Juru Pencar Dados Sisian Hyang Yesuse
5
Ring dina anu,
Hyang Yesus ngadeg ring sisin Danu Galileanea.
Akeh anake ngrunyung Ida jagi mirengin pengajahan saking Sang Hyang Pengardi.
2 Risedek punika,
Hyang Yesus nyingakin wenten kalih jukung ring sisin danune.
Para juru pencare sampun tedun saking jukunge punika lan sedek ngumbah pencar ipune.
3 Hyang Yesus munggah ring salah tunggal jukunge,
inggih punika jukungne I Simon.
Raris Hyang Yesus mrentahang I Simon mangda jukunge kasogok akidik ka tengah.
Raris Hyang Yesus malinggih saha ngajahin anake akeh saking jukunge punika.
Gambar: Hyang Yesus ngajahin anake akeh saking jukunge (5:3)
4 Sasampune wusan ngajahin,
Hyang Yesus ngandika ring I Simon,
“Dayung ja ka tongos ane dalem,
tur pulang ja pencar ragane apanga maan be.”
5 Raris I Simon masaur,
“Guru,
sampun apeteng titiang makasami magimeh makarya lan nenten polih napi-napi!
Nanging titiang jagi mulang malih pencare krana guru sane mrentahang titiang.”
6 Sasampune mulang pencare,
ipun polih ulam akeh kantos pencarnyane das uek.
7 Punika mawinan ipun nunas tulung ring sawitrannyane sane wenten ring jukunge sane malih siki.
Raris sawitrannyane nampekin jukunge saha mempen ulame ring makakalih jukunge kantos das kelem.
8-10 Duk punika I Simon lan para sawitrannyane pada angob nyingakin ulam sane akeh polihin ipun.
Sawitran I Simone punika mapesengan I Yakobus lan I Yohanes,
inggih punika pianak-pianak I Sebedeus.
Ritatkala I Simon nyaksiang kawisesan Hyang Yesuse,
ipun matimpuh ring arepan Hyang Yesus raris matur,
“Ratu,
matilar ja saking titiang!
Krana titiang jadma sane madosa.”
Nanging Hyang Yesus ngandika,
“Eda ja jejeh!
Uling jani ragane lakar ngalih anak len apanga nugtug Tiang.”
11 Raris I Simon sareng sawitrannyane ngedeng jukung-jukunge punika ka sisin danune,
ngalain makasamine tur ngiring Hyang Yesus.
Hyang Yesus Nyegerin Anak Sungkan Kusta
12 Ring dina anu,
Hyang Yesus wenten ring salah tunggal kota ring Galilea.
Irika taler wenten anak lanang sane awaknyane akeh keni kustab.
Ritatkala ipun nyingakin Hyang Yesus,
ipun matimpuh ring arepan Ida saha mapinunas,
“Ratu,
yening Iratu kayun,
Iratu prasida nyegerin sikian titiange.”
13 Raris Hyang Yesus ngusud anake punika saha ngandika,
“Tiang kayun.
Seger ja.”
Pramangkin kustan anake punika ical.
14 Raris Hyang Yesus ngandika ring anake punika,
“Sampunang ja ragane nyeritayang kapining sapa sira ja yening ragane sampun seger.
Nanging mrika ja dumun tangkil ring rsine,
tur edengang dewek ragane mangdane dane uning yening ragane sampun bersih.
Raris aturang ja aturan ring Sang Hyang Pengardi sekadi prentah dane Musane,
sinoman Sang Hyang Pengardine idumun.
Punika dados bukti ring anake sami yening ragane yakti sampun bersih.”
15 Nanging orti indik Hyang Yesus ngancan kasub.
Punika mawinan akeh anake rauh mabered jagi mirengin Ida lan nunas mangda kasegerin saking penyakitnyane.
16 Yadiastun asapunika,
Hyang Yesus matilar ka genah sane sepi jagi mabakti ring Sang Hyang Pengardi.
Hyang Yesus Nyegerin Anak Lumpuh
17 Ring dina anu,
ritatkala Hyang Yesus ngajahin ring salah tunggal umah,
wenten para anak Parisic lan para guru agama Yahudine malinggih mirengin pengajahan Idane.
Wenten sane rauh saking kota-kota ring Wawidangan Galilea,
Wawidangan Yudea lan saking Kota Yerusalem.
Kuasan Sang Hyang Pengardi sane nyarengin Hyang Yesus ngranayang Ida prasida nyegerin anake sungkan.
18 Ritatkala punika,
wenten aseka anak sane rauh makta anak lumpuh adiri nganggen tikeh.
Ipun ngutsahayang makta anake lumpuh punika ka jeroan umahe mangda prasida kagenahang ring arepan Hyang Yesuse.
19 Nanging ipun nenten mresidayang ngranjing mrika krana akeh pisan anake irika.
Raris ipun munggah ka raab umahe tur ngelus raabe punika.
Raris ipun nedunang anake lumpuh punika nganggen tikehnyane ring arepan Hyang Yesuse ring tengah anake akeh.
Gambar: Anake lumpuh katedunang ring arepan Hyang Yesuse (5:19)
20 Nyingakin parilaksanane sekadi punika,
Hyang Yesus uning yening ipun sami madue kapracayaan ring Ida.
Ida mabaos ring anake punika,
“Jero,
dosan-dosan jerone ring Sang Hyang Pengardi sampun kaampurayang.”
21 Nanging para anak Parisi lan para guru agamane punika mapineh sapuniki,
“Nguda anake ene degag kapining Sang Hyang Pengardi?
Wantah Ida kamanten sane prasida ngampurayang dosa!”
22 Nanging Hyang Yesus uning manah ipune raris mabaos,
“Ngudake jerone madue manah sekadi punika?
23 Baos sane cenke sane aluhan Tiang muktiang:
‘Dosan-dosan jerone sampun kaampurayang,’
napi ‘Penyakit jerone sampun seger?’
24 Nanging mangkin Tiang jagi muktiang kapining jerone sami.
Tiang,
Sang Putraning Manusad,
madue kuasa ngampurayang dosa ring jagate puniki.”
Raris Hyang Yesus ngandika ring anake lumpuh punika,
“Tiang mrentahang jero:
Matangi ja!
Tinting tikehe lan budal ja ka jeron jerone!”
25 Jeg pramangkin anake lumpuh punika ngadeg ring arepan anake akeh.
Irika ipun ninting tikehnyane lan budal saha ngagungang Sang Hyang Pengardi.
26 Makasami anake irika angob pisan saha ngagungang Sang Hyang Pengardi.
Tur ipun sami pada jejeh saha maosang,
“Ngangobin pisan paindikan sane saksiang iraga dinane mangkin!”
Tukang Nuduk Jinah Pajeg Dados Sisian Hyang Yesuse
27 Sasampune nyegerin anake lumpuh,
Hyang Yesus medal saking umahe punika,
tur Ida nyingak tukang nuduk jinah pajege sane mapesengan Lewi.
Duk punika I Lewi sedek malinggih ring genahnyane nudukin jinah pajeg.
Irika raris Hyang Yesus ngandika sapuniki,
“Tugtug ja Tiang!”
28 Raris I Lewi ngadeg,
ngutang geginannyane,
tur nugtug Hyang Yesus.
29 Raris I Lewi makarya pesta sane ageng ring umahnyane buat Hyang Yesus.
Lan irika wenten akeh tukang nuduk jinah pajeg lan anak sane lianan ngajeng sareng-sareng Hyang Yesus.
30 Irika raris para anak Parisine lan para guru agama Yahudine pada ngamigmig ring para sisian Hyang Yesuse sapuniki,
“Ngudake ragane sami ngajeng lan nginum sareng-sareng anak tukang nuduk jinah pajeg lan anak sane madosa?”
31 Raris Hyang Yesus masaur sekadi puniki,
“Anake sane seger nenten ja ngamerluang dokter;
nanging anake sane sungkan sane ngamerluang dokter.
32 Tiang rauh nenten ja ngamanggil anake sane patut,
nanging ngamanggil anake madosa mangda ipun masalin saking uripnyane sane madosa.”
Sisian Hyang Yesuse nenten Mapuasa
33 Salanturnyane wenten makudang anak sane mabaos kapining Hyang Yesus sapuniki,
“Sisian dane Yohanes lan sisian para anak Parisine sering mapuasa lan mabakti.
Nanging sisian Ragane tetep ngajeng lan nginum.”
34 Hyang Yesus masaur sekadi puniki,
“Pastika nenten wenten para sawitran penganten lanange ring pesta pawiwahan tundena mapuasa ritatkala penganten lanange punika kari sareng-sareng ipun sami!
35 Nanging tegarang ja pinehang,
napi sane jagi mamargi tatkala penganten lanange punika kaejuk olih musuh-musuhnyane.
Irika para sawitrannyane jagi mapuasa.”
Pengumpamian indik Pengajahan Anyar lan Pengajahan Lawas
36 Raris Hyang Yesus nyeritayang pengumpamian sekadi puniki,
“Nenten wenten anak sane nambel baju sane lawas nganggen kain baju anyar.
Krana yening kenten,
baju sane anyar jagi uek.
Samaliha kain baju sane anyar nenten cocok ring baju sane sampun lawas.
37 Kenten pada nenten wenten anak sane mriokang anggur sane anyar ka tengah kantong kulit sane sampun kekehf.
Krana anggur sane anyar prasida ngranayang kantong kulite punika makeplag tur anggure jagi makutang.
Turmaning kantong kulite dados usak.
38 Sapatutne anggur sane anyar kabriokang ka tengah kantong kulit sane anyar.
39 Nanging nenten wenten anak sane kayun nginum anggur sane anyar sasampune nginum anggur sane wayah.
Krana ipun jagi ngamaosang,
‘Anggur sane wayah punika becikan.’”