Dane Maria Nglekadang Putra ring Kota Betlehem
2
Duk punika Kaisar Agustus,
inggih punika raja agung Negeri Romanea,
mrentahang mangda makasami panjaknyane kasensus.
2 Sensus sane kapertama punika kalaksanayang ritatkala Kirenius dados gubernur ring Propinsi Siria.
3 Punika mawinan makasami panjake luas ka kotannyane suang-suang jagi kasensus.
4 Kaceritayang mangkin,
dane Yusup luas saking Kota Nasaret ring Galilea nuju Kota Betlehem ring Wawidangan Yudeaneb.
Kotane punika kasambat kota Daud krana raja Daud saking irika idumun.
Dane Yusup mrika krana ipun soroh sentanan raja Daud.
5 Dane Yusup sareng dane Maria,
gagelannyane sane sedek mobot punika,
mrika ka Kota Betlehem jagi kasensus.
6 Ritatkala ring kotane punika,
rauh dinane dane Maria jagi nglekadang putra.
7 Irika dane Maria nglekadang oka lanang sane kapertama.
Anake alit punika raris kakaput nganggen kain,
tur kagenahang ring palungane sane madaging somi.
Santukan dane nenten polih genah nginep.
Indik Malekat Ngedengang Raga ring Para Pengangon
8 Duk wengine punika,
ring pasisir kotane wenten para pengangon biri-biric sane sedek nyaga ingon-ingonannyane ring tegale.
Gambar: Para pengangon biri-biri (2:8)
9 Jeg saget wenten malekat Sang Hyang Tunggal ngedengang raga ring para pengangone punika.
Tur kaagungan Sang Hyang Tunggal nyinarin ipun sami kantos ipun pada jejeh.
10 Raris malekate punika mabaos sapuniki,
“Eda ja ragane jejeh!
Krana tiang mai ngortiang orti becik sane mawinan anake makejang bakal girang.
11 Petenge jani di kota Daud sampun lekad juru rahayun ragane.
Anake alit punika nenten tios Sang Prabu sane Kajanjiang olih Sang Hyang Tunggal,
sane pada kasambat Sang Ratu Agung.
12 Ene cihna tekening ragane:
ragane bakal ningalin anake alit punika sane makaput nganggen kain,
tur kasirepang ring palungane.”
13 Jeg saget kacingak akeh malekate irika kantos nenten sida baan metek.
Malekate punika sedek ngagungang Sang Hyang Pengardi saha mabaos sapuniki,
14 “Kaagungang ja Sang Hyang Pengardi ring swarga sane maha luhur,
lan ring gumine puniki,
dame ja manusane sane ngranayang manah Idane seneng!”
15 Sasampune para malekate matilar saking ipun tur mawali ka swarga,
para pengangone saling ngraos sapuniki,
“Lan ja iraga ka Kota Betlehem apanga ningalin paundukane ane ada ditu,
ane kanikayang olih Sang Hyang Tunggal tekening iraga.”
16 Raris ipun sami gelis-gelis mamargi tur manggihin dane Maria sareng dane Yusup ring Betlehem.
Irika ipun sami nyingakin anake alit punika sane sedek kasirepang ring palungane.
17 Ritatkala para pengangone nyingakin anake alit,
ipun sami nyeritayang baos malekate indik anake alit punika.
18 Tur makasami pada angob mirengin cerita saking para pengangone.
19 Nanging dane Maria nyimpen lan mineh-minehang paindikane punika ring manahnyane.
20 Raris para pengangone punika mawali ka pategalane,
saha ngagungang Sang Hyang Pengardi krana makasami paindikan sane kasaksiang punika yakti sekadi orti saking malekate.
Hyang Yesus Kaserahang ring Sang Hyang Tunggal
21 Sasampune anake alit punika mayusa kutus dina,
Ida kasunat tur kaparabin Yesus,
sekadi parab sane kanikain olih malekate sadereng dane Maria mobot.
22-24 Petang dasa (40) dina sasampune Hyang Yesus lekad,
dane Yusup sareng dane Maria rauh ring Genah Agung Mabakti kapining Sang Hyang Tunggald.
Manut ukum agama Yahudine,
anake istri sane sampun nglekadang oka musti kasuciang.
Irika,
dane Yusup sareng dane Maria ngaturang aturan sane sapatutne,
inggih punika duang ukud paksi dara utawi paksi kukur sane katampah.e
Duk punika,
Hyang Yesus pada kabakta ka genah mabaktine punika jagi kaserahang mangda ngayahin Sang Hyang Tunggal manut Cakepan Suci anak Yahudine.
Ring Cakepan Sucine punika wenten katulis sapuniki,
“Sewatek anak alit lanang sane kapertama musti kaserahang dados druen Sang Hyang Tunggal.” Pararudan 13:2,12.
25 Irika ring Kota Yerusalem wenten adiri anak sane mapesengan Simeon.
Dane anak patut sane satinut ring Sang Hyang Tunggal.
Tur dane Simeon sedek nyantosang Sang Hyang Tunggal jagi ngrahayuang Bangsa Israele.
Samaliha Roh Sang Hyang Tunggal nuntun dane Simeon.
26 Roh Sang Hyang Tunggal sampun nikain dane,
wantah dane nenten jagi padem sadereng nyingakin Sang Prabu sane kajanjiang olih Sang Hyang Tunggal.
27 Dane Simeon kapimpin olih Roh Sang Hyang Tunggal mangda mrika ka Genah Agung Mabakti kapining Sang Hyang Tunggal.
Duk punika dane Yusup sareng dane Maria makta Hyang Yesus sane kari alit mrika,
jagi nglaksanayang prentah manut ukum agama Yahudine.
28 Raris dane Simeon ngambil saha nyangkil anake alit punika,
tur ngagungang Sang Hyang Pengardi sapuniki:
29 “Duh Ratu Sang Hyang Pengardi,
Iratu sampun nglugrahin janjin Iratune.
Sane mangkin banggiang ja titiang,
parekan Iratune,
padem antuk manah sane trepti.
30 Krana peningalan titiange sampun nyingakin
karahayuane puniki saking Iratu.
31 Juru Rahayu puniki sampun kasadyayang olih Iratu
majeng ring saluirin bangsane sami.
32 Sekadi galang sane nyinarin margi ring bangsa-bangsa sane nenten Yahudi,
mangdane bangsa-bangsane punika rauh ring Iratu.
Sapengrauh Juru Rahayu punika ngranayang Bangsa Israel sane kapilih olih Iratu dados agung.”
33 Irika raris dane Yusup lan dane Maria angob mirengin pengandikan dane Simeone indik anake alit punika.
34-35 Raris dane Simeon ngicen wara nugraha ring ipun makakalih saha mabaos ring dane Maria sapuniki,
“Pirengin ja!
Sujatine anak alit puniki kapilih olih Sang Hyang Pengardi jagi ngenyagang akeh anak Israele.
Nanging anake alit puniki pada jagi ngrahayuang anak Israel sane lianan.
Turmaning anake alit puniki dados cihna saking Sang Hyang Pengardi.
Anake alit puniki jagi ngedengang manah corah sane ilid saking anake akeh.
Punika mawinan anake akeh jagi nungkasin Ida.
Raris manah ragane jagi ngrasayang sebet sekadi katebek antuk pedang sane mangan.”
36 Irika taler wenten adiri anak istri sinoman Sang Hyang Pengardi sane mapesengan Hana.
Dane okan Dane Panuel saking soroh Asyer.
Dane Hana sampun lingsir pisan:
Dane punika sampun marabian,
nanging dane urip sareng rabin danene wantah pitung tiban.
37 Dane Hana punika anak janda,
tur sane mangkin mayusa ulung dasa pat (84) tiban.
Dane nenten taen matilar saking Genah Agung Mabakti kapining Sang Hyang Pengardi.
Samaliha lemah-peteng dane ngayah kapining Sang Hyang Pengardi,
saha dane mabakti tur sering mapuasa.
38 Duk punika rauh pada dane Ana ngaturang penyuksma kapining Sang Hyang Pengardi.
Tur dane nyeritayang indik anake alit punika kapining anake akeh sane nyantosang dinane Sang Hyang Pengardi mebasang jagat Yerusalem.
39 Sasampune dane Yusup sareng dane Maria nglaksanayang saluirin prentah ukum agama Yahudine,
raris ipun budal ka Nasaret ring Wawidangan Galilea.
40 Anak alit punika ngancan ageng lan kuat.
Turmaning Ida kicen kawicaksanaan sane ageng samaliha kalintang kaswecanin olih Sang Hyang Pengardi.
Hyang Yesus Ring Genah Agung Mabakti Kapining Sang Hyang Pengardi
41 Sebilang tiban ritatkala rarainan Paskah,
dane Yusup sareng dane Maria luas adoh ka Yerusalem.
42 Tur rikala Hyang Yesus mayusa roras tiban,
Ida kabakta ka Yerusalem sekadi biasane ring rarainane punika.
43 Sasampune wusan rarainan Paskahe punika,
dane makasami raris budal.
Nanging Hyang Yesus kari meneng ring Yerusalem, lan reraman Idane nenten uning indike punika.
44 Duk punika,
dane Yusup sareng dane Maria ngaden Hyang Yesus mamargi sinarengan sareng sekan danene sane lianan.
Raris sasampune awai mamargi,
dane sareng kalih ngrereh Hyang Yesus ring para semetonnyane lan para sawitran danene.
45 Ritatkala Hyang Yesus nenten kapanggihin,
raris dane Yusup sareng dane Maria mawali ka Yerusalem jagi ngrereh Hyang Yesus.
46 Sasampune tigang dina ngrereh Ida,
raris Ida kapanggihin ring Genah Agung Mabakti kapining Sang Hyang Pengardi.
Duk punika,
Ida malinggih ring tengah-tengah para guru agama Yahudine saha mirengin lan mataken ring para gurune punika.
47 Lan makasami anake sane mirengin Ida kalintang angob krana Ida wicaksana tur saluirin pasaur Idane patut.
48 Irika dane Yusup sareng dane Maria angob nyingakin Hyang Yesus.
Raris ibun Idane mabaos ring Hyang Yesus sapuniki,
“Cening,
sapatutne cening tusing malaksana buka kene tekening rerama.
Manah ibu ajak ajin ceninge runtag ngalih cening.”
49 Raris Hyang Yesus ngandika sapuniki,
“Napi mawinan ibu sareng aji ngrereh Tiang?
Nentenke ibu sareng aji uning,
Tiang musti wenten ring purin Ajin Tiange?”
50 Nanging ipun nenten ngerti artin pengandikan Hyang Yesuse punika.