Dane Yohanes Midartayang indik Masalin saking Urip sane Madosa
3
Duk tahun kaping limolas pemrentahan Kaisar Tiberius,
inggih punika raja agung Negeri Romanea,
dane Pontius Pilatus dados gubernur ring Wawidangan Yudea lan ida Herodes dados raja ring Wawidangan Galilea.
Kenten pada ida Pilipus,
semeton ida Herodese,
dados raja ring Wawidangan Iturea lan Trakonitis,
tur ida Lisanias dados raja ring Wawidangan Abilene.
2 Duk punika ida Hanas sareng ida Kayapas dados rsi penglingsir agung.
Ring tahune punika,
dane Yohanes okan dane Sakariane nerima sabda saking Sang Hyang Pengardi.
Duk punika dane Yohanes meneng ring genah sane bengang linggah.
3 Punika mawinan dane Yohanes luas ka saluirin wawidangan Tukad Yordan raris masuara keras sekadi puniki,
“Masalin ja saking urip sane madosa.
Tur ragane musti kalukatb mangdane Sang Hyang Pengardi ngampurayang dosan-dosan ragane.”
4 Paindikane punika sampun katrawang ring cakepan sane katulis olih dane Yesaya,
sinoman Sang Hyang Pengardi idumun,
sapuniki,
“Wenten suara gelur-gelur ring genah sane bengang linggah sekadi puniki:
‘Sadyayang ja margi buat Sang Hyang Tunggal,
Leserang ja margi ring manah ragane buat sapengrauh Idane.
5 Sewatek pangkung jagi kaurug.
Sewatek gunung tur bukit jagi kaasahang.
Margi sane malekak-lekok jagi kabenengang.
Margi sane bongkang-bongkang jagi kaasahang.
6 Sami anake ring jagate jagi nyingakin Sang Hyang Pengardi nylametang manusane.’”
Yesaya 40:3-5.
7 Raris dane Yohanes mabaos kapining anake akeh sane rauh mangda kalukat punika sapuniki,
“Wih ragane sekadi lelipi sane ngemu wisia!
Sirake sane ngamaosang indik ragane jagi luput saking ukuman Sang Hyang Pengardi sane jagi rauh?
8 Yening saja ragane sampun masalin saking urip sane madosa,
buktiang ja malantaran parilaksanan ragane.
Sampunang ja mabaos ring manah sapuniki,
‘Iraga slamet krana Abraham punika leluhur iragane!’
Tiang ngamaosang kapining ragane,
Sang Hyang Pengardi mresidayang ngaryanin soroh sentanan dane Abrahame nganggen batu-batune puniki.
9 Wenten pengumpamian sekadi puniki,
‘Kapak sampun sedia ring bongkol;
tur sebilang punyan kayu sane nenten ngasilang napi-napi jagi kaebah tur kakutang ring apine.’”
10 Irika raris akeh anake mataken ring dane Yohanes sapuniki,
“Yening kenten,
napike sane sapatutne laksanayang tiang?”
11 Dane Yohanes nyaurin sapuniki,
“Sapa sira ja sane madue kalih baju,
sapatutne ipun makidihang asiki bajunnyane kapining anake sane nenten madue.
Sapa sira ja sane madue ajengan,
sapatutne ipun ngedum ajengannyane kapining anake sane kakirangan.”
12 Duk punika wenten pada rauh para tukang nuduk jinah pajegc mangda kalukat.
Raris ipun mataken ring dane Yohanes sapuniki,
“Guru,
napike sane sapatutne laksanayang tiang?”
13 Dane Yohanes nyaurin sapuniki,
“Sampunang ja ngalebih-lebihin nuduk jinah pajeg!”
14 Irika pada wenten para prajurit sane mataken kapining dane Yohanes sapuniki,
“Yening tiang,
napike sane sapatutne laksanayang tiang?”
Dane Yohanes nyaurin sapuniki,
“Sampunang ja megal utawi ngambil jinah anake nganggen babaosan sane bobab,
nanging maurip ja saking gajih ragane kamanten.”
Gambar: Bangsa Israel kajajah olih karajaan Romawi (3:14)
15 Duk punika,
anake akeh nyantosang sapengrauh Sang Prabu sane Kajanjiang olih Sang Hyang Pengardi.
Punika mawinan ipun mapineh-pineh ring manahnyane,
“Napike dane Yohanes punika Sang Prabu sane Kajanjiang punika?”
16 Irika raris dane Yohanes nyaurin anake akeh sekadi puniki,
“Tiang nglukat ragane nganggen toya biasa,
nanging jagi rauh Anak sane agengan kapining tiang.
Kadirasa ngelus sandal Ida,
tiang nenten ja pantes.
Ida jagi nglukat ragane nganggen Roh Sang Hyang Pengardi lan api.
17 Sang Prabu punika jagi ngadilin manusane makasami.
Pengadilan Idane kaumpamiang sekadi petani sane napinang gandum mangda ngutang luune.
Turmaning gandume jagi kasimpen ring glebege nanging luune kakutang ring kawah apine salamin-laminne.”
18 Sekadi punika dane Yohanes ngortiang Orti Rahayu kapining anake akeh antuk piteket sane akeh.
19 Taler dane Yohanes keras nuturin Herodes,
raja Galileane,
krana akeh malaksana jele.
Salah tunggal parilaksana jele sane kalaksanayang raja Herodes inggih punika ida ngambil Herodias,
rabin semeton idane.
20 Turmaning raja Herodes ngancan malaksana jaat.
Ida mrentahang mangda dane Yohanes kakrangkeng ring buine.
Hyang Yesus Kalukat
21 Ritatkala anake akeh irika kalukat,
kenten pada Hyang Yesus kalukat.
Duk Ida kalukat,
irika Ida mabakti,
langite raris mabukak,
22 tur Roh Sang Hyang Pengardi tedun marupa paksi dara ring duur Idane.
Raris wenten suara saking langite sapuniki,
“Duh Cening,
Cening ene Sang Putra ane sayangin Nira.
Cening ane nyenengin manah Nirane.”
Gambar: Hyang Yesus kalukat (3:22)
Riwayat Hyang Yesus
23 Ritatkala Hyang Yesus ngawitin pakaryan Idane,
Ida mayusa kirang langkung telung dasa tiban.
Manut tutur anake irika,
Ida okan dane Yusup,
sentanan dane Eli,
24 sentanan dane Matat,
sentanan dane Lewi,
sentanan dane Malki,
sentanan dane Yanai,
sentanan dane Yusup,
25 sentanan dane Matika,
sentanan dane Amos,
sentanan dane Nahum,
sentanan dane Hesli,
sentanan dane Nagai,
26 sentanan dane Maat,
sentanan dane Matika,
sentanan dane Simei,
sentanan dane Yosek,
sentanan dane Yoda,
27 sentanan dane Yohanan,
sentanan dane Resa,
sentanan dane Serubabel,
sentanan dane Sealtiel,
sentanan dane Neri,
28 sentanan dane Malki,
sentanan dane Adi,
sentanan dane Kosam,
sentanan dane Elmadam,
sentanan dane Er,
29 sentanan dane Yesua,
sentanan dane Elieser,
sentanan dane Yorim,
sentanan dane Matat,
sentanan dane Lewi,
30 sentanan dane Simeon,
sentanan dane Yehuda,
sentanan dane Yusup,
sentanan dane Yonam,
sentanan dane Elyakim,
31 sentanan dane Melea,
sentanan dane Mina,
sentanan dane Matata,
sentanan dane Natan,
sentanan raja Daud,
32 sentanan dane Isai,
sentanan dane Obed,
sentanan dane Boas,
sentanan dane Salmon,
sentanan dane Nahason,
33 sentanan dane Aminadab,
sentanan dane Admin,
sentanan dane Arni,
sentanan dane Hesron,
sentanan dane Peres,
sentanan dane Yehuda,
34 sentanan dane Yakub,
sentanan dane Isak,
sentanan dane Abraham,
sentanan dane Terah,
sentanan dane Nahor,
35 sentanan dane Serug,
sentanan dane Rehu,
sentanan dane Peleg,
sentanan dane Eber,
sentanan dane Salmond,
36 sentanan dane Kenan,
sentanan dane Arpaksad,
sentanan dane Sem,
sentanan dane Nuh,
sentanan dane Lamek,
37 sentanan dane Metusalah,
sentanan dane Henok,
sentanan dane Yared,
sentanan dane Mahalaleel,
sentanan dane Kenan,
38 sentanan dane Enos,
sentanan dane Set,
sentanan dane Adam.
Lan dane Adam punika kakardinin olih Sang Hyang Pengardi.