi anake ane ningehang pengajahane baan keneh demen.
Sakewala pengajahane ento tusing makah.
Ia pracaya akejep dogen.
Tatkala katiben gagodan,
kapracayaannyane ilang.
14 Bibit ane ulung di bet-bete ane madui kadi anake ane ningehang pengajahan uling Sang Hyang Pengardi.
Nanging salanturnyane kasengsayan,
kasugihan,
lan idup ane liang ngapit kapracayaannyane kanti ia tusing ngasilang buah ane tasak.
15 Bibite ane ulung di tanahe ane landuh ento kadi anake ane ningehang pengajahan uling Sang Hyang Pengardi.
Ia nyimpen pengajahane ento di kenehne ane melah,
samaliha pageh kanti ngasilang buah.”
Pengumpamian Indik Lampu
16 Salanturnyane Hyang Yesus ngandika malih sapuniki,
“Anake sane mirengin pengajahan Tiange sekadi lampu.
Nenten wenten anak sane ngenyitin lampu raris katekepin nganggen kekeb utawi kagenahang ring beten pasareane.
Nanging lampune punika kagantung mangda anake sane ngranjing ka jeroan sida nyingakin galang.
17 Krana nenten wenten paindikan mengkeb sane nenten jagi kabeberang,
tur nenten wenten paindikan ilid sane nenten jagi kabukak lan kauningin.
18 Punika mawinan,
ragane musti melah-melah mirengin pengajahan Tiange.
Krana anake sane sampun nerima pengajahan Tiange jagi kicen malih;
nanging anake sane nenten meled nerima pengajahan Tiange,
akidik gelahnyane punika jagi kaambil.”
Hyang Yesus lan Para Semeton Idane
19 Raris ibu sareng para semeton Hyang Yesuse rauh jagi ngrereh Ida.
Nanging ipun sami nenten mresidayang matemu sareng Ida krana akeh anake irika.
20 Raris wenten sane matur ring Hyang Yesus sekadi puniki,
“Guru,
ibu sareng para semeton Gurune wenten ring jaba.
Ipun sami meled matemu sareng Guru.”
21 Irika raris Hyang Yesus nyaurin sekadi puniki,
“Sujatine sane dados ibu lan para semeton Tiange,
nenten tios anake sane mirengin pengajahan Sang Hyang Pengardine tur nglaksanayang pengajahane punika.”
Angin Nglinus Kadedehang olih Hyang Yesus
22 Ring dina anu,
Hyang Yesus lan para sisian Idane munggah ka praune.
Raris Ida ngandika sapuniki,
“Lan ja iraga nyebrang Danu Galileanea.”
Raris Ida lan sisiane makasami luas.
23 Ritatkala sedek malayar,
Hyang Yesus sirep.
Jeg wenten angin nglinus ring danune,
kantos toyan danune ngancan ngebekin praune.
Punika mawinan ipun das kelem.
24 Raris para sisiane nangiang Hyang Yesus saha majeritan,
“Guru!
Guru!
Iraga jagi padem!”
Hyang Yesus raris matangi tur namprat angin linuse lan ombak sane sedek nglencok punika.
Jeg saget angin lan ombake punika meneng lan danune dedeh.
25 Raris Hyang Yesus ngandika ring para sisian Idane sapuniki,
“Nguda ragane tusing pracaya tekening Tiang?”
Ipun sami angob lan jejeh.
Raris saling ngraos,
“Sirake sujatine Anake puniki?
Angin muah ombake tinut kapining Sang Guru!”
Hyang Yesus Ngulah Roh-roh kala ring Wawidangan Gerasa
26 Sasampune malayar,
Hyang Yesus sareng para sisian Idane rauh ring sisi kangin Danu Galileane,
inggih punika Wawidangan Gerasa.
27 Risedek Hyang Yesus tedun saking praune,
wenten anak lanang sane kakuasain olih akeh buta kala ngrauhin Ida.
Anake lanang punika maasal saking kota.
Ipun nenten kayun meneng ring jeronnyane,
nanging meneng ring kuburan-kuburan guaneb.
Samaliha ipun sampun sue nenten mapengangge.
28-29 Yadiastun ipun kajaga,
tur tangan lan batisnyane kategul nganggen rante,
nanging ipun tetep mresidayang megatang rantene punika.
Tur roh-roh kalane sering maid lan makta ipun ka genah-genah sane suung.
Ritatkala anake punika nyingakin Hyang Yesus,
ipun makaikan saha matimpuh ring arepan Idane.
Krana Hyang Yesus sampun mrentahang roh-roh kalane punika mangda magedi saking anake punika.
Irika,
anake punika keras nyerit sekadi puniki,
“Hyang Yesus,
Putran Sang Hyang Pengardi Maha Luhur.
Iratu nenten wenten urusan sareng titiang.
Sampunang ja nyiksa titiang!”
30 Raris Hyang Yesus mataken sekadi puniki,
“Nyenke iba?”
Irika roh-roh kalane masaur sapuniki,
“Pesengan titiang Apasukanc.”
Pasaurnyane sekadi punika krana ipun karangsukin olih buta kala sane akeh pisan.
31 Salanturnyane roh-roh kalane punika nunas ping banget ring Hyang Yesus mangda ipun nenten katundung ka kawah apine.
32 Irika wenten bawi akeh pisan sedek ngalih amah-amahan ring sisin abingane.
Irika raris roh-roh kalane punika nunas ring Hyang Yesus mangda ipun sami kicen ngrangsukin bawi-bawine punika.
Lan Hyang Yesus nagingin pinunas ipune.
33 Irika raris roh-roh kalane punika medal saking anake lanang punika tur ngrangsukin bawi-bawine.
Lan bawi-bawine punika malaib tur macebur saking sisin abingane ka danune raris mati kelem.
Gambar: Hyang Yesus nyegerin anake sane karangsukin olih roh-roh kala (8:33)
34 Sasampune para pengangon bawine nyingakin paindikane punika,
raris ipun sami malaib tur nyeritayang paindikane punika ring kota lan desa-desa ring wawidangane irika.
35 Irika raris anake akeh luas jagi nyingakin paindikane sane sampun mamargi irika.
Ipun sami rauh ring Hyang Yesus,
tur manggihin anake sane sampun kabebasang saking kuasan roh-roh kalane punika.
Anake punika sedek malinggih nampek cokor Hyang Yesuse.
Anake punika sampun mapengangge lan sampun waras.
Punika mawinan anake akeh sane rauh mrika dados jejeh.
36 Anake sane sampun nyingak paindikane punika ngortiang ring anake akeh sekadi punapike anake sane kakuasain roh-roh kalane punika kasegerin.
37 Raris sami para warga ring Wawidangan Gerasa,
nunas ping banget mangda Hyang Yesus matilar saking genahe punika,
krana ipun sami jejeh pisan.
Irika raris Hyang Yesus munggah ka praune jagi budal.
38 Anake sane sampun kabebasang saking kuasan roh-roh kalane punika nunas mangda ngiring Hyang Yesus.
Nanging Hyang Yesus mrentahang ipun sekadi puniki,
39 “Mulih ja lan ortiang ja apa ane kapicayang tekening ragane olih Sang Hyang Pengardi.”
Raris anake punika luas ka saluirin genah ring kotane,
ngortiang sekancan paindikan sane sampun kapicayang olih Hyang Yesus ring deweknyane.
Hyang Yesus Nyegerin Anak Istri Sungkan lan Nguripin Pianak I Yairuse
40 Ritatkala Hyang Yesus mawali ka Galilea,
Ida kasambut olih anake akeh krana ipun sami sampun nyantosang Ida.
41-42 Irika taler wenten kelian bale wantilan agama Yahudine sane mapesengan I Yairus.
Ipun madue pianak istri sane tunggal mayusa roras tiban.
Pianakne punika sedek sungkan das padem.
Punika mawinan I Yairus rauh tur matimpuh ring arepan Hyang Yesuse.
Irika ipun mapinunas ping banget mangda Hyang Yesus lunga ka umah ipune.
Ritatkala Hyang Yesus mamargi nuju umah I Yairuse,
anake akeh maseksek ngrunyung Ida.
43 Saking anake akeh punika,
wenten pada anak istri sane sungkan sebel ngwetuang rah sampun roras tiban.
[Druen ipune sampun telas kaanggen maubad ka dokter]d,
nanging nenten wenten anak sane mresidayang nyegerin ipun.
44 Anake istri punika nampekin Hyang Yesus saking ungkur Idane tur ngusud tepin jubah Idane.
Jeg saget penyakitnyane ical.
45 Raris Hyang Yesus mataken,
“Sirake sane ngusud Tiang?”
Sami anake irika nenten wenten sane ngaku.
Irika raris I Petruse matur,
“Guru,
akeh pisan anake maseksek lan samian ngrunyung Guru!”
46 Nanging Hyang Yesus ngandika,
“Wenten anak sane ngusud Tiang;
Tiang ngrasayang wenten kuasa sane wetu saking ragan Tiange.”
47 Anake istri punika uning wantah parilaksanan ipune katara.
Raris ipun tangkil ngejer saha matimpuh ring arepan Hyang Yesuse.
Tur ipun nyeritayang ring anake sami wantah risedek ipun ngusud jubah Idane,
ipun raris kenak.
48 Hyang Yesus ngandika ring anake istri punika,
“Wih cening,
cening suba seger krana cening pracaya kapining Tiang.
Majalan ja saha makeneh dame.”
49 Ritatkala Hyang Yesus kari ngandika,
salah tunggal semeton I Yairuse rauh saking umahnyane saha matur,
“Pianak ragane suba padem.
Eda ja buin makewehin Guru.”
50 Ritatkala Hyang Yesus mirengang paindikane punika,
Ida ngandika ring I Yairus sapuniki,
“Eda ja jejeh.
Pracaya ja tur pianak ragane lakar seger.”
51 Sasampune rauh ring umah I Yairuse,
Hyang Yesus nombang anake ngranjing nyarengin Ida,
lianan kapining I Petrus,
I Yohanes sareng I Yakobus tur reraman anake alit punika.
52 Makasami anake irika pada matatangisan antuk manah sane sebet krana pianak I Yairuse sampun padem.
Nanging Hyang Yesus ngandika,
“Sampunang ja nangis.
Anake punika nenten ja padem;
ipun tuah sirep!”
53 Lan anake akeh punika ngedekin Hyang Yesus,
krana ipun sami uning wantah anake alit punika sampun padem.
54 Raris Hyang Yesus ngamel tangan anake alit punika saha ngandika keras,
“Cening,
bangun ja cening!”
55 Anake alit punika maurip malih,
tur matangi.
Wusan punika,
Hyang Yesus mrentahang reramannyane mangda ngicen ajengan ring anake alit punika.
56 Reraman anake alit punika angob.
Nanging Hyang Yesus nombang nyeritayang paindikane punika ring anak lianan.